ބާރުގަދަ މީހާ ބޭނުންވާ ގޮތަކަށް ހުރިހާ ކަމެއް ކާމިޔާބު ވުމަކީ ސަރުކާރުން ގަބޫލު ކުރާ އުސޫލެއް ނޫން ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ވިދާޅު ވެއްޖެ އެވެ.
ލ. ގަމު ނަރުދަމާގެ ނިޒާމު އިފްތިތާހު ކުރުމަށް މިއަދު އެ ރަށުގައި ބޭއްވި ހާއްސަ ރަސްމިއްޔާތުގައި ވާހަކަފުޅުދައްކަވަމުން ރައީސް ޔާމީން ވިދާޅުވީ، ރާއްޖޭގައި މިހާތަނަށް އައިއިރު ހައްގު ގެއްލިފައިވާ މީހަކަށް ހައްގު ލިބޭނެ ކަމުގެ ކަށަވަރު ކަމެއް ލިބިފައި ނުވާ ކަމަށެވެ.
"ފުއްލާ، ހެނދުނު އަލިވިލިގެން އަންނަ އިރު ބުނާނެ، ތިމަންނަ މިއަދު އެބަ ޖެހޭ މިތަނުގެ އެންމެ ބާރަށް ދުވާ ސިންގާއަށް ވުރެ ބާރަށް ދުވަން. އެހެން ނޫނިއްޔާ ތިމަން ފަކީރު ކާލާނޭ. ތިމަންނައަކަށް ދިރުމެއް ނެތޭ. ދިވެހިރާއްޖޭގައި މިހާ ހިސާބަށް އައި އިރު ކަންކަން ހުރީ މިގޮތަށް. އެއްވެސް ނިކަމެއްޗަކަށް އެއްވެސް ހައްގު ގެއްލިގެންދާ މީހަކަށް ހައްގެއް ލިބޭނެ ކަމުގެ ކަށަވަރު ކަމެއް ނެތް،" ރައީސް ޔާމީން ވިދާޅުވި އެވެ.
ރައީސް ވިދާޅުވީ، ބާރުގަދަ މީހާ އާއި ނިކަމެތި މީހާއަށް ވެސް އެއްތަނެއްގައި އުޅެވެން ޖެހޭނެ ކަމަށާއި ސަރުކާރުން އެކަން ކުރެވޭތޯ ބަލަމުން އަންނަ ކަމަށެވެ.
"މި ސަރުކާރުން ކޮށްދެވޭތޯ މިކުރާ މަސައްކަތަކީ ސިންގާ އާއި ފުއްލާވެސް އެއް ތަނެއްގައި އުޅެވެން ޖެހޭނެ. ހަމަ އެއްވަރުގެ ހައްގުތަކެއް ހުންނާނެ. ނިކަމެތި މީހާގެ ހައްގުތަކެއް ހުންނާނެ. ބާރުގަދަ މީހާގެވެސް ހައްގުތަކެއް ހުންނާނެ،" ރައީސް ޔާމީން ވިދާޅުވި އެވެ.
ކޮންމެ ދުވަހަކު ހެނދުނު ހޭލާއިރު ސިންގާ ހޭލާނީ ތިމަންނައަށް ވުރެ މަޑުން ދުވާ ފުއްލާއެއް ތިމަންނަ ހޯދަން އެބަޖެހޭ. މި ފުއްލާ ހޯދައިގެން ތިމަންނަ ކެއިއްޔާ ނޫނީ ތިމަންނަ ދުނިޔެއަކު ނުހުންނާނެ އޭ. އެހެންވީމާ ރޭހެއް މިއޮތީ ފެށިފައި. އަނެއްކޮޅުން ފުއްލާ، ހެނދުނު އަލިވިލިގެން އަންނަ އިރު ބުނާނެ. ތިމަންނަ މިއަދު އެބަ ޖެހޭ މިތަނުގެ އެންމެ ބާރަށް ދުވާ ސިންގާއަށް ވުރެ ބާރަށް ދުވަން. އެހެން ނޫނިއްޔާ ތިމަން ފަކީރު ކާލާނޭ. ތިމަންނައަކަށް ދިރުމެއް ނެތޭ. ދިވެހިރާއްޖޭގައި މިހާ ހިސާބަށް އައި އިރު ކަންކަން ހުރީ މިގޮތަށް. އެއްވެސް ނިކަމެއްޗަކަށް އެއްވެސް ހައްގު ގެއްލިގެންދާ މީހަކަށް ހައްގެއް ލިބޭނެ ކަމުގެ ކަށަވަރު ކަމެއް ނެތް، ރައީސް ޔާމީން
ރައީސް ވިދާޅުވީ، ބާރު ގަދަ މީހާގެ ހައްގުތަކެއް ހުރި ނަމަވެސް، އެ ހައްގުތަކެއް ދޫކޮށްލަން ޖެހޭ ހިސާބު އަންނާނެ ކަމަށެވެ.
"އެކަމަކު ބާރު ގަދަ މީހާވެސް އެ ހައްގުތައް ދޫކޮށްލަން ޖެހޭ ހިސާބު އަންނާނެ ކޯޓަށް އޭނާ ވަންނަ ހިސާބުން،" ރައީސް ޔާމީން ވިދާޅުވި އެވެ.
ހަމައެއާއެކު، މި ސަރުކާރުގައިވެސް ނިކަމެތިން އުޅޭނެ ކަމަށާއި ހުރިހާ ކަމެއް ނުފުދި ތިބި މީހުންވެސް އުޅޭނެ ކަމަށް ރައީސް ޔާމީން ވިދާޅުވި އެވެ.
"ހައްގުތައް މިހުރީ އެކި މީހުންނަށް އެކި ވަރަށް. އިހުސާސް ކުރެވެނީ ލިބޭ ކަމަށް. އެކަމަކު ގާނޫނު އަސާސީ އިން ކަށަވަރު ކޮށްދެނީ އެންމެންނަށް އެ ހައްގު އޮންނާނެ ކަމަށް. އެންމެންނަކީ ދިވެހިން ކަމުގައި ވީތީ، އަދި އެންމެންނަކީ އެއް ދަރަޖައެއްގެ ދިވެހިން ކަމުގައި ވީތީ،" ރައީސް ޔާމީން ވިދާޅުވި އެވެ.
ރައީސް ވިދާޅުވީ، ގާނޫނޫ އަސާސީގައި ބަޔާންކޮށްފައިވާ ހައްގުތައް އެންމެންނަށް ފޯރުކޮށްދެވޭތޯ ކޮންމެވެސް ބަޔަކު ކަށަވަރު ކޮށްދޭން ޖެހޭ ކަމަށެެވެ. ހަމައެހެންމެ، ރައްޔިތުން ސަރުކާރެއް ހޮވަނީ އިޖުތިމާއީ އަދާލަތެއް ގާއިމު ކުރަން ކަމަށް ވެސް ރައީސް ވިދާޅުވި އެވެ.