މާލޭ ހުޅަނގު ދެކުނު ފަރާތުގައި ތަރައްގީކޮށްފައިވާ ސުނާމީ ބިނާ މައިޒާނުގައި ދޯންޏަކުން ޖެހި ގެއްލުންވި މައްސަލާގައި ހައްޔަރު ކުރި އެ ދޯނީގެ ކެޕްޓަން ހުރީ މަސްތުގެ ހާލަތުގައި ކަމަށާއި އޭނާގެ އަތުގައި ކަނޑުއުޅަނދު ދުއްވުމުގެ ހުއްދައެއް ވެސް ނެތް ކަމަށް ފުލުހުން ބުނެފި އެވެ.
މިއަދު ހެނދުނު 10:30 އެހާކަންހާއިރު ހިނގި އެ ހާދިސާގައި ސުނާމީ ބިނާ މައިޒާނުގެ ވަށައިގެން ޖަހާފައިވާ ރެއިލިންއަށް ގެއްލުންތަކެއް ލިބިފައިވެ އެވެ. އެގޮތުން ރެއިލިންގެ 25 ފޫޓެއްހާ ހިސާބަށް ވަނީ ގެއްލުންވެފަ އެވެ.
ސުނާމީ ބިނާ މައިޒާނުގައި ޖެހުނު "ފްރެޝް-6" ނަމަކަށް ކިޔާ ދޯނީގެ ކެޕްޓަނާއެކު އެ ދޯނި ވެސް ވަނީ ފުލުހުންގެ ބެލުމުގެ ދަށަށް ގެނެސްފަ އެވެ.
ފުލުހުންގެ އިންފޮމޭޝަން އޮފިސަރު ޗީފް ސްޓޭޝަން އިންސްޕެކްޓަރު އިސްމާއިލް އަލީ މިރޭ ވިދާޅުވީ އެ ހާދިސާއާ ގުޅިގެން ހައްޔަރު ކުރި މީހާގެ ފަރާތުން މީގެ ކުރިން ވެސް "އެފަދަ ކަންތައްތައް" ތަކުރާރުވެފައިވާ ކަަމަށާއި އެކަންތައްތަކާ ގުޅިގެން ނަސޭހަތްތެރިވެފައިވާނެ ކަމަށެވެ.
"ހުއްދައެއް ނެތި ކަނޑުއުޅަނދު އެ ގޮތަށް ނުދުއްވުމަށް މީގެ ކުރިން ވަނީ ނަސޭހަތްތެރިވެފައި. ކޮންމެހެން އެކްސިޑެންޓާ ގުޅިގެނެއް ނޫން އޭނާ ހައްޔަރު ކުރީ. އޭނާގެ އަމަލުތައް ވެސް ހުރި ގޮތުން ހައްޔަރުކުރީ،" އިސްމާއިލް އަލީ ވިދާޅުވި އެވެ.
އެ އެކްސިޑެންޓާ ގުޅިގެން ހައްޔަރުކޮށްފައިވާ ދޯނީގެ ކެޕްޓަންގެ ވަނަވަރެއް ފުލުހުން ހާމައެއް ނުކުރެ އެވެ.
ފުލުހުންގެ އިންފޮމޭޝަން އޮފިސަރު ވިދާޅުވީ އެ އެކްސިޑެންޓާ ގުޅިގެން އޭނާ ހައްޔަރު ކުރިއިރު އޭނާ ހުރީ މަސްތުގެ ހާލަތުގައި ކަމަށެވެ. އެގޮތުން އޭނާގެ ޔޫރިން ޓެސްޓު ކުރުމުން މަސްތުވާތަކެއްޗަށް ޕޮޒިޓިވްވެފައިވާ ކަމަށް ވަގުތީ ނަތީޖާއިން ދައްކާ ކަމަށް އޭނާ ވިދާޅުވި އެވެ.
ސުނާމީ ބިނާ މައިޒާނަކީ ގާތްގަނޑަކަށް ތިން މިލިއަން ރުފިޔާ ހަރަދުކޮށްގެން ހަދާފައިވާ ތަނެކެވެ. އެތަން ހުޅުވާފައި ވަނީ މިދިޔަ މާޗް މަހުގެ 13 ވަނަ ދުވަހު ކުލަ ގަދަ ރަސްމިއްޔާތަކާ އެކުގަ އެވެ.