ނޫސްވެރިންނަށް އަޅާލައި، އެމީހުންނަށް އިސްލާމީ އަހުލާގު އުނގަންނައިދޭން ޖެހޭ ކަމަށް ކުރީގެ އިސްލާމިކް މިނިސްޓަރު އަދި މޯލްޑިވްސް އިސްލާމިކް ޔުނިވާސިޓީގެ ވައިސް ޗާންސެލާ ޑރ. މުހައްދު ޝަހީމް އަލީ ސައީދު ވިދާޅުވެއްޖެ އެވެ.
ޑރ. ޝަހީމް އެހެން ވިދާޅުވީ ރަމަޟާން މަހުގެ ރޭތައް އިހްޔާކުރުމަށް ރޭ އިސްލާމީ މަރުކަޒު މައިދާނުގައި ކުރިޔަށް ދިޔަ އިހްޔާ ފޯރަމުގައި "އިސްލާމްދީނާއި މީޑިއާ"ގެ މައުޟޫއުއާ މެދު ވާހަކަ ދައްކަވަމުންނެވެ.
"ނޫސްވެރިންނަށް ވެސް އެބަ ޖެހޭ އޯގާތެރިކޮށް ކަންތައް ކުރަން. އެމީހުންނަށް އަޅާލައި އިސްލާމީ ނޫސްވެރިއެއްގެ ޒިންމާ އާއި މަސްއޫލިއްޔަތު ބަޔާންކޮށްދީ އެމީހުންނަށް ހިތްވަރުދީ ނޫސްވެރިކަމުގެ އިސްލާމީ އަހުލާގިއްޔާތު އުނގަންނައިދޭން ޖެހޭ،" ޝަހީމް ވިދާޅުވި އެވެ.
އޭނާ ވިދާޅުވީ ނޫސްވެރިންނަކީ ވަރަށް މާތް މަސައްކަތެއް ކުރާ ބައެއް ކަމަށާއި ނޫސްވެރިންނަކީ މުޖުތަމައުއެއް ބިނާކުރުމުގެ އެންމެ މުހިންމު އެއް މަސައްކަތް ކުރާ މީހުން ކަމަށެވެ.
ޑރ. ޝަހީމް ވިދާޅުވީ މީޑިއަކީ ތެދު ހަބަރު ފަތުރަން ޖެހޭ ވަސީލަތަކަށް ވާން ޖެހޭ ކަމަށާއި މީޑިއާގެ ބާރަކީ އެއްވަނަ ބާރު ކަމަށެވެ. އަދި މީޑިއާ އަކީ ހެވަށް ގޮވާލާ ބަޔަކަށް ވެސް ވާން ޖެހޭނެ ކަމަށް ޝަހީމް ވިދާޅުވި އެވެ.
ރޭގެ ސެޝަންގައި ރަސޫލުންގެ ޒަމާނުގައި މީޑިއާ ބޭނުންކުރި ގޮތާ ގުޅިގެން ވެސް ވަނީ ވާހަކަދައްކައިފަ އެވެ. ޝަހީމް ވިދާޅުވީ މިޒަމާނާ ގުޅޭ މީޑިއާގެ ވަސީލަތްތައް މުސްލިމުންގެ އަތުގައި ވަރުގަދަ ވެފައި އޮތުމަކީ ވަރަށް މުހިންމު ކަމެއް ކަމަށެވެ.
"ބަވަނަވަމުން އަންނަ ދުނިޔޭގައި މިއަދު އިސްލާމްދީނަށް ކުރިމަތިވަމުން އަންނަ އެންމެ ބޮޑު ގޮންޖެހުމަކީ އިންޓަނޭޝަނަލް މީޑިއާގައި އިސްލާމްދީނަށް އަންނަ ގޮންޖެހުންތައް. ރަސޫލާގެ ޝަޚުސިއްޔަތަށް ކުރިމަތިކުރުވާ ގޮންޖެހުންތައް،" ޝަހީމް ވިދާޅުވި އެވެ.
ނަމަވެސް ވަސީލަތްތަކާ އެކު ވެސް، އެ ގޮންޖެހުންތަކާއި ހަމަލާތަކަށް ރައްދު ދެވޭވަރުގެ ބާރު މުސްލިމު މީޑިއާތަކުގައި ނެތްކަން ޝަހީމް ފާހަގަކުރެއްވި އެވެ.
ރޭގެ ސެޝަންގައި ވާހަކަ ދައްކަވަމުން ޝެއިޚް މުހައްމަދު ގުބާދު އަބޫބަކުރު ވިދާޅުވީ މީޑިއަކީ މުޖުތަމައު ބައްޓަން ކުރާ ބަޔަކަށް ވުމުން، ދިވެހި މީޑިއާ އިން ފެންނަން ޖެހޭނީ ދިވެހިންގެ އަހުލާގާއި ދީނާއި އަދި ސަގާފަތް ކަމަށެވެ.
"އެއާ ހިލާފަށް ދިވެހި މީޑިއާ އިން ފެންނަނީ ޔޫރަޕުގެ އަހުލާގު، ޔޫރަޕުގެ އާދަކާދަ. ނޫނީ ކޮންމެސް އެހެން ގައުމެއްގެ އަހުލާގު ނުވަތަ އާދަކާދަ ކަމަށް ވަންޏާ އޭގެ މާނައަކީ އެއީ ދިވެހި މީޑިއާ އެއް ނޫނޭ،" ގުބާދު ވިދާޅުވި އެވެ.
ގުބާދު ވިދާޅުވީ މީޑިއާ ވާން ޖެހޭނީ ނަޒާހަތްތެރި އެއްޗަކަށް ކަމަށާއި، "ވަކި ބަޔަކު" ދެކޭގޮތް ތަމްސީލުކޮށްދޭ އެއްޗަކަށް ވެގެން ނުވާނެ ކަމަށެވެ.