ދިވެހިރާއްޖޭގެ އިގްތިސާދާ ގުޅުން ހުރި ދާއިރާތަކުގެ ތެރެއިން ސިވިލް ސާވިސްއާ ގުޅުންހުރި ކަންކަމުގައި އިންޓަނޭޝަނަލް މަނިޓަރީ ފަންޑް (އައިއެމްއެފް)އާއި ސިވިލް ސާވިސް ކޮމިޝަން (ސީއެސްސީ) އާ ދެމެދު މަޝްވަރާތަކެއް ކުރިއަށް ގެންގޮސްފިއެވެ.
ސީއެސްސީ އިން ބުނީ، ދިވެހިރާއްޖޭގެ އިޤްތިސާދީ ހާލަތު ބެއްލެވުމަށާއި އެކަމުގެ ދިރާސާ ކުރެއްވުމަށްޓަކައި ރާއްޖެވަޑައިގެން އުޅުއްވާ އައިއެމްއެފްގެ ވަފުދާ ސިވިލް ސަރވިސް ކޮމިޝަނުގެ ފަރާތުން މިއަދު މެންދުރު ފަހު އެ ކޮމިޝަންގައި ބައްދަލުކޮށްފައިވާ ކަމަށެވެ.
އެ ބައްދަލުވުމުގައި، ރާއްޖޭގެ ސިވިލް ސާވިސްއަށް ކުރިމަތިވަމުންދާ ގޮންޖެހުންތަކާއި، އެ ކަންކަން ހައްލުކުރެއްވުމަށް އަޅުއްވަމުން ގެންދަވާ ފިޔަވަޅުތަކާއި، އެކަންކަން ކުރިމަގަށް ރޭވިފައިވާ ގޮތްތަކާމެދުވެސް މަޝްވަރާކުރެވުނު ކަމަށްވެސް ސީއެސްސީން ބުންޏެވެ.
އެ ބައްދަލުވުމުގައި ސީއެސްސީގެ ފަރާތުން ކޮމިޝަނުގެ ރައީސާއި، މެންބަރުންނާއި، ސެކްރެޓަރީ ޖެނެރަލުގެ އިތުރުން ކޮމިޝަނުގެ ސީނިއާ މެނެޖްމަންޓްގެ ބޭފުޅުން ބައިވެރިވެވަޑައިގެންފައިވާއިރު އައިއެމްއެފްގެ ފަރާތުން ބައިވެރިވެވަޑައިގެންނެވީ ޑެޕިއުޓީ ޗީފް ޑިވިޝަން، އެލިސަން ސްޓްވަރޓްއާއި އެކަމަނާގެ ޓީމެވެ.