މިއަދު އެސްޓީއޯ އިން ރާއްޖެއަށް އަލަށް ތައާރަފްކުރި "ރެޑީ މިކްސް ކޮންކްރީޓް" ނުވަތަ ތައްޔާރީ ސިމެންތީގެ ސަބަބުން ރާއްޖޭގެ ކޮންސްޓްރަކްޝަން އިންޑަސްޓްރީ ނުވަތަ އިމާރާތްކުރުމުގެ މަސައްކަތްތަކަށް އިންގިލާބެއް ގެނެވޭނެކަމަށް މޯލްޑިވްސް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ) ގެ ރައީސް މުހައްމަދު އަލީ ޖަނާހު ވިދާޅުވެއްޖެ އެވެ.
ކޮންމެ އަހަރަކު ވެސް މަސީ އިން ބާއްވަމުން އަންނަ މަސީ ބިލްޑް އެންޑް ހޯމް އެކްސްޕޯ ހުޅުވުމަށް މިއަދު ދަރުބާރުގޭގައި ބޭއްވި ރަސްމިއްޔާތުގައި ވާހަކަ ދައްކަވަމުން ޖަނާހު ވިދާޅުވީ، މީގެ ކުރިން މަގުތައް ބަންދުކޮށްގެން، ސިމެންތީގެ ކުނޑިތައް މަގުތަކަށް އަރުވަމުން ކުރަމުން އަންނަ އިމާރާތްކުރުމުގެ މަސައްކަތަކީ އެ އެސޯސިއޭޝަނުން އެންމެ ކަންބޮޑުވި އެއް މައްސަލަ ކަމަށެވެ.
ޖަނާހު ވިދާޅުވީ، އެފަދަ މައްސަލަތަކަށް ހައްލެއް ލިބި މިއަދު، ތައާރަފްކުރި ރެޑީމިކްސް ކޮންކްރީޓްގެ ސަބަބުން އިމާރާތްކުރުން ނުވަތަ ކޮންސްޓްރަކްޝަން ދާއިރާއަށް އިންގިލާބެއް ގެނެވޭނެ ކަމަށެވެ.
ޖަނާހް އިތުރަށް ވިދާޅުވީ، އެފަދަ އާ ކަންކަން ރާއްޖޭގެ އެކި ދާއިރާތަކަށް ތައާރަފްވަމުން އަންނަ އިރު، ރާއްޖޭގެ އިގްތިސާދު މިހާރު އޮތީ ރަނގަޅު ޓްރެކްގައި ކަމަށާއި ކޮންސްޓްރަކްޝަން އިންޑަސްޓްރީ އަށް ބޮޑެތި ކުރިއެރުންތައް ލިބެމުން އަންނަ ކަމަށެވެ. އަދި ރާއްޖޭގެ ތަރައްގީގެ ބައިވެރިއެއްގެ ގޮތުގައި ކޮންސްޓްރަކްޝަން ދާއިރާ އަބަދުވެސް ދެމި އޮންނާނެ ކަމަށް ޖަނާހް ވިދާޅުވި އެވެ.
އެ ރަސްމިއްޔާތުގައި ވާހަކަ ދައްކަވަމުން ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ، މިއަހަރު މެދުތެރޭގައި މާލޭ ދެކުނު ފަރާތުގައި ހިއްކާ ވިލެޖްގައި ރެޑީމިކްސް ކޮންކްރީޓްގެ މަސައްކަތްތައް ކުރުމަށް ޝައުގުވެރިވާ ފަރާތްތަކަށް އެތަނުން ބިން ދޭނެ ކަމަށެވެ.
މިނިސްޓަރު ވިދާޅުވީ، އެފަދަ މަސައްކަތްތައް ކުރިއަށްގެންދާ ނަމަ، މާލޭގެ މަގުތައް ބަންދުކޮށްގެން ދާ ވަގުތު ކުޑަވެ، ސިމެންތި ފަދަ ތަކެތި މަގުތަކަށް އެޅުމުން ލިބޭ ގެއްލުން ކުޑަވާނެ ކަމަށެވެ.
"ރަނގަޅު ގޮތުގައި ރެޑީމިކްސް ކޮންކްރީޓްގެ މަސައްކަތް ފެށުމުން އަޅުގަނޑުމެންގެ އަމާޒަކީ އެހިސާބަށް ދިއުމުން މާލޭގެ އެތެރޭގައި މިގޮތަށް މެޓީރިއަލް ބަހައްޓައިގެން މާލޭގެ މަގުތައް ބަންދުކޮށްގެން ކޮންކްރީޓް މަސައްކަތްތައްކުރެވެމުންދާ އުސޫލު ބަދަލުކުރުން. އެހެން ހެދުމުން މާލޭގެ އެތެރެ ވަރަށް ސާފުގޮތުގައި އޮންނާނެ،" މިނިސްޓަރު މުއިއްޒު ވިދާޅުވި އެވެ.
މިއަދުގެ ރަސްމިއްޔާތުގައި މަސީން ވަނީ އެ ޖަމިއްޔާ އިން ދޭ ހިދުމަތުގެ އެންމެ މަތީ އެވޯޑު ރައީސަށް އަރުވައިފަ އެވެ.