ސާފް ސުޒުކީ ކަޕުގައި ފެނުނު ނޭޕާލަށް ވުރެ މިހާރު އެ ޓީމު ވަރުގަދަ ކަމަށާއި ނަމަވެސް ރާއްޖެއިން އޮތީ ޗެލެންޖަށް ތައްޔާރަށް ކަމަށް ގައުމީ ޓީމުގެ ކޯޗް ރިކީ ހަބަޓް ބުނެފި އެވެ.
ބަންގުބަންދު ގޯލްޑްކަޕްގެ ސެމީ ފައިނަލް ދެ ވަނަ މެޗަށް ނުކުތުމުގެ ކުރިން ޕްރެސް ކޮންފަރެންސްގައި ވާހަކަ ދައްކަމުން ގައުމީ ކޯޗު ބުނީ މުބާރާތުގައި ރާއްޖޭގެ ޒުވާން ކުޅުންތެރިން ދައްކަމުންދާ ކުޅުމާމެދު ވަރަށް ބޮޑަށް ހިތްހަމަޖެހޭ ކަމަށެވެ.
އޭނާ ބުނީ ނޭޕާލާ ދެކޮޅާށް ސެމީފައިނަލުގައި ކުޅޭން ޖެހުމަކީ ޝައުގުވެރި ކަމެއް ކަމަށާއި އަދި މެޗަކީ ރާއްޖޭގެ ޒުވާން ކުޅުންތެރިންނަށް ރަނގަޅު ޗެލަންޖަކަށް ވާނެ ކަމަށެވެ.
"ސެމީ ފައިނަލް މެޗަށް ބަލާލާއިރު އެ މެޗަކީ ވަރަށް ޓަފް މެޗެއް... އަދި މީ ވަރަށް ޝައުގުވެރި މެޗެއް ވެސްމެ. ސެމީ ފައިނަލްގައި އަހަރެމެން ވަރަށް ރަނގަޅަށް މަސައްކަތް ކުރާނަން،" ހާބަޓް ބުންޏެވެ.
އޭނާ ބުނީ ރާއްޖެއިން ގުރޫޕްގެ އެއް ވަނަ ހޯދައި ސެމީއަށް ދެވުމުން ރާއްޖޭގެ ކުޅުންތެރިންނަށް ރިކަވާވުމަށް ދެ ދުވަސް ލިބިގެން ދިޔަ ކަމަށާއި އެހެންވެ ރާއްޖެއިން އޮތީ މެޗަށް ވަރަށް ރަނގަޅަށް ތައްޔާރުވެގެން ކަމަށެވެ.
ރާއްޖެއާ ނޭޕާލް ބައްދަލު ކުރާ ސެމީ ފައިނަލް މެޗް ފެށޭނީ ރާއްޖޭ ގަޑިން މިއަދު ހަވީރު 4:30 ގައެވެ.