މޯބައިލް ފޯނުގެ ނަންބަރު ބަދަލުނުކޮށް، ޚިދުމަތް ހޯދާ ނެޓްވޯކް ބަދަލުކުރެވޭ ޚިދުމަތް މާދަމާ އިފްތިތާހު ކުރުމަށް ނިންމާފައިވާ ކަމަށް ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އިން ބުނެފި އެވެ.
ކޮމިއުނިކޭޝަން އޮތޯރިޓީގެ ޗީފް އެގްޒެކެޓިވް އިލްޔާސް އަހުމަދު މިއަދު "ސަން" އަށް ވިދާޅުވީ، އެހިދުމަތް މާދަމާ ރަސްމީކޮށް އިއުލާންކޮށް އެހިދުމަތް ބޭނުންކުރަން ފެށޭނެ މުއްދަތާއި ތަފްސީލީ މައުލޫމާތު މާދަމާ އިއުލާން ކުރައްވާނޭ ކަމަށެވެ.
އެހިދުމަތް ތައާރަފްކުރުމަށް ވާންޖެހޭ ހުރިހާ ތައްޔާރީއެއްވެ ނިމިފައިވާ ކަމަށް އިލްޔާސް ވިދާޅުވިއެވެ.
މުއާސަލާތީ ކުންފުނި އުރީދޫއިން މައުލޫމާތު ދިންގޮތުގައި މާދަމާ އެހިދުމަތް އިއުލާންކުރާތާ ކުޑަދުވަސްކޮޅެއްގެ ތެރޭގައި ހިދުމަތް އާންމުންނަށް ދެވެން ފެއްޓޭނެ ކަމަށެވެ.
އެހިދުމަތް ހޯދުމަށް އެއް ނެޓްވޯކުން އަނެއް ނެޓްވޯކަށް ބަދަލުކުރާއިރު އެނަމްބަރެއްގެ ފޯނު ބިލްތައް ދައްކާ ހަލާސްކުރަންޖެހެއެވެ.
އެ ހިދުމަތުގެ ސަބަބުން ދިރާގު ނަންބަރެއް ގެންގުޅޭ މީހަކު، އުރީދޫ ނެޓްވޯކަށް ބަދަލުވެވިދާނެ އެވެ. އަދި އުރީދޫ ފޯން ނަމްބަރެއް ބޭނުންކުރާ މީހަކު، ދިރާގަށް ވެސް ބަދަލުވެވިދާނެ އެވެ. އެ ހިދުމަތް ދޭނީ ރާއްޖޭގެ މުއާސަލާތީ ހިދުމަތްދޭ ދެ ކުންފުނި ކަމަށްވާ ދިރާގު އަދި އުރީދޫއާ ގުޅިގެންނެވެ.
ނަމްބަރު ބަދަލު ނުކޮށް، ނެޓްވޯކު ބަދަލު ކުރުމުގެ ހިދުމަތް ތައާރަފު ކުރުމުން އެ މީހެއްގެ އަތުގައި އޮންނަ ނަންބަރަކުން ބޭނުން އޮޕަރޭޓަރެއްގެ ހިދުމަތް ހޯދޭނެ އެވެ. އެ ނަންބަރަކީ ވަކި އޮޕަރޭޓަރަކަށް ނިސްބަތްވާ އެއްޗަކަށް އޭރުން ނުވާނެ އެވެ.