ނައިބް ރައީސަކު ހުންނަން ޖެހޭ ކަމަށް، ރޭ ސަން ޓީވީގައި ބޭއްވި "ސަން ބަހުސު" ޓީވީ ޝޯގައި ބައިވެރިވި، އެމްޑީޕީ އާއި ޕީޕީއެމްގެ މެމްބަރުން އެއްބަސް ވެއްޖެ އެވެ.
"ސަން ބަހުސް" ޕްރޮގުރާމްގެ މައުޟޫއާ ގުޅޭ ގޮތުން ވާހަކަ ދައްކަވަމުން، ޕްރޮގުރާމްގައި ބައިވެރިވަޑައިގެންނެވި ޕީޕީއެމް ޕާލިމެންޓަރީ ގުރޫޕްގެ އަދި މާފަންނު މެދު ދާއިރާ މެމްބަރު އަސްމާ ރަޝީދާއި އެމްޑީޕީ ޕާލިމެންޓަރީ ގުރޫޕްގެ އަދި މަރަދޫ ދާއިރާ މެމްބަރު އިބްރާހިމް ޝަރީފުގެ އިތުރުން އެމްޑީޕީ ޕާލިމެންޓްރީ ގުރޫޕްގެ އަދި ހެންވޭރު ދެކުނު ދާއިރާ މެމްބަރު މުހައްމަދު އަބްދުލް ކަރީމް، ތިން ބޭފުޅުން ވެސް ވަނީ ނައިބު ރައީސަކު ބަހައްޓަން ފެނިވަޑައިގަންނަވާ ކަމަށް އެއްބަސްވެވަޑައިގެންފަ އެވެ.
ޕީޕީއެމް ޕާލިމެންޓަރީ ގުރޫޕްގެ އަދި މާފަންނު މެދު ދާއިރާ މެމްބަރު އަސްމާ ރަޝީދު ވިދާޅުވީ، ނައިބު ރައީސެއް ނެތް ކަމުގައި ވަނީ ނަމަ އިދިކޮޅު ފަރާތްތަކުގެ އުއްމީދުތަކެއް ބޮޑުވެގެންދާނެ ކަމަށެވެ.
"އަޅުގަނޑު ދަންނަވާލަން އޮތީ ނައިބު ރައީސެއް ހުންނަން އެބަ ޖެހޭ. އެއީ ސަބަބަކީ ގައުމެއްގެ ރައީސަކީ 24 ގަޑިއިރު 365 ދުވަހު މަސައްކަތް ކުރައްވާ ބޭފުޅަކަށް ވެފައި އަނެއްކާ ގުދުރަތީ ކަމެއް ދިމާވެގެން ވެސް... އުޒުރުވެރިވެ ވަޑައިގަންނަވާ ހާލަތެއްގައި" އެ މަގާމުގައި ބޭފުޅަކު ހުންނަން ޖެހޭތީ ކަމަށް މެމްބަރު އަސްމާ ވިދާޅުވި އެވެ.
އެ ޝޯވްގައި ވާހަކަ ދައްކަވަމުން އެމްޑީޕީ ޕާލިމެންޓަރީ ގްރޫޕްގެ އަދި މަރަދޫ ދާއިރާ މެމްބަރު އިބްރާހިމް ޝަރީފު ވިދާޅުވީ، ގައުމެއްގެ ނައިބު ރައީސަކު ހުންނަން ޖެހޭތޯ ނުވަތަ ނޫންތޯ ކުރެވޭ ސުވާލަކީ ހަގީގަތުގައި ކުރެވެން ވެސް ޖެހޭ ބަހުސެއް ނޫން ކަމަށެވެ.
"ދިވެހިރާއްޖޭގެ ގާނޫނު އަސާސީގައި މިހާރު ކަނޑައެޅި ބަޔާންކޮށްފައި މި އޮތީ ރާއްޖޭގެ ނައިބު ރައީސަކު ހުންނަން ވާނެ ކަމަށް،" ޝަރީފު ވިދާޅުވި އެވެ.
ޝޯވްގައި އެމްޑީޕީ ޕާލިމެންޓްރީ ގުރޫޕްގެ އަދި ހެންވޭރު ދެކުނު ދާއިރާ މެމްބަރު މުހައްމަދު އަބްދުލް ކަރީމް އަށް އެރުވި ފުރުސަތުގައި ވާހަކަ ދައްކަވަމުން އޭނާ ވިދާޅުވީ، ގައުމުގައި ނައިބު ރައީސެއް ހުރުމަކީ މިހާރު ބަލައިގަނެގެން އުޅޭ ރިޔާސީ ނިޒާމުގެ އެންމެ މައިގަނޑު އެއް އަސާސު ކަމަށެވެ.
