މޯބައިލް ފޯނުގެ ނަންބަރު ބަދަލުނުކޮށް، ޚިދުމަތް ހޯދާ ނެޓްވޯކް ބަދަލުކުރެވޭ ހިދުމަތް ދިރާގާއި އުރީދޫ އިން ދޭން ފަށައިފި އެވެ.
"ނަމްބަރު ޕޯޓެބިލިޓީ"ގެ ހިދުމަތުގެ ސަބަބުން ދިރާގު ފޯން ނަމްބަރެއް ބޭނުން ކުރާ މީހަކު ދިރާގު ދޫކޮށް، އުރީދޫގެ ނެޓްވޯކަށް ބަދަލުވެވޭނެ އެވެ. އަދި އުރީދޫ ފޯން ނަމްބަރެއް ގެންގުޅޭ މީހަކަށް އުރީދޫ ދޫކޮށް، ދިރާގުގެ ނެޓްވޯކަށް ބަދަލުވެވޭނެ އެވެ.
ދިރާގުގެ ޕަބްލިކް ރިލޭޝަންސް މެނޭޖަރު އިމްޖާދު ޖަލީލު ވިދާޅުވީ، މިއަދުން ފެށިގެން އެ ހިދުމަތް ދިރާގުގެ ހުރިހާ ސެންޓަރުތަކަކުން ލިބިގެންދާނެ ކަމަށެވެ. އަތޮޅުތެރޭ އޮަޕަރޭޓް ސެންޓަރުތަކުންނާއި ޕާޓްނަރު ފިހާރަތަކުން އެ ހިދުމަތް ދެވިގެންދާނެ ކަމަށް އިމްޖާދު ވިދާޅުވި އެވެ.
"ދިރާގަށް ވަޑައިގަންނަވާ ހުރިހާ ބޭފުޅުންނަށް ވެސް އެ ފުރުސަތު އޮންނާނެ. އުރީދޫ ބޭފުޅުން ދިރާގަށް ބަދަލުވުމަށް ބޭނުންވާ ހުރިހާ ބޭފުޅުންނަށް އެ ފުރުސަތު އޮންނާނެ،" އިމްޖާދު ވިދާޅުވި އެވެ.
އުރީދޫގެ ހެޑް އޮފް ސޭލްސް ހުސެއިން ނިޔާޒު ވިދާޅުވީ، ރާއްޖޭގެ ހުރިހާ ރަށެއްގައި ވެސް އެ ކުންފުނީގެ އެޖެންޓުން ތިބޭނެ ކަމަށާއި، އުރީދޫއަށް ބަދަލުވާން ބޭނުންވާ ފަރާތްތަކަށް އެ ހުރިހާ ތަނަކުން ހިދުމަތް ދެވިގެންދާނެ ކަމަށެވެ.
މާލޭގައި ހިންގާ އުރީދޫގެ 11 ފިހާރައަކާއި މަގުތަކުގައި ބަހައްޓާ ތިން ޓެންޓުން ވެސް އެ ހިދުމަތް ލިބިގެންދާނެ ކަމަށް ނިޔާޒު ވިދާޅުވި އެވެ.
ހިދުމަތް ހޯދަން ހަދަންޖެހޭނީ ކިހިނެއް؟
"ނަމްބަރު ޕޯޓެބިލިޓީ"ގެ ހިދުމަތް ދޭން ފަށަނީ މިއަދުން ފެށިގެންނެވެ. ނަމްބަރު އެގޮތަށް ބަދަލު ކުރެވެނީ އެކްޓިވް ނަމްބަރެއްނަމަ އެވެ. އަދި އެ ނަމްބަރު ބޭނުންކުރާތާ 90 ދުވަސް ވެފައިވާން ޖެހެ އެވެ. އެ ހިދުމަތް ހޯދުމަށް "Port" ޖެހުމަށް ފަހު 234 އަށް އެސްއެމްއެސް ކުރުމުން ލިބޭ ކޯޑާ އެކު ފޯމެއް ފުރުމަށް ފަހު އެހިދުމަތަށް ހުށަހެޅޭނެ އެވެ.
އެ ހިދުމަތް ފޯރުކޮށްދެނީ އެ ނަމްބަރަކުން ދައްކަން ޖެހޭ ހުރިހާ ބިލެއް ދައްކައި ހަލާސް ކުރުމުންނެވެ. އެ ހިދުމަތަށް 200 ރުފިޔާގެ ފީއެއް ނަގާނެ އެވެ. އެ ހިދުމަތަށް އެދޭތާ ދެ ދުވަސް ތެރޭ ނެޓްވޯކުގެ ހިދުމަތް ލިބެން ފަށާނެ އެވެ.