ޔެރެވަން (ޑިސެމްބަރު 10): އަރުމޭނިއާގައި އިއްޔެ ބޭއްވި މަޖިލިސް އިންތިހާބު އެގައުމުގެ ބޮޑުވަޒީރު ނިކޯލް ޕަޝްނިޔަންގެ 'މައި ސްޓެޕް އެލަޔަންސް' އިން ކާމިޔާބުކޮށްފި އެވެ.
ޕަޝްނިޔަންގެ ސިވިލް ކޮންޓްރެކްޓް ޕާޓީ ހިމެނޭ އެއެލަޔަންސުން ވަނީ 70.4 ޕަސެންޓު ވޯޓު ކާމިޔާބުކޮށްފައި ކަމަށް އެގައުމުގެ ސެންޓްރަލް އިލެކްޝަން ކޮމިޝަން (ސީއީސީ)އިން ބުންޏެވެ.
އެވޯޓުގައި ބައިވެރިވުމުގެ ހައްގު ލިބިފައިވާ މީހުންގެ އަދަދު 2.6 މިލިއަނަށް އެރި ނަމަވެސް ވޯޓުލާފައި ވަނީ އޭގެ ތެރެއިން 49 ޕަސެންޓު މީހުންނެވެ.
މީގެ ކުރިން ނޫސްވެރިއެއްގެ ގޮތުގައި މަސައްކަތް ކުރެއްވި ޕަޝްނިޔަން ވަނީ އެގައުމުގެ ޕާލިމެންޓުގެ މެމްބަރުކަން ހަ އަހަރު ވަންދެން ކުރައްވާފަ އެވެ.
އަދި މިދިޔަ މެއި މަހު ޕަޝްނިޔަން އަރުމޭނިއާގެ ވެރިކަމަށް ވަޑައިގެންނެވީ އެގައުމުގައި ކޮރަޕްޝަނާ ދެކޮޅަށް އެތައް ހާސް މީހުން ސިލްސިލާ މުޒާހަރާތަކެއް ކުރި ފަހުންނެވެ. އެމުޒާހަރާތަކުގައި ގައުމުގެ ސިފައިން ބައިވެރިވުމުން ކުރީގެ ބޮޑުވަޒީރު ސަރްޒް ސަގްސަޔަން އިސްތިއުފާ ދެއްވި އެވެ.
މިދިޔަ އޭޕްރިލް މަހު ސަގްސަޔަން ބޮޑުވަޒީރު ކަމަށް އައްޔަން ކުރީ ގައުމުގެ ރައީސްކަން ކުރައްވާތާ 10 އަހަރު ފަހުންނެވެ. އަދި ގައުމު ހިންގުމުގެ ބާރުތައް ބޮޑުވަޒީރަށް ލިބޭ ގޮތަށް 2015 ވަނަ އަހަރު ގާނޫނު އަސާސީ ބަދަލު ކުރި ފަހުންނެވެ.