ކޯސްޓްލައިން ހާޑްވެއާގައި ހިނގި އަލިފާނުގެ ހާދިސާގައި ގެއްލުން ލިބުނު ފަރާތްތަކަށް އެހީގެ ގޮތުގައި ސަރުކާރުން 2.6 މިލިއަން ރުފިޔާގެ ނަގުދު ފައިސާ ދިނުމަށް ނިންމާފައިވާ ކަމަށާއި އެ ފައިސާ ހުކުރު ދުވަހު ދޫކުރަން ފަށާނެ ކަމަށް ޑިފެންސް މިނިސްޓަރު އާދަމް ޝަރީފް އުމަރު މިއަދު ވިދާޅުވެއްޖެ އެވެ.
މިނިސްޓަރު ވިދާޅުވީ، އަލިފާނުގެ ހާދިސާއާ ގުޅިގެން ގޯތި ގެދޮރާއި، ގޭގޭގައި ހިފައި ގެންގުޅޭ ސާމާނަށް ލިބިފައިވާ ގެއްލުންތައް ސަރުކާރުން ބަލާފައިވާ ކަމަށެވެ. އަދި ގެއްލުމުގެ ޖުމްލަ އަދަދުގެ 40 ޕަސަންޓުގެ ފައިސާ ސަރުކާރުން ދޭން ނިންމާފައިވާ ކަމަށާއި އެގޮތުން ޖުމްލަކޮށް 2.6 މިލިޔަން ރުފިޔާ ޚަރަދު ކުރައްވާނެ ކަމަށް މިނިސްޓަރު ވިދާޅުވި އެވެ.
ސަރުކާރުން ދޭ 2.6 މިލިޔަން ރުފިޔާގެ އިތުރަށް ކޯސްޓްލައިނުން ވަނީ އެއް މިލިޔަން ރުފިޔާ ވެސް ދީފަ އެވެ. އޭގެ އިތުރުން، އަމިއްލަ ފަރާތަކުން 3،000 ރުފިޔާ ވެސް ބެހުމަށް ހަދިޔާ ކޮށްފައިވާ ކަމަށް ޑިފެންސް މިނިސްޓަރު ވިދާޅުވި އެވެ.
"ގެއްލުމުގެ 40 ޕަސެންޓް ދޭ ގޮތަށް ސަރުކާރުން ނިންމީ. ލިބުނު ގެއްލުމުގައި 2.6 މިލިޔަން ރުފިޔާގެ އެހީ ސަރުކާރުން ފޯރުކޮށްދޭނެ. މީގެ އިތުރުން، ކޯސްޓްލައިނުން ދީފައިވާ އެއް މިލިޔަން ރުފިޔާ ވެސް ޕްރޮޕޯޝަނަލީ ބެހިގެން ދާނެ،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ގެއްލުމުގެ ބަދަލުގައި ސަރުކާރުން ދޭން ހަމަޖައްސާފައިވާ އެހީ، ނަގުދު ފައިސާ އިން ހުކުރު ދުވަހު ދޭނެ ކަމަށެވެ.
"މަސައްކަތް ކުރަމުން މި ދަނީ، ލަސްވެެން ހުކުރު ދުވަހުގެ ހަވީރު ނުވަތަ އެ ރޭ، މި ފަރާތްތަކަށް ލިބެން ޖެހޭ ސީދާ ނަގުދު ފައިސާ ހަބާލު ކުރުމުގެ މަސައްކަތް ކުރިޔަށް ގެންދެވޭތޯ. އެކަމަށް ޓަކައި ކުރަން ޖެހޭ އިދާރީ މަސައްކަތްތައް މިހާރު ކުރަމުން މި ދަނީ. މިސާލަކަށް، އިމާރާތަށް ލިބުނު ގެއްލުން ހަވާލު ކުރަންޖެހޭ މީހާ ކަށަވަރު ކުރުން ފަދަ ކަންކަން މި ކުރަނީ،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، މިހާރު ސަރުކާރުގެ ބެލުމުގެ ދަށުގައި 47 މީހަކު ވަގުތީ ގޮތުން ގެސްޓްހައުސްތަކުގައި ބައިތިއްބާފައިވާ ކަމަށާއި، އެ ހުރިހާ އެންމެންގެ ހުރުމާއި ކެއިން ބުއިމުގެ ޚަރަދުގެ ގޮތުގައި ދުވާލަކު 50،000 ރުފިޔާ އަށް ވުރެ ގިނަ އަދަދެއް ޚަރަދު ކުރަން ޖެހޭ ކަމަށެވެ.
ނޭޝަނަލް ޑިޒާސްޓާ މެނޭޖްމެންޓް ސެންޓަރު ހިންގެވުމާ ހަވާލުވެ ހުންނެވި، ޑިފެންސް މިނިސްޓްރީގެ ޑެޕިއުޓީ މިނިސްޓަރު ފާތިމަތި ތަސްނީމު ވިދާޅުވީ، އެ ހާދިސާގައި އަވަށްޓެރި ގެތަކަށް މާ ބޮޑު ގެއްލުމެއް ނުލިބުނު ނަމަވެސް ބައެއް މީހުންނަށް ބޯހިޔާވަހިކަމާއި ކެއިން ބުއިން ސަރުކާރުން ފޯރުކޮށްދެމުން އަންނަ ކަމަށެވެ. އަދި ވިދާޅުވީ ސަރުކާރުން އެހީ ފޯރުކޮށްދޭ 47 މީހުންގެ ތެރެއިން 35 މީހަކަށް އަނބުރާ އެ މީސްމީހުންގެ ގެއަށް ވަރަށް އަވަހަށް ބަދަލުވެވޭނެ ކަމަށެވެ.
ތަސްނީމް ވިދާޅުވީ، ގެއްލުން ލިބުނު ފަރާތްތަކަށް ފައިސާ ބެހުމުގައި ބަލަނީ ގޭބިސީތަކަށް ކަމަށާއި އެގޮތުން 30 ގޭބިސީއަކަށް ފައިސާ ބެހެވިގެން ދާނެ ކަމަށް އޭނާ ވިދާޅުވި އެވެ. އަދި އެ ފައިސާ ބެހުމުގައި، ޑިޒާސްޓާ މެނޭޖްމެންޓުން ކަނޑައަޅާފައިވާ އަސާސީ ބައެއް ތަކެތީގެ ފުރިހަމަ އަގު ވެސް، ދެވޭ އެހީގައި ހިމެނޭނެ ކަމަށް ތަސްނީމް ވިދާޅުވި އެވެ.