އިނގިރޭސި ގައުމީ ޓީމުގެ ކޯޗަކަށް ސަންޑަލޭންޑަށް އިރުޝާދުދެމުންދިޔަ ސޭމް އެލަޑައިސް ހަމަޖެއްސުމާ ގުޅިގެން އެ ކްލަބުގެ ކޯޗަކަށް ޑޭވިޑް މޮއިސް ހަމަޖައްސައިފި އެވެ.
މެންޗެސްޓާ ޔުނައިޓެޑުގެ ކުރީގެ ކޯޗު މޮއިސް ސަންޑަލޭންޑާ ގުޅިފައިވަނީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ.
"އަހަރެމެން އުފަލާއެކު ޑޭވިޑް މޮއިސް އަށް މަރުހަބާ ކިޔަން. އޭނާ އަކީ އަހަރެންނަށް ވަރަށް ކަމުދާ ކޯޗެއް. އަހަރެން އެތައް ފަހަރެއްގެ މަތިން އެކި ކަންކަމާ ގުޅިގެން އޭނާއާ ވާހަކަ ދައްކާފައިވާނެ. ކުރިން ވެސް އަހަރެން އޭނާ ސަންޑަލޭންޑަށް ގެނައުމަށް މަސައްކަތްކުރިން،" ސަންޑަލޭންޑްގެ ޗެއާމަން އެލިސް ޝޯޓް ވިދާޅުވި އެވެ.
ޗެއާމަން އެލިސް ޝޯޓް ވިދާޅުވީ، ކްލަބުގެ އެންމެ ބޮޑު އަމާޒަކީ ޓީމު ވަރުގަދަކޮށް ރަނގަޅު ފުޓްބޯޅަ ކްލަބެއްގެ ގޮތުގައި ދެމިއޮތުން ކަމަށާއި މޮއިސްގެ ތަޖުރިބާއާއެކު އެކަންތައް ހާސިލުކުރެވޭނެ ކަމަށެވެ. އަދި ކޮންމެ ސީޒަނެއްގައި ވެސް ފަހަތަށް ޖެހުމަށްވުރެ، ކުރިއަށް ޖެހުމަށް ސަންޑަލޭންޑުން މަސައްކަތް ކުރާނެ ކަމަށް އޭނާ ވިދާޅުވި އެވެ.
އެވަޓަންގެ ކޯޗުގެ މަގާމުގައި ގިނަ ދުވަސްތަކެއް ހޭދަކުރި މޮއިސް 2014 ވަނަ އަހަރު މެންޗެސްޓާ ޔުނައިޓެޑުގެ ކޯޗުކަމުގެ މަގާމުން ވަކިކުރުމުން ދެން އޭނާ ފެނިގެންދިޔައީ ސްޕެއިންގެ ރެއާލް ސޮސިއެޑާޑް އިންނެވެ.