ބަހްރޭންގައި ފަރިތަކުރަމުންދާ ދިވެހި ގައުމީ އަންހެން ފުޓްބޯޅަ ޓީމު ކުޅުނު އެކުވެރުކަމިގެ ފުރަތަމަ މެޗުން 0-4 ގެ ނަތީޖާ އަކުން އަންހެން ޓީމް ބަލިވެއްޖެ އެވެ.
އަންނަ މަހު އިންޑިއާގައި އޮންނަ ސާފް ގޭމްސް އަށް ފަރިތަކުރާ އަންހެން ޓީމް އިތުރު ތަމްރީންތަށް ހެދުމަށް 23 ވަނަދުވަހު ބަހްރޭން އަށް ގޮސްފައިވާ އިރު އެ ގައުމުގައި އެކުވެރިކަމުގެ ތިން މެޗު ކުޅުމަށް ވަނީ ހަމަޖެހިފައެވެ.
ރާއްޖޭގެ ގައުމީ އަންހެން ފުޓްބޯޅަ ޓީމާއި ބަހްރޭންގެ އަންހެން ޓީމު ކުޅުނު މެޗުގެ ތެރެއިން --- ފޮޓޯ: އެފްއޭއެމް
އެފްއޭއެމްގެ ޖެނަރަލް ސެކެޓްރީ ބައްސާމު އާދިލް ޖަލީލު މިއަދު 'ސަން' އަށް ވިދާޅުވީ، ފުރަތަމަ މެޗު އިންޓަނޭޝަނަލް ފްރެންޑްލީ އެއްގެ ގޮތުގައި ކުޅުނުއިރު އަނެއް ދެ މެޗު ކުޅޭނީ ބަހްރޭންގެ ދެ ކުލަބަކާއި އެކީ ކަމަށާއި ޓީމުގެ ފަރާތުން ކުރިއެރުން ތަކެއް ފެންނަމުން އަންނަ ކަމަށެވެ.
"އަންހެން ޓީމް މާލޭގައި ވެސް ވަރަށް ގިނަ ދުވަހު އެކީގައި ތަމްރީންތައް ހަދާފައި އެ ދިޔައީ. ބަހްރޭންގައި ވެސް އަންނަނީ ވަރަށް ރަނގަޅަށް ފަރިތަކުރުންތައް ފުރިހަމަ ކުރަމުން،" ބައްސާމު ވިދާޅުވިއެވެ.
ރާއްޖޭގެ ގައުމީ އަންހެން ފުޓްބޯޅަ ޓީމާއި ބަޚްރޭންގެ އަންހެން ޓީމު ކުޅުނު މެޗުގެ ތެރެއިން --- ފޮޓޯ: އެފްއޭއެމް
ބަހްރެއިންގައި ކުރިއަށް ގެންދިއުމަށް ހަމަޖެހިފައިވާ ކޭމްޕް ފެބްރުއަރީ މަހުގެ އެއް ވަނަ ދުވާހަ ހަމަޔަށް އެގައުމުގައި ކުރިއަށް ގެންދާނެ ކަމަށް އެފްއޭއެމް އިން ވަނީ ބުނެފައެވެ.
ރާއްޖެއިން ބޭރުގައި ބާއްވާ މުބާރާތްތަކުގައި ބައިވެރިވާ ޓީމުތަކުން ނެރެމުންދާ ދަށް ނަތީޖާ ތަކާއި އަދިވެސް އެހެނިހެން ތަފާތު ސަބަބުތަކާއި ހުރެ ސަރުކާރުގެ ހަރަދުގައި ގެންދާނެ ޓީމްތައް ކަނޑައެޅި އިރު އަންހެން ފުޓްބޯޅަ ޓީމް ހިމެނިފައި ނުމުވުން އެފްއޭއެމްގެ އެދުމުގެ މަތިން ދައުލަތުން ވަނީ އަންހެން ޓީމް ސާފް ގޭމްސްއަށް ދިއުމުގެ މަގު ފަހި ކޮށްދީފައެވެ.