ލެސްޓާ ސިޓީގެ ފޯވާޑް ޖެމީ ވާޑީ އެ ކްލަބާއެކު ހަދާފައިވާ އެއްބަސްވުން އިތުރު ކޮށް އެ ކުލަބުގައި މަޑުކުރުމަށް ނިއްމައިފިއެވެ.
"އަހަރެން ވަރަށް ބޮޑަށް ކެތްމަދުވެފައި މި ހުރީ މި ކްލަބާއި އެކީ ކާމިޔާބީ ހޯދުމަށް. މިއީ ވަރަށް ހާއްސަ އަދި ތާރީހީ ކާމިޔާބީއެއް އެ ކަން ކުރުމަށް ކުރަންޖެހޭ ހުރިހާ ކަމެއް މިދަނީ ކުރަމުން. މި ކަމުގައި އަހަރެން ބޭނުން ބައިވެރިވާން،" ލެސްޓާގެ އެއްބަސްވުން އިތުރުކުރުމަށް ފަހު ވާޑީ ބުންޏެވެ.
ލީގްގައި ރޭ މެންޗަސްޓާ ސިޓީއާ ދެކޮޅަށް ކުޅުނު މެޗު ކާމިޔާބް ކޮށް ތާވަލުގެ އެއްވަނާގައި ފަސް ޕޮއިންޓްގެ ލީޑްއަކާ އެކު ލެސްޓާ އޮތް އިރު ވާޑީ ބުނީ އެ ކްލަބުގެ ތާރީހުގައި އަލަށް ލީގް އުފުލާލާ ތަން ދެކިލުމަކީ ހުވަފެނެއް ކަމަށާއި އެ ކަން ހާސިލް ކުރުމަށް މުޅި ޓީމް ވަނީ އެކަތިގަނޑަކަށްވެ ކެތްމަދު ވެފައި ކަމަށެވެ.
އުމުރުން 29 އަހަރުގެ އިނގިރޭސި ފޯވާޑް ލެސްޓާއާ ގުޅުނީ 2012 ވަނަ އަހަރު ފްލީޓްވުޑް އިން އެއް މިލިއަން ޕައުންޑްގެ ޓްރާންސްފާ އަކަށެވެ. އިތުރު ތިން އަހަރާއި ހަމަސް ދުވަހަށް ވާޑީ އެކުލަބުގައި މަޑު ކުރަން އެއްބަސް ވުމުން 2019 ވަނަ އަހަރާއި ހަމައަށް އޭނާ އެކުލަބުގައި ހުންނާނެއެވެ.
ވާޑީ ވަނީ ޕްރިމިއާ ލީގުގައި ޖެހިޖެހިގެން 11 މެޗުގައި ލަނޑު ޖަހައި އާ ރެކޯޑެއްވެސް ގާއިމްކޮށްފައެވެ. އަދި އޭނާ ވަނީ މި ސީޒަނުގައި ކުޅުނު 25 މެޗުން 18 ގޯލު ކާމިޔާބް ކޮށް ލަނޑު ލިސްޓްގެ އެއްވަނައިގައެވެ.