ރ. ވަންދޫގައި ސަރުކާރުން ގާއިމްކުރާ ރީޖަނަލް ވޭސްޓްމެނޭޖްމެންޓް ސެންޓަރަށް ގެންނަ ކުނި އުފުލާ އުޅަނދު މިމަހުގެ ފަހުކޮޅު ރާއްޖެ ގެނެވޭވަރު ވާނެ ކަމަށް އެންވާރަމަންޓް މިނިސްޓްރީން ބުނެފި އެވެ.
އެންވާރަމަންޓް މިނިސްޓްރީގެ އޮފިޝަލަކު ވިދާޅުވީ، އެ އުޅަނދުގެ ބަދެ ނިންމާ ޓެސްޓު ދަތުރުތައް މިހާރު ކުރަމުން އަންނަ ކަމަށެވެ. އަދި އެންވާރަމަންޓް މިނިސްޓްރީގެ އޮފިޝަލުން ވެސް އެ ޓެސްޓްކުރުމުގައި ހަރަކާތްތެރިވާ ކަމަށް ވިދާޅުވި އެވެ.
ރ. ވަންދޫގައި ހަދާ ސަރަހައްދީ ފެންވަރުގެ ވޭސްޓް މެނޭޖްމަންޓަށް ކޮޅުވެއްޓިއެއް ގެނައުމުގެ އެއްބަސްވުމުގައި ސަރުކާރުގެ ފަރާތުން އިންޑިއާގެ ވިޖައި މެރިން ސާވިސް ކުންފުންޏާ ހަވާލުކޮށްފައިވަނީ، މިދިޔަ އަހަރުގެ ޖުލައި މަހުގެ ތެރޭގައެވެ.
ދިގު މިނުގައި 30 މީޓަރު ހުންނަ އެ ކޮޅުވެއްޓީގައި 200 ޓަނުގެ ކުނި އުފުލޭއިރު، "ސާފު" ނަމަކަށް ކިޔާ އެ ކޮޅުވެއްޓި ބަދެފައިވަނީ އިންޑިއާގެ ހުޅަނދުގައި އޮންނަ އިންޑިއާގެ ސްޓޭޓެއް ކަމަށްވާ ގޯއާގައެވެ. އަދި މިއީ ރާއްޖެއިން ބޭރުން ބަދެގެން ގެންނަ އެފަދަ ފުރަތަމަ އުޅަނދު ކަމަށް އެންވާރަމަންޓް މިނިސްޓްރީން މައުލޫމާތުދެ އެވެ.
ރ. ވަންދޫގައި ގާއިމްކޮށްފައިވާ ވޭސްޓް މެނޭޖްމަންޓް ސެންޓަރަކީ އުތުރުގެ ހަތަރު އަތޮޅު ކަމަށްވާ ނ އަތޮޅާއި ރ. އަތޮޅާއި ބ. އަތޮޅު އަދި ޅ. އަތޮޅުގައި އުފެދޭ ކުނި ރައްކާތެރި ގޮތުގައި ނައްތާލުމަށް ގާއިމްކޮށްފައިވާ ސެންޓަރެކެވެ.
އެ ސެންޓަރުގައި ހަތަރު އަތޮޅުގެ މީހުން ދިރިއުޅޭ 44 ރަށާއި އެ އަތޮޅުތަކުގައިވާ ރިސޯޓްތަކުން ކުނި އެއްކޮށް ރައްކާތެރި ގޮތެއްގައި ކުނި ނައްތާލާނެ އެވެ.
އެންވާރަމަންޓް މިނިސްޓްރީން ބުނިގޮތުގައި، ރ. ވަންދޫގައި ހަދާ ވޭސްޓްމެނޭޖްމަންޓް ސެންޓަރުގެ 99 ޕަސެންޓް މަސައްކަތް މިހާރު ވަނީ ނިމިފައެވެ. އަދި މިހާރު ކުރިއަށްދަނީ އެތަނަށް ބޭނުންވާ މީހުންނާއި އިންސިނިރޭޓަރުތައް ބެހެއްޓުމުގެ މަސައްކަތް ކަމަށާ އަންނަ މަހުގެ ތެރޭގައި އެތަނުގެ އޮޕަރޭޝަންތައް ފެށޭނެ ކަމަށެވެ.