"އަޅުގޑުމެން އެންމެން ބަލައިގަނެގެން މި އުޅޭ ގާނޫނު އަސާސީގައި ވަރަށް ސާފުކޮށް އެބަ އޮތް ފާހަގަ ކޮށްފައި. އެހެންވީމާ ރާއްޖޭގައި ނައިބު ރައީސަކު ހުންނަން ޖެހޭ،" މެމްބަރު އަބްދުލް ކަރީމް ވިދާޅުވި އެވެ.
ނައިބު ރައީސަކު މުހިއްމު ނަމަ މުހިއްމު ވަނީ ކީއްވެގެންތޯ މެމްބަރު އަސްމާ އާ ސުވާލު ކުރުމުން ވިދާޅުވީ، ނައިބު ރައީސަކު ހޯދަން ޖެހެނީ ރައީސަކަށް ހުންނަ ބޭފުޅަކަށް އެހީތެރުވުމުގެ ގޮތުން ކަމަށެވެ.
"އެއީ ކަންނޭނގެ އިހަށް ދުވަހު ވެސް އެ ވިދާޅުވި އެއްޗަކީ. ތިމަންނަޔަށް އެހީތެރިވާ ކަހަލަ ބޭފުޅަކު އަދި ފެނިވަޑައި ނުގަންނަވަނީ އޭ. އެހެންވީމަ އެކަހަލަ ބޭފުޅަކު ހޯއްދަވާފައި އެއްވެސް ޅައެއްޗެއް ނާޅުއްވަން ކަންނޭގެ އެހެން އެ ވިދާޅުވަނީ،" އަސްމާ ވިދާޅުވި އެވެ.
ޝަރީފު ވިދާޅުވީ، ރައީސްގެ މަގާމުގައި ހުންނަވާ ބޭފުޅަކު އެއްވެސް ސަބަބަކާ ހުރެ މަސްއޫލިއްޔަތު އަދާ ކުރުމަށް އުޒުރުވެރިވާ ހާލަތެއްގައި އެ މަސްއޫލިއްޔަތާ ވަގުތީ އަދި ދާއިމީ ގޮތުން ވެސް ހަވާލުވެވަޑައިގަންނަވާނީ ނައިބު ރައީސް އަކަށް ހުންނަވާ ބޭފުޅެއް ކަމަށެވެ.
"މީގެ އަސްލު ބޭނުމަކީ ދައުރުގެ މެދުތެރެއިން އިންތިހާބެއް ނުބާއްވާ ރައީސުލްޖުމްހޫރިއްޔާ މަގާމުން މަސްއޫލިއްޔަތު އަދާ ކުރުމަށް އުޒުރުވެރިވެއްޖެ ނަމަ ނުވަތަ އިސްތިއުފާ ދެއްވައިފި ނަމަ ނުވަތަ އަވަހާރަވެއްޖެ ނަމަ... އެ މަގާމުގެ ބާކީ އޮތް ތަނުގައި ރައީސްގެ މަގާމާއި ހަވާލުވެވަޑައިގަންނަވާ ބޭފުޅަކު ގާނޫނީ ހަމަތަކުގެ މަތިން ހުރުން،" މެމްބަރު އިބްރާހިމް ޝަރީފު ވިދާޅުވި އެވެ.
ހެންވޭރު ދެކުނު ދާއިރާ މެމްބަރު މުހައްމަދު އަބްދުލް ކަރީމް ވިދާޅުވީ، ރައީސްގެ މަގާމުގައި ހުންނަވާ ބޭފުޅަކު ރަށުން ބޭރަށް ދާ ނަމަ އެގްޒެކެޓިވް ބާރު ހަވާލު ކުރަން ޖެހޭ ކަމަށެވެ.
"ނައިބު ރައީސަކު ނެތީސް އަޅުގަނޑުމެންނަށް ފެނިއްޖެ ހައެއްކަ ފަހަރު ބޭރަށް ފުރައިގެން ދިޔަ ތަން...މި ވީހާ ތަނަށް ނައިބު ރައީސުންގެ ވާހަކަ ދައްކާއިރު ފާއިތުވި ދެ އަހަރަކީ ރައީސުލްޖުމްހޫރިއްޔާ އަކު އެންމެ ގިނައިން ގައުމުން ބޭރަށް ދިޔަ ދެ އަހަރު ކަމަށް ފާހަގަ ކުރެވިދާނެ،" އަބްދުލް ކަރީމް ވިދާޅުވި އެވެ.
ރޭގެ ޝޯވްގައި ބައިވެރިވިވަޑައިގެންނެވި ތިން ބޭފުޅުން ވެސް ވަނީ ނައިބު ރައީސަކު ހުންނަން ޖެހޭނެ ކަމުގެ ގިނަ ސަބަބުތަކެއްގެ ހެކި ދައްކަވައިފަ އެވެ.