ލެސްޓާ ސިޓީއަށް އިނގިރޭސި ޕްރިމިއާ ލީގު ހޯދައިދިން ކޯޗު ކްލައުޑިއޯ ރަނިއޭރީގެ ކޮންޓްރެކްޓް އާކުރުމާ ބެހޭގޮތުން އޭނާއާ ވާހަކަދައްކާނެ ކަމަށް އެ ކްލަބުގެ ވައިސް ޗެއާމަން އައިޔަވަޓް ސްރިޔަދަނަޕްރަބާ ބުނެފި އެވެ.
ކުރީގެ ޗެމްޕިއަން ޗެލްސީ އާއި، މެންޗެސްޓާ ސިޓީ އާއި، އާސެނަލް އަދި މެންޗެސްޓާ ޔުނައިޓެޑް ފަހަތަށް ޖައްސާލުމަށްފަހު ފުރަތަމަ ފަހަރަށް އިނގިރޭސި ޕްރިމިއާ ލީގު ކާމިޔާބުކޮށް، ލެސްޓާއިން ވަނީ ފުޓްބޯޅައިގެ ތާރީހުގެ ތެރެއަށް ވަދެފަ އެވެ.
"ސީޒަން ނިމުމުން އަހަރެމެން ރަނިއޭރީގެ ކޮންޓްރެކްޓް އާކުރުމަށް އޭނާއާ ވާހަކަދައްކާނަން. އަހަރެމެން މަޝްވަރާކުރާނީ ދިގު މުއްދަތަކަށް ލެސްޓާގެ ކޯޗުކަމުގައި އޭނާ ބެހެއްޓުމަށް،" އޭނާ ބުންޏެވެ.
ދިހަ ޕޮއިންޓުގެ ފަރަގަކާއެކު މި ސީޒަނުގެ ޕްރިމިއާ ލީގު ޗެމްޕިއަނުން ކުޅޭ ފަހު މެޗުގައި އަންނަ އާދީއްތަ ދުވަހު ނުކުންނާނީ މިދިޔަ ސީޒަނުގެ ލީގު ޗެމްޕިއަން ޗެލްސީއާ ދެކޮޅަށެވެ. އެ މެޗު ކުޅުމަށް ހަމަޖެހިފައިވަނީ ޗެލްސީގެ އަމިއްލަ ދަނޑު، ސްޓެމްފަޑް ބްރިޖުގައެވެ.