ވަރުނުލާ ރާޅުގަނޑު މަތިން، ހިތްހަމަޖެހިލައިގެން ހިނގާލާފައި ނުވަތަ ދުއްވާލާފައި ދިއުމަކީ ކޮންމެ ދިވެއްސެއްގެ ވެސް އުންމީދަކަށް ވާނެ އެވެ. ގިނަ ދިވެހީން އެތިބީ އެފުރުސަތަށް އެދިއެދި އެވެ. ނަމަވެސް އަދި އެ ފުރުސަތެއް ނުލިބެ އެވެ. އެހެންނަމަވެސް ދިވެހި ނޫސްވެރިންނަށް މިވަނީ އެ ފުރުސަތު ލިބިފަ އެވެ. ހިތްހަމަ ޖައްސާލުމަށް ކުރިން ގޮސް އުޅުނު ރާޅުގަނޑު ސަރަހައްދުން ހިނގާލާފައި ފުޅާފާލަމެއްގެ މަތިން ހިނގާލެވިއްޖެ އެވެ. ނަމަވެސް އެއީ އަދި ވަގުތީ ފާލަމެކެވެ. އެ ވަގުތީ ފާލަމަށް އެރުމުން އެފެނުނު މަންޒަރުތަކުން އަދި އެ ފާލަމުގެ ފުރިހަމަކަން އިތުރަށް ސިފަވެ އެވެ.
އާޓިފިޝަލް ބީޗް ސަރަހައްދުގައި ހުރެ ބަލާލުމުން ފެންނަނަނީ ދަގަނޑު ފާލަމެކެވެ. ނަމަވެސް މިފާލަމުގެ މައްޗަށް އަރާލުމުން މިމަސައްކަތުގެ ފުރިހަމަކަން ފެނެ އެވެ. ވަރަށް ފުޅާކޮށް ހަދާފައިވާ އެ ފާލަމުން ހިނގާލާފައި ހުޅުލެއާއި މާލެއާއި މެދަށްވާ ހިސާބަށްދެވެ އެވެ. އޭގެ އެކޮޅުން އަނެއްކާ ވެސް ފާލަމެއް ގުޅާލުމުގެ މަސައްކަތް ދަނީ ކުރިއަށެވެ. އެފާލަމުގެ މަތީގައި ހުންނައިރު ސާފުވަޔާއެކު ހިތްގައިމު މަންޒަރެއް ފެނިގެންދެ އެވެ. މާލޭ ބައިނަލްއަގްވާމީ ވައިގެބަނދަރުގެ ފުރިހަމަކަން ފެނިގެންދާއިރު އެ ތަނަށް މަތިންދާބޯޓުތައް ޖައްސާ މަންޒަރާއެކު އިތުރު ފުރިހަމަ ކަމެއް އެސަރަހައްދަށް ލިބިގެންދެ އެވެ.
ޗައިނާ މޯލްޑިވްސް ފުރެއިންޑްޝިޕް، ބުރިޖު ގެ މަސައްކަތް ތައް ދިވެހި ނޫސް ވެރިންނަށް ދައްކާލުން--- ސަން ފޮޓޯ/ ފަޔާޒު މޫސާ
މިދައްކަނީ ދިވެހި ސަރުކާރުން މިހާރު ފަށާފައިވާ ބިޔަ މަޝްރޫއެއްގެ ވާހަކަ އެވެ. ޗައިނާ-މޯލްޑިވްސް ފްރެންޑްޝިޕް ބްރިޖުގެ މަސައްކަތް، ކޮންމެ ދުވަހަކު 24 ގަޑިއިރު ކުރަމުންދާއިރު ސައިޓުގައި 600 އެއްހާ މުވައްޒަފުން ދަނީ މަސައްކަތުގައި ހަރަކާތްތެރިވަމުންނެވެ. އެ ސަރަހައްދުގައި ގިނަ މަސައްކަތްތަކެއް ކުރެވެ އެވެ. މާލޭ ސައިޓުގެ މައިގަނޑު މަސައްކަތަކީ ބެޗިން ޕްލާންޓުތަކުން ޕައިލްތަކަށް ބޭނުންވާ ކޮންކްރީޓްހެދުމެވެ. އެކަމަށް ބޭނުންކުރަނީ ވަރަށް ބޮޑެތި ޕްލާންޓްތަކެކެވެ. އަދި ބޭނުންވާތަކެތި އުފުލުމަށް 40 ޓަނު އުފުލޭ ދެ ކެރޭން ބޭނުންކުރެ އެވެ. ހުޅުމާލޭ ސައިޓުގެ ހަތަރު ހެކްޓަރުގެ ބިމުގައި ލެބޯޓުރީތައް ހަދައި ޓެސްޓްތައް ހަދަމުންނެވެ.
