މިމަހު 26 ވަނަ ދުވަހު ބޭއްވުމަށް ހަމަޖެހިފައިވާ ދުނިޔޭގެ ފުޓްބޯޅައިގެ މައި އިދާރާ ފީފާގެ އިންތީޚާބުގައި ރާއްޖެ އިން ތާއީދު ކުރާނީ އެ އިންތިޚާބުގައި ކުރިމަތިލައްވާފައިވާ އޭޝިއާގެ ފުޓްބޯޅައިގެ މައި އިދާރާ (އޭއެފްސީ)ގެ ރައީސް ޝައިޚް ސަލްމާން ބިން އިބްރާހިމް އަލް ޚަލަފީއަށް ކަމަށް އެފްއޭއެމް އިން ބުނެފި އެވެ.
ސަލްމާންގެ އިތުރުން ފީފާގެ އިންތީޚާބުގައި ދެން ވާދަ ކުރަނީ ފީފާގެ ކުރީގެ ނައިބު ރައީސް އުރުދުންގެ ޝާހީ އާއިލާގެ އިސްބޭފުޅެއްކަމަށްވާ ޝަހީ ރަސްކަމުގެ އަމީރު ޙުސައިން ބިން ޢަލީއާއި ޔޫއެފްއާގެ ސެކެޓްރީ ޖެނަރަލް ޖިއާނީ އިންފެންޓީނޯ އާއި ފީފާގެ އެގްޒެކެޓިވް ކޮމިޓީގެ ކުރިގެ މެންބަރެއް ކަމަށްވާ ޖްރޯމް ޝަމްޕޭން އާއި ދެކުނު އެފްރީކާގެ މަހުޖަނެއް ކަމަށްވާ ޓޮކްޔޭ ސެކްސްވޭލް އެވެ.
އެފްއޭއެމްގެ ޖެނަރަލް ސެކެޓްރީ ބައްސާމް ޢަދީލު ޖަލީލު މިއަދު ސަން އަށް ވިދާޅުވީ ރާއްޖެ އިން ޝައިޚް ސަލްމާން އަށް ތާއީދު ކުރަން ނީންމީ އޭއެފްސީ ހުރިހާ މެންބަރުންގެ މެދުގައި ވާހަކަ ދެއްކުމަށް ފަހު ފީފާގެ ރައީސް ކަމަށް އެންމެ ރަނގަޅު ކެނޑިޑޭޓަކީ ޝައިޚް ސަލްމާން ކަމަށް އޭއެފްސީ މެންބަރު ގައުމުތަކަށް އެއްބަސް ވެވުމުން ކަމަށެވެ.
ރާއްޖޭގެ އިތުން އޭއެފްސީ އަނެއް 46 ގައުމުން ވެސް ނިންމާފައި ވަނީ ސަލްމާން އަށް ތާއީދު ކުރުމަށެވެ.
އޭޝިއާގެ މެންބަރު ގައުމުތަކުގެ އިތުރުން އެފްރިކަން ފުޓްބޯލް ކޮންފެޑްރޭޝަން (ކެފް)ގެ 54 ގައުމުން ވެސް ވަނީ ސަލްމާން އަށް ތާއީދު ކުރަން ނިންމާފަ އެވެ.
އިންތީޚާބުގައި އެންމެ ވާދަވެރިކަން ބޮޑީ ސަލްމާން އާއި އިންފެންޓީނޯއާ ދެމެދު އެވެ.
މިދިޔަ ހަފުތާގައި ސަލްމާންގެ ޓީމުން އެމެރިކާ ބައްރުގައި ކުރި ކެމްޕޭންތަކުގައި އޭނާ އަށް މިހާރު ވެސް ވަނީ 90 ވޯޓް ޔަގީންވެފަ އެވެ.
ފީފާގެ އިންތީޚާބުގައި ދުނިޔޭގެ 209 ގައުމަކުން ވޯޓް ދޭނެ އެވެ.