އިސްލާމްދީނުގައި ޑިމޮކްރަސީގެ ނިޒާމް ނެތްކަމަށް ބުނުމަކީ ހަގީގަތެއް ނޫން ކަމަށާއި ދީނާއި ދުނިޔެއަކީ އިސްލާމްދީނުގައި ލާމެހި ގުޅިފައިވާ ދެކަމެއް ކަމަށް އިލެކްޝަންސް ކޮމިޝަންގެ ރައީސް އަހްމަދު ސުލައިމާން ވިދާޅުވެއްޖެ އެވެ.
ޑިމޮކްރަސީ ވީކް ފާހަގަކުރުމަށް ހއ. ހޯރަފުށީގައި ރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން ސުލައިމާން ވިދާޅުވީ އިސްލާމީ ޑިމޮކްރަސީ އާއި ވަޟާއީ ޑިމޮކްރަސީ ތަފާތު ކަމަށެވެ. އިސްލާމީ ޑިމޮކްރަސީގައި ސިޔާސީ އިގްތިސޯދީ އިޖުތިމާއީ ސުލޫކީ އަދި އަޚުލާގީ އެންމެހައި ދާއިރާތައް ހިމެނޭ ކަމަށް ސުލައިމާން ވިދާޅުވިއެވެ.
"އިސްލާމީ ޑިމޮކްރަސީގެ ތޮބިއްޔަތު ތަފާތު. އެ ނިޒާމަށް ޚާއްސަ ސިފަތައް ލިބިގެންވޭ. އެގޮތުން ފާހަގަކޮށްލެވޭ އެއް ސިފައަކީ އެއީ އެއްވެސް ހާލެއްގައި އިންސާނީ ކޯޅުންތަކާއި އަރާރުންތަކާއި އިންގިލާބުތަކާއި އިސްލާހީ ދައުވަތުތަކުގެ ތެރެއިން އުފެދިފައިވާ ނިޒާމެއް ނޫންކަން،" ސުލައިމާން ވިދާޅުވިއެވެ.
ޝޫރާ ނުވަތަ މަޝްވަރާގެ ރިވެތި އުސޫލަކީ އިސްލާމީ ވެރިކަން އޭގެމަތީގައި ބިނާކުރެވިފައިވާ ތަނބުތަކުގެ ތެރެއިން ތަނބެއް ކަމަށާއި ވެރިކަން ހިންގުމުގައި މަޝްވަރާ ކުރުމަށް އިސްލާމްދީން ބާރުއަޅުއްވާފައި ވަނީ ވެރިކަމުގެ ޚުދުމުޚުތާރުކަމާއި ހާކިމާގެ ރައުޔަށް އެކަނި ބޮޑެތި މުހިންމު ކަންތައް ނިންމުމުން ދުރުހެލިކުރުމަށް ކަމަށް ސުލައިމާން ވިދާޅުވި އެވެ.
"އިސްލާމީ ޑިމޮކްރަސީއަކީ ހާކިމާ ރައްޔިތުންނަށްދޭ ހަދިޔާއެއް ނޫން. ނުވަތަ އެއީ ބަދަލުވަމުންދާ ވެށީގެ ސަބަބުން މުޖުތަމައުގެ ތެރެއަށް ވެރިވެގެންފައިވާ ނިޒާމެއް ވެސް ނޫން. އެހެނެއްކަމަކު މި ނިޒާމް އައިސްފައި ވަނީ ﷲ ގެ މިންހާޖެއްގެ ގޮތުގައި،" ސުލައިމާން ވިދާޅުވިއެވެ.
ދުނިޔޭގެ ޑިމޮކްރަސީގެ ހަޔާތުގައި ރާއްޖެ މިވަނީ އާ ހަރުފަތްތަކެއް ގިރާކުރަން ފަށާފައި ކަމަށާއި އެހެން ދައުލަތްތަކާ އެއްހަމައެއްގައި ފައި ހަމަކުރުމަށް ރާއްޖެއިން ފަށާފައިވާ މަސައްކަތުގައި ހުރިހާ ފަރާތެއްގެ އެހީތެރިކަމާ އެއްބާރުލުން ބޭނުންވާ ކަމަށް ސުލައިމާން ވިދާޅުވި އެވެ.
"ރާއްޖޭގައި ޑިމޮކްރަސީ ފައްކާކުރެވޭނީ ސިޔާސީ އެންމެހައި ފަރާތްތަކާއި ސިޔާސީ ޕާޓީތަކުގެ އެއްބާރުލުން ލިބިގެން. އަމިއްލަ މަސްލަހަތާއި ޒާތީ ތަޢައްސަބާއި ޒާތީ ފިކުރުތަކަށްވުރެ ގައުމީ މަސްލަހަތައް އިސްކަންދީގެން. ދޭދޭ ފަރުދުންގެ އަޅާލުން ލިބިގެން. ދޭސީ ބިދޭސީންގެ އެހީވެސް ހޯދައިގެން. މިދެންނެވި ބީދައިން މިކަން ކުރެވޭނީ އިސްލާމީ އަގީދާއިން ހަކަތަ ހޯދައިގެން. އަބުރުވެރި ކަމާއި ނިޔަނެތި ކަމުގެ ހެދުން ލައިގެން. އަމާނާތްތެރިކަމާއި ސުލްހަވެރިކަމުގެ ގުލްދަސްތާ ހިފައިގެން. ކޮރަޕްޝަނާ ރިޝްވަތައް ނަފްރަތުކޮށްގެން. ބައިބައިވުމާއި ތަޅާފޮޅުމާއި މާރާމަރީއަށް ނޫނެކޭ ބުނެގެން. ބަހާއި އަމަލާ ސީދާކޮށްގެން. ތިމާއަށްވުރެ ގައުމު ބޮޑުކަމުގައި ދެކިގެން،" ސުލައިމާން ވިދާޅުވިއެވެ.