މިމަސައްކަތަށް ބަލާ އިރު މިއީ ރާއްޖޭގައި މިހާތަނަށް ހިންގާފައިވާ މިފަދަ އެހެން މަޝްރޫއުތަކާ އަޅާބަލާއިރު ވަރަށް ބޮޑަށް ފެންވަރާއި ފަންވަރަށް އިސްކަންދީގެން ކުރަމުން އަންނަ މަސައްކަތެކެވެ. މިހާރު ވެސް ދަނީ ކަނޑުގައި ޖަހާ ޕައިލްތައް ތަހުލީލުކުރުމަށް ގިނަ މަސައްކަތްތަކެއް ކުރަމުންނެވެ. ކޮންކުރިޓް އެޅުމާއި ބޭނުންކުރާ ދަގަނޑުވެސް އެކިގޮތްގޮތުން ޓެސްޓްކުރެ އެވެ. މަސައްކަތުގެ ފެންވަރު ބެލުމަށް 20 މީހުންގެ ޓީމަކުން ދަނީ ހަރަކާތްތެރިވަމުންނެވެ.
"ރާއްޖޭގެ އެއްވެސް ޕްރޮޖެކްޓެއްގައި މަސައްކަތް ނުކުރެވޭ މިންވަރަށް އެވަރަށް ބެލިގެން މަސައްކަތް ކުރިއަށްދަނީ، އަޅުގަނޑުމެންގެ ޕްރޮޖެކްޓް މެނޭޖުމަންޓް މަސައްކަތަކީ ކޮލެޓީ އެޝުއަރެންސް މަސައްކަތްކުރާ ކުންފުނީގެ މެތޮޑޮލޮޖީއަކީ ކޮބާތޯއާއި އެ ރަނގަޅުތޯ އާއި އެއާއެއްގޮތަށް ޓެސްޓްތައް ހަދާފަ އެ ބަލަމުންގެންދޭތޯ ބެލުން." ހައުސިން މިނިސްޓްރީގެ ޑެޕިއުޓީ މިނިސްޓަރު އަބްދުﷲ މުއްތަލިބް ވިދާޅުވި އެވެ.
ޗައިނާ މޯލްޑިވްސް ފުރެއިންޑްޝިޕް، ބުރިޖު ގެ މަސައްކަތް ތައް ދިވެހި ނޫސް ވެރިންނަށް ދައްކާލުން--- ސަން ފޮޓޯ/ ފަޔާޒު މޫސާ
"އެންމެ ކުޑަމިނުން ދަގަނޑުގެ ސްޓްރެންތަށް ވެސް ބެލިގެން ކޮންކުރިޓް އަޅަން ބޭނުންކުރާ ވެލީގެ ސައިޒުތަކަށް ދަންދެން ޓެސްޓްކުރެވި މެޝާ ކުރެވިގެން މިކުރިއަށްގެންދަނީ އެހެންވީމާ އެގޮތުން ބަލާއިރު ވަރަށް ރަނގަޅަށް ބެލިގެން މިގެންދަނީ." މުއްތަލިބު ވިދާޅުވިއެވެ.
