އަވަސް މުސްތަގުބަލެއްގެ ތެރޭގައި ލ. ގަމުގައި ފެނުގެ ނިޒާމް ގާއިމްކުރާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.
ލ. ގަމުގެ ނަރުދަމާ ނިޒާމު އިފްތިތާހު ކުރުމަށް މިއަދު އެ ރަށުގައި ބޭއްވި ހާއްސަ ރަސްމިއްޔާތުގައި ވާހަކަފުޅުދައްކަވަމުން ރައީސް ޔާމީން ވިދާޅުވީ، ގަން ފަދަ އާބާދީގެ ގޮތުން ބޮޑު ރަށެއްގައި ފެނުގެ ކަންކަންވެސް ހަމަޖެހެން ޖެހޭނެ ކަމަށެވެ.
"އިރާދަ ކުރެއްވިއްޔާ އަޅުގަނޑުމެންގެ ސަރުކާރުން މަސައްކަތް މި ކުރަނީ ފެނުގެ މައްސަލަވެސް ވީހާ އަވަހަކަށް އާބާދީ މިހާ ބޮޑު ރަށެއްގައި، 4000 ވުރެ ބޮޑު އާބާދީއެއް އުޅޭ ރަށެއްގައި މިކަންކަމަކީ ހަމަޖެހެން ވާނެ ކަންކަން. އިރާދަ ކުރެއްވިއްޔާ ވަރަށް އަވަސް މުސްތަގުބަލެއްގެ ތެރޭގައި ވަރަށް އަވަސް މުއްދަތެއްގެ ތެރޭގައި ގަމުގެ ފެނުގެ ނިޒާމު ހަމަޖެހިގެން ދާނެ،" ރައީސް ޔާމީން ވިދާޅުވި އެވެ.
ރައީސް ވިދާޅުވީ، ސަރުކާރުން ކުރަމުން ގެންދާ ނަރުދަމާ އާއި ފެން އަދި ހަކަތައިގެ މަސައްކަތްތަކުގައި ބޭރުގެ ފަރާތްތަކުގެ ދީލަތި އެހީ ވަރަށް ގިނަ ފަހަރު ލިބެމުން އަންނަ ކަމަށެވެ.
"މިސާލަކަށް މިކަހަލަ ނަރުދަމާގެ ނިޒާމެއް ދާ ކަމުގައި ވަންޏާމު މިއީ 88 މިލިއަން ރުފިޔާގެ މަޝްރޫއެއްގެ ވާހަކަ މި ދައްކަނީ. ފުވައްމުލަކުގެ ފެނާ ނަރުދަމާގެ ނިޒާމަކީ މިއަށްވުރެ މާ ބޮޑު މަޝްރޫއެއް،" ރައީސް ޔާމީން ވިދާޅުވި އެވެ.
ރައީސް ވިދާޅުވީ، ފާއިތުވި ހަތަރު ފަސް އަހަރުގެ ތެރޭގައި ދައުލަތުގެ ބަޖެޓު ދަރަނި ވެފައި އޮތް މިންވަރަށް ބަލާއިރު އެ ދަރަންނަކީ ސަރުކާރުން ފައިސާ ހޯދައިގެން ނޫން ގޮތަކަށް އަދާ ކުރެވޭނެ ދަރަންޏެއް ނޫން ކަމަށެވެ.
"އަޅުގަނޑުމެން ސަރުކާރުން ހަވާލުވީ އިރު، ވޭތުވެދިޔަ ހަތަރު ފަސް އަހަރެއްގެ ސަރުކާރުގެ ތެރޭގައި ދައުލަތުގެ ބަޖެޓު ދަރަނި ވެފައި އޮތް މިންވަރަށް ބަލާ ކަމުގައި ވަންޏާ އެ ދަރަންޏަކީ ސަރުކާރުން ފައިސާ ހޯދައިގެން އަދާ ކުރަން ޖެހޭ ދަރަނި، އެއީ ކަރުދާހުގައި ދަރަނީގެ ގޮތުގައި ނިމިގެންދާނެ ކަންކަމެއް ނޫން،" ރައީސް ޔާމީން ވިދާޅުވި އެވެ.
ރައީސް ވިދާޅުވީ، ރާއްޖެއާއި ބޭރުގެ ބޭންކުތަކުން ލޯނު ނަގައިގެން ހޭދަތަކެއް ކުރެވިފައިވާ ކަމަށެވެ.
"ގާތްގަނޑަކަށް 35000 މިލިއަން ރުފިޔާ މިއީ ރާއްޖޭގެ މިއަދުގެ އުފެއްދުންތެރިކަމުގެ ނިސްބަތަށް ބަލާ ކަމުގައި ވަންޏާ ރާއްޖެއިން ލޯނު ނުނަގައި ކުރާ މަސައްކަތްތަކުގައި ރާއްޖޭގެ އުފެއްދުންތެރިކަމަށް ލިބޭ އަދަދު ބަލާ ކަމުގައި ވަންޏާ ދެ އަހަރު ބައި ތިން އަހަރުގެ އާމްދަނީގެ ވާހަކަ މި ދައްކަނީ،" ރައީސް ޔާމީން ވިދާޅުވި އެވެ.
ހަމައެއާއެކު ބޭރު ދުނިޔެއަށް، ރާއްޖޭގެ ފަތިފުށް އޮތްގޮތް ނޫން އެހެން ގޮތަކަށް ކިޔައިދިނުމަކީ ރާއްޖެއަށް ލިބޭ އެހީ އިތުރު ވެގެންދާނެ ކަމެއް ނޫން ކަމަށްވެސް ރައީސް ވިދާޅުވި އެވެ.
ގަމުގައި މިއަދު އިފްތިތާހު ކުރި ނަރުދަމާގެ މަޝްރޫއަކީ އެޖޭންސް ފްރާންސް ޑިވެލޮޕްމަންޓް (އޭއެފްޑީ)ގެ ހިލޭ އެހީގައި މާލޭ ވޯޓާ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ) އަށް ހަވާލުކޮށްގެން 2014 ވަނަ އަހަރު ފެށި މަޝްރޫއެކެވެ.
އޭއެފްޑީގެ ހިލޭ އެހީ އާއި ސަރުކާރުގެ ބަޖެޓުން ހަރަދުކޮށްގެން ކުރިއަށް ގެންދިޔަ އެ މަޝްރޫއަށް 88.5 މިލިއަން ރުފިޔާ ހަރަދުކޮށްފައިވާ ކަމަށް އެންވަޔަރަންމަންޓް މިނިސްޓްރީން ބުނެ އެވެ.