ރާއްޖޭގައި ރަޖިސްޓްރީކޮށްގެން ހިންގާ މަތީ ތައުލީމާއި ތަމްރީން ދޭ މަރުކަޒުތަކުން ހިންގާ ތައުލީމާއި ތަމްރީން ޕްރޮގްރާމްތައް ފުރިހަމަކުރުމުން ދޭ ސެޓްފިކެޓްތަކުގައި މޯލްޑިވްސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ޖަހައިދެމުން އަންނަ "ރިކޮގްނިޝަން" ތައްގަނޑު ޖެހުން ހުއްޓާލަން އެ އޮތޯރިޓީން ނިންމައިފި އެވެ.
މިހާތަނަށް، ދިވެހި ސިވިލް ސާވިސްގެ ވަޒީފާއަށް ކުރިމަތިލާ ފަރާތްތަކުން ލިބިފައިވާ ހުނަރާއި ތައުލީމާ ތަމްރީން އަންގައިދޭ ލިޔުން ހުށަހަޅަންޖެހެނީ އެމްކިޔުއޭގެ "ރިކޮގްނިޝަން" ތައްގަނޑު ޖަހައިފައެވެ.
"ރިކޮގްނިޝަން" ތައްގަނޑު ޖެހުން އެމްކިޔުއޭ އިން ހުއްޓާލަން ނިންމާފައިވަނީ އަންނަ ސެޕްޓެމްބަރު މަހުގެ އެކަކުން ފެށިގެން ނެވެ.
އެގޮތަށް ނިންމީ އެމްކިޔުއޭއިން ބުނި ގޮތުގައި، ރާއްޖޭގައި ރަޖިސްޓްރީ ކޮށްގެން ހިންގާ މަތީ ތައުލީމު ދޭ މަރުކަޒުތަކުން ކުރިއަށް ގެންދާ ތައުލީމާއި ތަމްރީން ޕްރޮގްރާމް ތަކަކީ ރާއްޖޭގެ ގައުމީ ސަނަދުތަކުގެ އޮނިގަނޑުގައި ކަނޑައެޅިފައިވާ ގިންތި ތަކަށް ފެތޭ ގޮތަށް ތައްޔާރުކޮށް އެ އޮތޯރިޓީގެ ހުއްދަ އާއެކު ހިންގާ ޕްރޮގްރާމްތަކަށް ވާތީ އެވެ.
މީގެ އިތުރުން، އެ ޕްރޮގްރާމް ނިންމައި ދަސްވެނިވާ ދަރިވަރުންނަށް ސަނަދު ދެނީ ވެސް އެމްކިޔުއޭ އިން އެ ޕްރޮގްރާމް ހިންގާފައިވާ ގޮތް ބަލައި ސަނަދު ދިނުމުގެ ހުއްދަ ދިނުމަށް ފަހު ކަމަށް ވެސް އެ އޮތޯރިޓީން ބުނެ އެވެ.
ސިވިލް ސާވިސް ވަޒީފާއަށް އެދޭއިރު ހުށަހަޅާ ތައުލީމީ ސެޓްފިކެޓްތަކުގައި އެމްކިއުއޭ އިން "ރިކޮގްނިޝަން" ތައްގަނޑު ޖެހުން ހުއްޓާލުމުން އެކަމުގެ ސަބަބުން ސިވިލް ސާވިސް ކޮމިޝަނަށް ދިމާވެދާނެ ދަތިތައް ހައްލުކުރުމަށް އެ ކޮމިޝަނާއެކު އެމްކިޔުއޭ އިން މިއަދު ވަނީ އެއްބަސްވުމެއްގައި ސޮއި ކޮށްފަ އެވެ.
އެ އެއްބަސްވުމުގެ ދަށުން ސިވިލް ސާވިސްގެ ވަޒީފާއަށް އެދޭ މީހަކު ހުށަހަޅާ ސަނަދުތަކުގައި މައްސަލައެއް އުޅޭނަމަ ނުވަތަ އިތުރު ތަފްސީލެއް ބޭނުންވާނަމަ، އެ އެހީތެރިކަން އެމްކިޔުއޭ އިން ސިވިލް ސާވިސް ކޮމިޝަނަށް ފޯރުކޮށްދޭނެ އެވެ.