ދިވެހީންގެ އެކުވެރިކަމާއި އެއްބައިވަންތަކަމުގެ މައިގަނޑު އެއް އަސާސް ކަމުގައިވާ ދިވެހިބަސް، ދިވެހީންގެ އެއްބައިވަންތަކަމަށް ޓަކައި ރައްކާތެރިކޮށް ކުރިއަރުވައި ތަރައްގީކުރަން ޖެހޭ ކަމަށް ދިވެހި ބަހުގެ އެކަޑަމީގެ ރައީސް އަޝްރަފް އަލީ ވިދާޅުވެއްޖެ އެވެ.
މިއަދު ފާހަގަކުރަމުންދާ ދިވެހި ބަހުގެ ދުވަހުގެ ޝިއާރުގެ ގޮތުގައި ކަނޑައަޅާފައި ވަނީ "ގައުމީ އެއްބައިވަންތަކަމަށް ޓަކައި- އެންމެންގެ ސަމާލުކަން ދިވެހިބަހަށް" އެވެ.
ޝިއާރުގެ ފާހަގަކުރައްވާ މިއަދުގެ މުނާސަބަތާ ގުޅިގެން ދެއްވި މެސެޖުގައި އަޝްރަފް ވިދާޅުވީ، ދިވެހިބަހަށް އަދު އެތެރެއިންނާއި ބޭރުން ކުރިމަތިވަމުން އަންނަ ދަތިތަކާއި ތުރާތަކުން ދިވެހިބަސް މިންޖުކޮށް ހިމާޔަތް ކުރަން ޖެހޭ ކަމަށެވެ.
އޭނާ ވިދާޅުވީ، އިޖުތިމާއީ ކޮންމެ ކަމެއްގައި އެކަކު ވެސް ބާކީ ނުކޮށް އެންމެން ހިމެނޭނީ އެކަމެއްގައި އެ ބައެއްގެ މާދަރީބަހުން މުއާމަލާތުކޮށްގެން ކަމަށެވެ.
އެގޮތުން، ރާއްޖޭގެ ގައުމީ އެއްބައިވަންތަކަން ނަގަހައްޓައި ކުރިއަރުވައި ދެމެހެއްޓުމަކީ ކޮންމެ ދިވެހި ފަރުދެއްގެ ގައުމީ ވާޖިބަކަށްވާ އިރު، އެ ވާޖިބު އަދާކުރުމުގައި ދިވެހިބަހަށް ސަމާލުކަން ދޭން ޖެހޭ ކަމަށް އަޝްރަފްގެ މެސެޖުގައި ވިދާޅުވެފައިވެ އެވެ.
އޭނާ ވިދާޅުވީ، އެކަން ކުރެވޭނީ އެންމެން ދިވެހިބަހަށް ސަމާލުކަންދީ، ސްކޫލްތަކުގައި ދިވެހި ބަސް ކިޔަވައި ދިނުމުގައި ދަރިވަރުންގެ ހިތުގައި ދިވެހިބަހަށް އޮންނަ ޝައުގުވެރިކަން ބޮޑުވާނޭހެން ކިޔަވައިދިނުމުގެ އިތުރަށް ދިވެހިވަންތަކަން ދަރިވަރުންގެ ކިބައިގައި އަށަގެންނެވުމުގައި ކުރާ މަސައްކަތްތަކުގައި ވެސް ދިވެހިބަހުން މުއާމަލާތްކުރުމަށާއި ދަރިވަރުންނަށް ސްކޫލް މާހައުލުގައި ދިވެހިބަހުން މުއާމަލާތުކުރެވޭނޭ އިތުރު ފުރުސަތުތައް ފަހިކޮށްދީގެން ކަމަށެވެ.
ދިވެހި ބަހުގެ ދުވަސް ފާހަގަކުރަމުން އަންނަނީ ކޮންމެ އަހަރެއްގެ އޭޕްރިލް މަހުގެ 14 ވަނަ ދުވަހު އެވެ. އެ ދުވަސް ނިސްބަތް ވެގެންވަނީ ދިވެހި އަދަބީ އުދަރެހުން އެރި "ފަތިހުގެ ތަރި" ނުވަތަ ރާއްޖެ އުފެއްދި އެންމެ ކުޅަދާނަ، އަދި އެންމެ އުފެއްދުންތެރި އަދީބު އަދި ދިވެހި އަދީބުންގެ އުސްތާޒު ހުސައިން ޞަލާހުއްދީނަށެވެ.
އަބްދުﷲ ޖަލާލުއްދީނާއި ސުމުއްވުލްއަމީރު މުހައްމަދު އަމީން ދޮށިމޭނާ ކިލެގެފާނާއި، އަހުމަދު ކާމިލް ދީދީ އާއި އައްސައްޔިދު ބޮޑުފެންވަޅުގޭ ސީދީ އާއި އައްސައްޔިދު އަބުދުލް ޤައްޔޫމު ދޮންސީދީ އާއި އައްނަބީލު މަލިން މުޙައްމަދު ދީދީ އާއި މަލިން މޫސާ މާފަތްކަލޭފާން އަދި މުހައްމަދު ޖަމީލުދީދީގެ ދިވެހި އުސްތާޒަކީ ވެސް ޞަލާހުއްދީނެވެ.