އުތުރުގެ ހަތަރު އަތޮޅެއްގެ ކުނި އުފުލުމަށް ހާއްސަ "ސާފު-1" ކޮޅުވެއްޓި ރާއްޖެއަށް ގެނެސްފި އެވެ.
ސަން އަށް އެނގިފައިވާ ގޮތުގައި އެ ކޮޅުވެއްޓި މިހާރު އޮތީ އެމްޕީއެލް ސަރަހައްދުގަ އެވެ. މިހާރު ކުރިއަށްދަނީ ކޮޅުވެއްޓި ރަޖިސްޓަރީ ކުރުމުގެ މަސައްކަތްތަކެވެ.
އެ ކޮޅުވެއްޓި ބޭނުންކުރާނީ އުތުރުގެ ހަތަރު އަތޮޅުގެ ރަށްރަށުން ރ. ވަންދޫއަށް ކުނި ޖަމާކުރުމުގެ މަސައްކަތް ކުރިއަށް ގެންދިޔުމަށެވެ. ރ. ވަންދޫގައި ތަރައްގީކޮށްފައިވާ ރީޖަނަލް ވޭސްޓް މެނޭޖްމަންޓް ސެންޓަރަކީ، ރާއްޖޭގައި ކުނި ނައްތާލުމަށް މިހާތަނަށް ގާއިމްކޮށްފައިވާ އެންމެ ފެންވަރު ރަނގަޅު އެއް ސެންޓަރެވެ.
ނ. އަތޮޅާއި ރ، ބ، އަދި ޅ އަތޮޅަށް އަމާޒުކޮށްގެން ވަންދޫގައި ގާއިމުކޮށްފައިވާ ސެންޓަރުގައި، ހަތަރު އަތޮޅުގެ 42 ރަށާއި ރިސޯޓްތަކާއި އިންޑަސްޓްރިއަލް މަސައްކަތްކުރާ ރަށްތަކުން އެތަނަށް ގެންނަ ކުނި ނައްތާލެވޭނެއެވެ.
އެ ޕްރޮޖެކްޓަކީ ވޯލްޑް ބޭންކުގެ ލޯނު އެހީގެ ދަށުން ކުރިއަށްގެންދާ ޕްރޮޖެކްޓެކެވެ.