ރ. ވަންދޫގައި ގާއިމްކޮށްފައިވާ ސަރަހައްދީ ވޭސްޓް މެނޭޖްމަންޓް ސެންޓަރު ހިންގާ ބަލަހައްޓަން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އަށް މިއަދު ހަވާލުކޮށްފި އެވެ.
ވަންދޫ ރީޖަނަލް ވޭސްޓްމެނޭޖްމެންޓް ސެންޓަރަކީ ރ. އަތޮޅާއި ބ. އަތޮޅާއި ޅ. އަތޮޅުގައި މީހުން ދިރިއުޅޭ 44 ރަށާއި އެ އަތޮޅުތަކުގައިވާ ރިސޯޓްތަކަށް ކުނި މެނޭޖްކުރުމުގެ ހިދުމަތް ދިނުމަށް ގާއިމްކޮށްފައިވާ ސެންޓަރެކެވެ.
މިއަދު ހެނދުނު ޝީ ބިލްޑިންގުގައި ބޭއްވި ރަސްމިއްޔާތެއްގައި އެ ކޯޕަރޭޝަނަށް އެތަން ހަވާލުކޮށް އެކަމުގެ އެއްބަސްވުމެއްގައި ވަނީ ސޮއިކޮށްފަ އެވެ. އެންވަޔަރަންމަންޓް މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ އެންވަޔަރަންމަންޓް މިނިސްޓަރު ޠާރިގު އިބްރާހިމް އެވެ. ވެމްކޯގެ ފަރާތުން ސޮއިކުރެއްވީ އެ ކޯޕަރޭޝަންގެ މެނޭޖިން ޑިރެކްޓަރު އިބްރާހިމް ފުއާދު އެވެ.
އެ ރަސްމިއްޔާތުގައި އެންވަޔަރަންމަންޓް މިނިސްޓްރީގެ ޑެޕިއުޓީ މިނިސްޓަރު އަލީ އާމިރު ވިދާޅުވީ ވޭސްޓް މެނޭޖްމަންޓް ސެންތަރުގެ ކަންކަން ބެލެހެއްޓުމުގެ ކަންކަން ވެމްކޯއަށް ހަވާލުކޮށްފައިވާ އިރު، އެ އަތޮޅުތަކުގައި ހިމެނޭ ރަށްރަށުން އެ މަސައްކަތަށް ހާއްސަކޮށް މީހުން ތަމްރީނުކޮށްފައިވާނެ ކަމަށެވެ. އަދި އެމީހުންނަށް ތަމްރީނު ދިނީ ރާއްޖެއިން ބޭރުން ކަމަށް ވެސް އޭނާ ވިދާޅުވި އެވެ. އަދި އެ ރަށްރަށަށް ކުނި މެނޭޖްކުރަން ބޭނުންވާ ސާމާނު ފޯރުކޮށްދީފައިވާ ކަމަށް ވެސް އާމިރު ވިދާޅުވި އެވެ.
ވެމްކޯގެ މެނޭޖިން ޑިރެކްޓަރު ފުއާދު ވިދާޅުވީ އެ ކޯޕަރޭޝަނުން މަސައްކަތް ކުރާނީ އެތަނަށް ޖަމާވާ ކުނިތައް ސާފުކޮށްދީ ރަށްރަށުގެ ކުނިކޮށިތައް އެކަށީގެންވާ ގޮތަކަށް ބެލެހެއްޓޭނެ ގޮތަކަށް ވަސީލަތްތައް ފޯރުކޮށްދިނުމަށް ކަމަށެވެ. އަދި އެ މަސައްކަތް ކުރާނީ އެންވަޔަރަންމަންޓް މިނިސްޓްރީގެ ލަފާގެ ދަށުން އެ މިނިސްޓްރީއާ ގުޅިގެން ކަމަށެވެ.
ވަންދޫގައި ގާއިމްކޮށްފައިވާ ކުނި މެނޭޖްކުރާ ސެންޓަރަކީ ޒަމާނީ ޓެކްނޮލޮޖީތައް ހިމަނައިގެން، ތިމާވެއްޓާ ރައްޓެހި ގޮތަކަށް ކުނި ނައްތާލުމުގެ މަސައްކަތް ކުރެވޭނެ ގޮތަށް ފަރުމާކޮށްފައިވާ ސެންޓަރެކެވެ.