ކޮރަޕްޝަން ހުއްޓުވުމުގެ ގޮތުން ތައާރަފުކޮށްފައިވާ "ނަޒާހަތްތެރިކަމު"ގެ ގައުމީ އިނާމަށް ކުރިމަތިލުމުގެ ފުރުސަތު ހުޅުވާލައިފި އެވެ.
އެންޓި ކޮރަޕްޝަނުން މިއަދު އާންމު ކުރި އިއުލާނެއްގައި ބުނީ އިނާމަށް ކުރިމަތިލުމުގެ ފުރުސަތު އަންނަ ނޮވެމްބަރު މަހުގެ 29 ވަނަ ދުވަހާ ހަމަ އަށް ހުޅުވާލާފައިވާ ކަމަށެވެ. އަދި އިނާމްތަކަށް ކުރިމަތިލުމަށް އެދޭ ފޯމު އޭސީސީގެ ކައުންޓަރުންނާއި ވެބްސައިޓުން ލިބެން ހުންނާނެ ކަމަށެވެ.
ނަޒާހަތްތެރިކަމުގެ ގައުމީ އިނާމަކީ ކޮރަޕްޝަން ހުއްޓުވުމާއި މަނާކުރުމާއި އަދި މީގެ އިތުރުން ނަޒާހަތްތެރިކަން ކުރިއެރުވުމަށް ހިންގާ ތަފާތު ހަރަކާތްތަކަށް ހިތްވަރުދީ ކޮރަޕްޝަންގެ އަމަލުތަކާ ދެކޮޅު ހެދުމަށް މުއައްސަސާތަކާއި ފަރުދުން ގުޅިގެން މަސައްކަތް ކުރުމަށް ހިތްވަރު ދިނުމުގެ މަގްސަދުގައި 2014 ވަނަ އަހަރު ތައާރަފުކޮށްފައިވާ އިނާމެކެވެ.
މި އަހަރުގެ ގައުމީ އެންޓި ކޮރަޕްޝަން ދުވަހު އޭސީސީ އިން ވަނީ ބަދަލުތަކަކާ އެކު އެ އިނާމު ލޯންޗުކޮށްފަ އެވެ. މި އަހަރު ތަފާތު ފަސް އިނާމެއް ދިނުމަށް ވަނީ ނިންމައިފަ އެވެ.
އެގޮތުން ދައުލަތުގެ އިދާރާތަކަށާއި ކުންފުނިތަކަށާއި މަދަނީ ޖަމިއްޔާތަކަށާއި މީޑިއާތަކަށް އަދި ވަކިވަކި ފަރުދުންނަށް ވެސް މި އަހަރު ނަޒާހަތްތެރިކަމުގެ ގައުމީ އިނާމު ދިނުމަށް ވަނީ ނިންމައިފަ އެވެ.
އިނާމާ ގުޅޭ ތަފްސީލު އަދި އިނާމަށް ހޮވުމުގައި ބަލާނެ މައިގަނޑު ބައިތަކާއި އިނާމަށް ކުރިމަތިލުމުގެ ޝަރުތުތައް ހިމެނޭ ގައިޑްލައިން މިހާރު ވަނީ އެންޓި-ކޮރަޕްޝަން ކޮމިޝަންގެ ވެބްސައިޓްގައި ޝާއިއު ކޮށްފަ އެވެ.