މިމަސައްކަތް ކުރާ ޗައިނާގެ ސީސީސީސީ ސެކަންޑް ހާބާ އިންޖިނިއަރިން އިން މައުލޫމާތުދޭ ގޮތުގައި ފާލަމުގެ އަމަލީ މަސައްކަތުގެ ތެރެއިން ދާއިމީ ފައުންޑޭޝަން އެޅުމުގެ މަސައްކަތް އަންނަ މަހު ފެށުމަށް ނިންމާފައިރު ސެޕްޓެމްބަރު މަހު ގިނަ މަސައްކަތްތަކެއް ފެންނާނެ އެވެ. ދާއިމީ ފާލަމުގެ ތަނބުތަކުގެ ހަތަރު ހޮޅިއެއް މިހާރު ވަނީ ޖަހާފަ އެވެ. އެގޮތަށް ކޮންމެ ތަނބަކަށް ހަތް ހޮޅި ޖެހުމަށް ވަނީ ނިންމާފަ އެވެ.
ހަސަތޭކައެއްހާ މުވައްޒަފުންނާ އެކު މި ފާލަމުގެ މަސައްކަތް ކުރިއަށްދާއިރު ބޭނުން ކުރަނީ އެންމެ ޒަމާނީ ވަސީލަތްތަކެވެ. ދަގަނޑުގެ ފެންވަރާއި ކޮންކްރިޓުގެ ފެންވަރު ބެލުމަށް ތަފާތު މެޝިންތައް ގެންގުޅެ ތަފާތު ޓެސްޓްތައް ހަދަ އެވެ. ހައުސިން މިނިސްޓްރީން ބުނީ މަސައްކަތް ދަނީ ތާވަލު ކުރެވިފައިވާ ގޮތަށް ކަމަށާއި 2018 ވަނަ އަހަރުގެ ޖުލައި 26 ވަނަ ދުވަހު މާލެއާއި ހުޅުމާލެ ގުޅުވާލަދޭ އެ ހިތްގައިމު ފާލަން ހުޅުވޭނެ ކަމަށެވެ.
ޗައިނާ މޯލްޑިވްސް ފުރެއިންޑްޝިޕް، ބުރިޖު ގެ މަސައްކަތްތައް ދިވެހި ނޫސް ވެރިންނަށް ދައްކާލުން--- ސަން ފޮޓޯ/ ފަޔާޒު މޫސާޗައިނާ މޯލްޑިވްސް ފުރެއިންޑްޝިޕް، ބުރިޖު ގެ މަސައްކަތް ތައް ދިވެހި ނޫސް ވެރިންނަށް ދައްކާލުން--- ސަން ފޮޓޯ/ ފަޔާޒު މޫސާ
ޗައިނާ މޯލްޑިވްސް ފްރެންޑްޝިޕް ބްރިިޖްގެ ދިގު މިނަކީ 1.39 ކިލޯ މީޓަރެވެ. ހައުސިން މިނިސްޓްރީން ބުނީ ފާލަމުގެ ފުޅާ މިނުގައި 20 މީޓަރު ހުންނާނެ ކަަމަށެވެ. ހަތަރު ފުރޮޅުލީ އުޅަނދު ދުއްވާ ދެ ލޭނާއި ސައިކަލު ދުއްވާ ދެ ލޭނާއި ބައިސްކަލު ދުއްވާ ލޭނަކާއި ހިނގާ މީހުންނަށް ވަކި ލޭނެއް ފާލަމުގައި އޮންނާނެ ކަަމަށް ވެސް ހައުސިން މިނިސްޓްރީން ވަނީ މީގެ ކުރިން ބުނެފަ އެވެ.
ވަގުތީ ފާލަމާއެކު ވެސް މިވަނީ ބުރިޖުގެ ފުރިހަމަކަން ފެނިގެންގޮސްފަ އެވެ. އެޕްލެޓްފޯމުމަތިން ހިނގާލާފައިދާއިރު އެކުރެވޭ އިހުސާސް އެބުރި ނިމުމުން މާފުރިހަމައަށް ކުރެވޭނެކަން ޔަގީނެވެ.