ފުލުހުންނާއި ސިފައިން ކޯޓު އަމުރެއްގެ ދަށުން މއ. ގޯލްޑަންބީން ބަލައި ފާސްކުރި އިރު އެގެއިން ފިސްތޯލަ ފެނުނު މައްސަލައިގެ ތަހުގީގު ނިންމައި ޕްރޮސިކިއުޓާ ޖެނެރަލްގެ އޮފީހަށް ފޮނުވައިފި އެވެ.
ޕީޖީ އޮފީހުގެ އޮފިޝަލަކު ސަން އަށް ވިދާޅުވީ މޯލްޑިވްސް ޕޮލިސް ސާވިސް އިން އެ މައްސަލަ އެ އޮފީހަށް ފޮނުވާފައި ވަނީ މިއަދު ކަމަށެވެ.
"ޕީޖީ އޮފީހުން މިހާރު އެ މައްސަލަ ދިރާސާ ކުރަމުން ދަނީ،" އޮފިޝަލް ވިދާޅުވި އެވެ.
އެ މައްސަލާގައި ދައުވާ ކުރަން ފޮނުވީ ކޮންބައެއްގެ މައްޗަށް ކަމެއް އަދި ސާފެއް ނުވެއެވެ.
ފުލުހުންނާއި ހަތިޔާރު އެޅި ސިފައިންގެ ޓީމަކުން މއ. ގޯލްޑަންބީން ބަލައި ފާސްކުރީ މިދިޔަ އޮކްޓޯބަރު މަހުގެ 30 ވަނަ ދުވަހުގެ ރޭގެ ވަގުތެއްގަ އެވެ.
މި މައްސަލައާ ގުޅިގެން މިހާތަނަށް ފުލުހުން އެއްވެސް އެއްޗެއް މީޑިއާއަށް ހިއްސާކޮށްފައެއް ނުވެއެވެ.
އެގޭގެއިތުރުން މއ. ރައުފަތުގެ އާއި ހ. ހިލްޓަންގެ ފުލުހުންނާއި ސިފައިން ވަނީ ބަލައިފާސްކޮށްފަ އެވެ.
ހ. ހިލްޓަން ގެއަކީ މަޝްހޫރު ދީނީ އިލްމުވެރިޔާ ޑރ. އަފްރާޝީމް އަލީ އަވަހާރަކޮށްލަން ރޭވި ކަމަށް ތުހުމަތު ކުރެވޭ އަޒުލިފް ރައޫފުގެ ގެއެވެ.
އެރޭ ފުލުހުން ހިންގި އޮޕަރޭޝަންގައި އަޒުލިފް ރައޫފްގެ ކޮއްކޮ އިންތީފް ރައޫފާއި އިތުރު މީހަކު ވެސް ހައްޔަރުކުރި އެވެ. ނަމަވެސް އޭނާ ހައްޔަރުކުރި މައްސަލާގައި ދައުލަތުގެ އިދާރާ އަކުން މިހާތަނަށް އެއްވެސް އެއްޗެއް ބުނެފައެއް ނުވެއެވެ.