ބާކޫ (އޭޕްރިލް 3): އާމީނިއާ އާއި އަޒަރުބައިޖާނުގެ އަސްކަރިއްޔާގެ ދެމެދުގައި އިއްޔެ ހިނގި ހަމަލާ ބަދަލު ކުރުންތަކުގައި 30 ސިފައިން މަރުވެއްޖެ އެވެ.
ދެ ގައުމުގެ ސިފައިންގެ ދެމެދުގައި ހަމަނުޖެހުންތައް ހިނގާފައި ވަނީ މިލްކުވެރި ކަމާމެދު ދެގައުމުން ހިލާފުވާ ނަގޯރޮނޮކަރަބާޚް ސަރަހައްދުގަ އެވެ.
އާމީނިއާއިން ބުނި ގޮތުގައި ހަމަލާތަކުގައި އެގައުމުގެ 18 ސިފައިން މަރުވި އެވެ. އެއީ އާމީނިއާގެ ސިފައިންނަށް ފާއިތުވި 20 އަހަރުތަކުގެ ތެރޭގައި ދިން އެންމެ ވަރުގަދަ ހަމަލާކަމަށް އެގައުމުން ބުންޏެވެ.
އަޒަރުބައިޖާނުން ވަނީ އެގައުމުގެ 12 ފައުޖީން މަރުވެފައިވާ ކަމަށް ބުނެފަ އެވެ. ދެގައުމުންވެސް އާއްމުން މަރުވި ކަމުގެ ހަބަރު ވަނީ ފެތުރިފަ އެވެ.
އާމީނިއާގެ ސަރުކާރުން ބުނި ގޮތުގައި އަޒަރުބައިޖާނުން ވަނީ ޓޭންކާއި، ބަރު ހަތިޔާރާއި ހެލިކޮޕްޓަރު ބޭނުންކޮށްގެން "ވަރަށް ވަރުގަދަ ހަމަލާއެއް" ދީފަ އެވެ.
ނަގުރޮނޮކަރަބާޚް ސަރަހައްދާ ގުޅިގެން ދެގައުމުގެ ދެމެދުގައި ތަޅާފޮޅުންތައް ފުރަތަމަ ފެށުނީ 1980ގެ އަހަރުތަކުގަ އެވެ. އަދި 1991ގައި ސޯވިއެޓް ޔޫނިއަން އުވިގެން ދިޔުމުން ވަރުގަދަ ހަނގުރާމައެއް ފެށި، އެހަނގުރާމައިގައި 30،000 ވަރަކަށް މީހުން މަރުވި އެވެ. އާމީނިއާގެ އަސްކަރިއްޔާއާއި މާލީ އެހީ ބޭނުންކޮށްގެން ނަގުރޮނޮކަރަބާޚްގައި ދިރިއުޅޭ ރައްޔިތުން އެސަރަހައްދު ހިންގަނީ ވަކި ދައުލަތެއްގެ ގޮތުގަ އެވެ.
ދެގައުމުން ހަމަލާ ދިނުން ހުއްޓާލުމަށް އެއްބަސްވީ 1994ގަ އެވެ. ނަމަވެސް، ދެގައުމުގެ ދެމެދުގައި ތަޅާފޮޅުންތައް ހިނގުމަކީ އާއްމު ކަމެކެވެ. (ބީބީސީ)