ޓެރަރިޒަމްގެ ކުށުގައި 13 އަހަރުގެ ޖަލު ހުކުމެއް ތަންފީޒު ކުރަމުން އަންނަ ކުރީގެ ރައީސް މުހައްމަދު ނަޝީދުގެ މައްސަލަ އަވަހަށް ނިންމައިދިނުމަށް ސުޕްރީމް ކޯޓުގައި އެދިވަޑައިގެންނަވާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.
ލ. ގާދޫ ރައްޔިތުން ފޮނަދުއަށް ބަދަލުކޮށް ނިންމުމަށް މިރޭ ފޮނަދޫގައި ބޭއްވި ހާއްސަ ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ، ސަރުކާރުން އެކި ފަރާތްތަކާ އެކު މިހާރު ކުރެވޭ މަޝްވަރާތަކުގައިވެސް ރައީސް ނަޝީދާއި އެހެނިހެން ސިޔާސީ ކުށްވެރިންގެ މައްސަލަތައް އަވަސްކޮށްދިނުމަށް ސުޕްރީމް ކޯޓުގައި އިލްތިމާސް ކުރުމަށް އެދިފައި ވާ ކަމަށެވެ.
"މިހާރު މި ކުރެވޭ މަޝްވަރާތަކުގައިވެސް އަދި ޔޫއެންގެ ސެކްރެޓަރީ ޖެނެރަލްގެ މަންދޫބަކު ފޮނުވައިގެން ކުރެވޭ މަޝްވަރާ ތަކުގައިވެސް މިހާރު އެންމެ ބޮޑަށް އައިއްސަ އޮތް އެއް ކަމަކީ ސަރުކާރުން މަސައްކަތް ކޮށްދޭށޭ، ސުޕްރީމް ކޯޓަށް އިލްތިމާސްކޮށްގެން ރައީސް ނަޝީދާއި އަދި އެހެނިހެންވެސް ސިޔާސީ ބޭފުޅުންގެ ގޮތުގައި ކުށްވެރިވެފައި ތިއްބެވި ބޭފުޅުންގެ މައްސަލަތައް އަވަސްކޮށްދޭން،" ރައީސް ޔާމީން ވިދާޅުވި އެވެ.
ރައީސް ވިދާޅުވީ، އެ އިލްތިމާސް އެމަނިކުފާނު ނުކުރެއްވި ނަމަވެސް ނިޒާމުގެ ތެރެއިން އެކަންކަން ކުރެވިގެން ދާންޖެހޭ ކަމަށް ގަބޫލުފުޅުކުރައްވާ ކަމަށެވެ.
"މިއީ އަޅުގަނޑު ކުރާނެ އިލްތިމާސެއް. އެ އިލްތިމާސް އަޅުގަނޑު ނުކުރި ނަމަވެސް އެކަން އެގޮތަށް ވާން ވާނެ. ނިޒާމުގެ ތެރެއިން އެކަން އެހެން ވާން ވާނެ. އެއީ ޖުޑިޝަރީގެ މައްޗަށްވެސް އޮތް ވާޖިބެއް،" ރައީސް ޔާމީން ވިދާޅުވި އެވެ.
ރައީސް ވިދާޅުވީ، އަދުލު އިންސާފުގެ ދާއިރާގައި ހުރި މައްސަލަތައް ނުނިމި ލަސްވާ ކަމަށް ވާނަމަ މައްސަލަތައް އަވަސްކޮށްދެއްވުމަށް ދެންނެވުމަކީ ގާނޫނު އަސާސީން އެމަނިކުފާނަށް މަތި ކޮށްފައިވާ ޒިންމާއެއް ކަމަށެވެ.
"ވަރަށް ފަހުން އަޅުގަނޑަށް މި އިލްތިމާސް މި އައީ. އަޅުގަނޑު އެނބުރި ގޮއްސަ ސުޕްރީމް ކޯޓުގައި ދަންނަވާނަން ރައީސް ނަޝީީދުގެ މައްސަލަ ކޮންމެވެސް އެއް ގޮތަކަށް ނިންމައިދެއްވަން،" ރައީސް ޔާމީން ވިދާޅުވި އެވެ.
ރައީސް ވިދާޅުވީ، ރައީސް ނަޝީދުގެ މައްސަލަ ސުޕްރީމް ކޯޓުން ނިންމުމުން އަނެއްކާވެސް ޗާޓުކޮށް ކުރިއަށް ދާންވީ ގޮތް އިނގޭނެ ކަމަށެވެ.
"ހަމަ ދެން ތިއްބެވި ބޭފުޅުންވެސް އެ ބޭފުޅުންގެ މައްސަލަތައް އަވަހަށް ނިމިގެން ކުރިއަށް ދެވޭނީ. ކޮންމެވެސް ހިސާބަކުން މޭޒު ކައިރިއަށް އައިސް ވާހަކަ ދައްކާފަ ކޮންމެވެސް ގޮތަކަށް ސުލްހަވެރި ވެވެން ޖެހޭނެ،" ރައީސް ޔާމީން ވިދާޅުވި އެވެ.
ހަމައެއާއެކު، ދިވެހިން ބައިބައި ކުރަން މަސައްކަތް ކުރާ މީހުންނަށް އެކަން ކުރަން ޖާގަ ނުދިނުމަށްވެސް ރައީސް އެދިވަޑައިގެންނެވި އެވެ.
ރައީސް ނަޝީދު މިހާރު ހުންނެވީ އެމަނިކުފާނުގެ މައިބަދައަށް ކުރިމަތިވެފައިވާ ސީރިއަސް މައްސަލަތަކަކަށް ފަރުވާ ހޯއްދެވުމަށް ކަމަށް ވިދާޅުވެ އިނގިރޭސި ވިލާތުގައެވެ.
މިދިޔަ މަހު 17 ވަނަ ދުވަހު ވަނީ ރައީސް ނަޝީދުގެ ބޭސްފަރުވާގެ މުއްދަތު 30 ދުވަހަށް އިތުރުކޮށްފައެވެ.