ރޯދަ މަހު ހަވީރު ކުރިޔަށް ގެންދާ ޓީވީ އަށް ޚާއްސަ ޕްރޮގްރާމް ތަކުގެ ތެރެއިން އެންމެ ބޮޑު ޕްރޮގްރާމްގެ ގޮތުގައި، ސަން ޓީވީ ގެ "ފިނިއަށި" މި އަހަރުވެސް ކުރިޔަށް ގެންދަން ނިންމައި ޕާޓްނަރުންނާ އެކު ސޮއިކޮށްފި އެވެ.
ފިނިއަށި ޕްރޮގްރާމް މި އަހަރު ވެސް ކުރިޔަށް ގެންދާނީ ކޮންމެ ދުވަހެއްގެ ވެސް ހަވީރު 4:00 އިން 5:30 އަށް ކަމަށް ސަން ޓީވީގެ އޮފިޝަލަކު ވިދާޅުވި އެވެ.
ފިނިއަށި ޕްރޮގްރާމްގެ މި އަހަރުގެ ޓައިޓަލް ސްޕޮންސަރަކީ އެމްޓީސީސީ އެވެ. ކޯ ސްޕޮންސަރުންނަކީ އެސްޓީއޯ، އެންސިސް އަދި މޯލްޑިވިއަން އެވެ. ބެވަރޭޖް ޕާޓްނަރަކީ ކޮކާ ކޯލާ އެވެ. އެސޯޝިއޭޓް ޕާޓްނަރަކީ މިފްކޯ އެވެ. މި އަހަރު ވެސް ފިނިއަށީގެ ޓެލެކޮމް ޕާޓްނަރަކީ ދިރާގު އެވެ. މި ޕާޓްނަރުންގެ ތެރެއިން އެމްޓީސީސީ ފިޔަވައި އެހެން ހުރިހާ ފަރާތްތަކަކީ މިދިޔަ އަހަރު ވެސް ފިނިއަށީގެ ޕާޓްނަރުންގެ ގޮތުގައި ތިބި ފަރާތްތަކެވެ. މިދިޔަ އަހަރު ފިނިއަށީގެ މެއިން ސްޕޮންސަރަކީ މޯލްޑިވިއަން އެވެ. މި އަހަރުގެ ފިނިއަށި ކުރިޔަށް ދާނީ "އެމްޓީސީސީ ފިނިއަށި" ގެ ނަމުގަ އެވެ.
މިދިޔަ އަހަރުގެ ފިނިއަށި ޕްރޮގްރާމުގައި ހަދިޔާ ލިބުނު ކުޑަކުއްޖަކަށް ޕްރޮގްރާމްގެ އިނާމު ޓީމު އެގެއަށް ގޮސް އިނާމު ހަވާލުކުރަނީ --- ސަން ފައިލް ފޮޓޯ
ފިނިއަށި ޕްރޮގްރާމް ފަށާފައި ވަނީ މީގެ 7 އަހަރު ކުރީން ސަން އެފްއެމް އިންނެވެ. ސަން ޓީވީ ގެ ޚިދުމަތް ފެށުމަށް ފަހު މި ޕްރޮގްރާމް ކުރިޔަށް ގެންދަނީ ސަން ޓީވީންނާއި ސަން އެފްއެމް އިން އެއް ވަގުތެއްގަ އެވެ.
މި އަހަރު ވެސް ފިނިއަށި ޕްެރޮގްރާމް ގައި ދުވަހުން ދުވަހަށް ލިބޭ ވަރަށް ގިނަ ދައުރުވާ އިނާމުތަކެއް ހިމެނޭނެ އެވެ. އޭގެ ތެރޭގައި މޯލްޑިވިއަންގެ ފަރާތުން ހުށަހަޅާފައިވާ ޓިކެޓު ތަކާއި މިފްކޯގެ ފަރާތުން ކޮންމެ ދުވަހަކު ދޭ މަސް ކޭހާއި އެސްޓީއޯގެ ފަރާތުން ދޭ ބަދިގެ އާއި ގޭތެރޭގައި ބޭނުންކުރާ އައިޓަމް ތަކާއި ބޭވަރޭޖް ޕާޓްނަރުގެ ފަރާތުން ދޭ ކޯކާއި ބޮނަކުއާ ފެން ކޭސްތައް ހިމެނިގެން ދާނެ އެވެ. އެސްޓީއޯގެ ފަރާތުން ދޭ އިނާމުތަކުގެ ތެރޭގައި މިކްސަރާއި ގްރިލާ އާއި ޓޯސްޓަރު ފަދަ އައިޓަމްތައް ހިމެނެ އެވެ. މޯލްޑިވިއަން އިން ދޭ ޓިކެޓުގެ ތެރޭގައި ޑޮމެސްޓިކް އަދި އިންޓަނޭޝަނަލް ޓިކެޓް ހިމެނެ އެވެ. މީގެ އިތުރުން އެހެން އަހަރު ތަކެކޭ އެއް ފަދައިން މި އަހަރު ވެސް ފިނިއަށި ޕްރޮގްރާމުން އެންމެ ގިނަ މާކްސް ހޯދާ ފަރާތަކަށް ފައިސާގެ އިނާމު ލިބޭނެ އެވެ.
މިދިޔަ އަހަރު ސަން ޓީވީގެ ސްޓޫޑިއޯގައި ފިނިއަށި ކުރިޔަށް ދަނީ ---- ސަން ފައިލް ފޮޓޯ
މި އަހަރުގެ ފިނި އަށި ޕްރޮގްރާމްގައި ވެސް މި ޕްރޮގްރާމްގެ މުހިންމު ހުރިހާ ބައިތަކެއް ހިމެނޭނެ ކަމަށް ޕްރޮގްރާމްގެ ޕްެރޮޑިއުސަރު ވިދާޅުވި އެވެ. އޭގެ ތެރޭގައި ދޫފުރޮޅި އާއި ސުވާލާއި ޖަވާބު ހިމެނޭނެ އެވެ. އެހެން އަހަރު ތަކުގައި ގެނެސްދޭ ލަވަ ޗާޓަށް މި އަހަރު ވަނީ ކުޑަ ބަދަލެއް ގެެނެސްފަ އެވެ. އެބައި މި ފަހަރު ގެނެސްދޭނީ "އަޑު ޗާޓު" ގެ ނަމުގަ އެވެ.
ފިނިއަށި ޕްރޮގާމް ފެށީއްސުރެ މިއަދާ ހަމައަށް އައި އިރު މި ޕްރޮގްރާމް ވެގެން ގޮސްފައި ވަނީ ރޯދަ މަހު ހަވީރު ގަޑީގައި ގެނެސްދޭ އެންމެ މަގުބޫލު ޕްެރޮގްރާމަށެވެ. އެ ގޮތުން މި ޕްރޮގްރާމްގައި ބައިވެރިވުމަށް އެދި ރާއްޖޭގެ އެކި ސަރަހައްދުތަކުން ކޮންމެ ދުވަހަކު އެތައް ސަތޭކަ ބަޔަކު ނަން ނޯޓު ކުރަމުން ގެންދެ އެވެ.