ކޮރަޕްޝަނުގެ ހިރާސް ވަޒަންކުރުމަށް ހާއްސަކުރެވިފައިވާ ޕްލެޓްފޯމް "ހިންމި" މިއަދު ތައާރަފް ކޮށްފިއެވެ.
މި ޕްލެޓްފޯމް އިފްތިތާޙް ކޮށްދެއްވީ އުމަރު ޒާހިރު އޮފީސް ބިލްޑިންގައި މިކަމަށްޓަކައި ހާއްސަކޮށްގެން ބޭއްވުނު ރަސްމިއްޔާތެއްގައި ނައިބު ރައީސް ޙުސައިން މުޙައްމަދު ލަޠީފެވެ.
އިދާރާއެއްގެ ތެރޭގައި ކޮރަޕްޝަނަށް ހުރި ހިރާސްތައް ދެނެގަނެ އެ ފުރުސަތުތައް ނައްތާލުމަށް މަސައްކަތްކުރެވޭނެ ގޮތުގެ މަގުދައްކައިދޭ ޓޫލްކިޓް ހިމެނޭ މި ޕްލެޓްފޯމްގެ މަޤްޞަދަކީ، ދައުލަތުގެ އިދާރާތަކުން ރައްޔިތުންނަށް ފޯރުކޮށްދޭ ޚިދުމަތްތަކުގައި ދެފުށްފެނުމާއި، ޖަވާބުދާރީ ކުރުވުމުގެ ސިފަތައް އަށަގެންނެވުމަށް ބާރުއެޅުމެވެ.
ކޮރަޕްޝަންގެ ހިރާސް އިދާރާތަކުގައި އޮތް މިންވަރު އެ އިދާރާއަކުން އަމިއްލައަށް ދެނެގަނެ ވަޒަންކުރުމަށް ބޭނުންވާނެ މަޢުލޫމާތާއި އެފަދަ އެސެސްމެންޓެއް ހިންގުމުގައި ޢަމަލުކުރަންޖެހޭ ގޮތުގެ އިރުޝާދާއި ލަފާ މި ޕްލެޓްފޯމްގައި ހިމަނާފައި ވާނެއެވެ.
"ހިންމި" ޕްލެޓްފޯމް މެދުވެރިކޮށް އިދާރާތަކުން ފުރިހަމަކުރާ ކަންކަމުގައި ހިމަނައި މަޢުލޫމާތުގެ ސިއްރުކަން
ހިފަހައްޓަން ވަކި ލޮގްއިންއަކުން އިދާރާތައް ރަޖިސްޓްރީކުރެވޭނެއެވެ.
އެސެސްމެންޓް ފުރިހަމަކުރުމުން، ހުށަހަޅާފައިވާ މަޢުލޫމާތުގެ ޞައްހަކަން ކަށަވަރުކޮށް، އިދާރާތަކަށްދޭ ޖުމްލަ މާކުސް އާއި އިދާރާތަކުގައި ކޮރަޕްޝަންގެ ހިރާސްގެ އެންމެ ބޮޑު ދާއިރާތަކަކީ ކޮބައިކަން ބެލޭނެއެވެ.
މި ޕްލެޓްފޯމް މެދުވެރިކޮށް ކޮރަޕްޝަންގެ ހިރާސް ދެނެގަތުމަށް ހަދާ އެސެސްމެންޓަށް ބޭނުންވާ ފަންނީ އެހީތެރިކަން ކޮމިޝަނުން ފޯރުކޮށްދިނުމަށް ހަމަޖެހިފައި ވާކަމަށް އެ ކޮމިޝަނުން ވަނީ ބުނެފައެވެ. އަދި މީގެއިތުރުން ދައުލަތުގެ އިދާރާތަކުން އެ ބަޔަކު ތިބި ތަނެއްގައި ތިބެގެން އަމިއްލައަށް އެބައެއްގެ ހިންގުމުގެ ނިޒާމުގައި ހުރި ކޮރަޕްޝަން ގެ ހިރާސް ދެނެގަނެ ރަނގަޅު ކުރަންވީ ކަންކަން ވެސް ބަލާލެވޭނެއެވެ.
މީގެއިތުރުން، ހިރާސް ކުޑަ ކުރުމަށް އޮޓޯ ޖެނެރޭޓްކުރާ މޮނިޓަރިން އަދި އިވެލުއޭޝަން ޕްލޭން ތަންފީޒުކުރުމުގެ އެހީތެރިކަން ފޯރުކޮށްދެވޭނެ ކަމަށް ވެސް ކޮމިޝަނުން ވަނީ ބުނެފައެވެ.
މި ޑިޖިޓަލް ޕްލްޓްފޯމް ތައާރަފްކުރުމުން، ސަރުކާރު އިދާރާތަކުގެ ހިންގުމުގެ ނިޒާމުގައި ހުންނަ ކޮރަޕްޝަންގެ ހިރާސް ދެނެގަތުމަށް ޚާއްސަކުރެވޭ ކޮރަޕްޝަން ރިސްކް އެސެސްމެންޓް ޓޫލްތައް "ހިންމި ޕްލެޓްފޯމް"އާ ގުޅާލާ، ކުންފުނިތަކުގެ ކޯޕަރޭޓް ގަވަނެންސް އަދި އިންޓެގްރިޓީ ހަރުދަނާ ކުރުމަށް މަސައްކަތް ފަށާނެއެވެ.