ޒުވާން ވިޔަފާރިން އުފެއްދުމަށް ސަރުކާރުން ފަށާފައިވާ ގެޓްސެޓް ލޯނުގެ ފައިސާ ދޫކުރަން ފަށައިފި އެވެ.
ގެޓްސެޓްގެ ޕްރޮގުރާމް މެނޭޖަރު މަހީލް އަލީ ޖަލީލް މިއަދު "ސަން"އަށް ވިދާޅުވީ ގެޓްސެޓް ފައިސާ މިހާރު އެއް ފަރާތަކަށް ދޫކޮށްފައިވާ އިރު އިތުރު ތިން ފަރާތަކަށް މިހަފްތާތެރޭ ފައިސާ ދޫކުރާނެ ކަމަށެވެ. އެގޮތުން އެލޯނަށް ހޮވިފާ 34 ވިޔަފާރިއަށް މާޗު މަހުގެ ނިޔަލަށް އެ ފައިސާ ދޫކުރާނެ ކަމަށް މަހީލް ވިދާޅުވި އެވެ.
ޖުމުލަ 34 ވިޔަފާރިއަކުން 72 ފަރާތަކަށް އެލޯން ލިބިފައިވާކަން މިދިޔަ އަހަރު އޮގަސްޓު މަހުގެ ތެރޭގައި ވަނީ އިއުލާންކޮށްފަ އެވެ.
އިކޮނޮމިކް މިނިސްޓަރު މުހައްމަދު ސައީދު ވިދާޅުވެފައި ވަނީ 72 ޒުވާނުންނަށް ޖުމުލަ 25 މިލިއަން ރުފިޔާގެ ލޯން ދޫކުރެވިގެންދާ އިރު އެއީ އާ ވިޔަފާރިތަކަށް ހުޅުވާލެވޭ ދޮރެއް ކަމަށެވެ.
ފަސް އަހަރު ތެރޭ ކޮންމެ އަހަރަކު ވެސް 40 މިލިއަން ރުފިޔާގެ ލޯން ގެޓްސެޓް ޕްރޮގްރާމްގެ ދަށުން ދިނުމަށް ސަރުކާރުން ވަނީ ނިންމާފަ އެވެ. ގެޓްސެޓް ޕްރޮގްރާމަށް ފަސް އަހަރު ތެރޭ ކަނޑައަޅާފައި ވަނީ 200 މިލިއަން ރުފިޔާ އެވެ.