ރާއްޖޭގެ ގައުމީ ޓީމަށާއި ނިއުރޭޑިއަންޓަ ސްޕޯޓްސް ކްލަބަށް ކޯޗު ކޮށްދިން ބަލްގޭރިއާގެ ވެލިޒާ ޕޮޕޯފް މެލޭޝިއާ ޕްރިމިއާ ލީގްގެ ކެލަންޓަން އެފްސީއާ ހަވާލުވެއްޖެ އެވެ.
ކެލަންޓަންގެ ކޯޗު ކަމުގައި ހުރި އެ ގައުމުގެ ޑެވަން އަމިއްލަ ސަބަބުތަކަކާއި ހުރެ އިއްޔެ އިސްތިއުފާ ދިނުމާ ގުޅިގެން އެ މަގާމަށް މިއަދު ވަނީ ޕޮޕޯފް ހަމަޖައްސާފައެވެ.
މީގެ ތިން އަހަރު ކުރިން ނިއުރޭޑިއަންޓްގެ ކޯޗުގެ މަގާމާއި ހަވާލުވެ 2013 ވަނަ އަހަރުގެ ދިވެހި ލީގް، ކުޅުނު 19 މެޗު ކާމިޔާބް ކޮށް ރެކޯޑަކާ އެކު އުފުލާލާފައިވާ ޕޮޕޯފް ވަނީ، ޖެހިގެން އައި އަހަރު ނިއު ދޫކޮށް އޮމާންގެ ކުލަބަކަށް ބަދަލުވެފައެވެ.
ނިއުގެ ކާމިޔާބު ކޯޗު ޕޮޕޯވް ވަނީ މިދިޔަ އަހަރު ރާއްޖޭގެ ގައުމީ ޓީމާ ވެސް ހަވާލުވެފަ އެވެ. ނަމަވެސް އޭނާގެ އިރުޝާދުގެ ދަށުން ގައުމީ ޓީމަށް ކާމިޔާބެއް ހޯދޭގޮތެއް ނުވެ އެވެ.
މެލޭޝިއާ ލީގްގެ ހަ ވަނައިގައި 12 ޕޮއިންޓާ އެކު އޮތް ކެލަންޓަން އެފްސީއާ ޕޮޕޯވްފް ހަވާލުވި އިރު އޭނާގެ ފޭވަރިޓެއްގެ ގޮތުގައި ބުނަމުން އަންނަ ރާއްޖޭގެ ގައުމީ ޓީމްގެ ކެޕަޓަން އަލި އަޝްފާގު (ދަނގަޑޭ) ކުޅެމުން އަންނަ ޕީޑީއާރުއެމް އޮތީ ކެލަންޓަން އަށް ވުރެ އެއް ޕޮއިންޓް އިތުރަށް ލިބި ތާވަލުގެ ފަސް ވަނައިގައެވެ.