ޕެރިހަށް ދިން ހަމަލާއާ ގުޅިގެން މުޅި ޔޫރަޕް ސިއްސުވާލި އެވެ. ފްރާންސް އޮތީ ކަރުނައިން ތެމިފަ އެވެ. އެ ގައުމާ އެކުވެރި ބާރުތައް ވަނީ ކުއްލި ހާލަތަށް ގެނެސްފަ އެވެ. މީޑިއާގައި ފަލަ ސުރުހީ މިއަދު އަޅަމުންދަނީ އެ ހާދިސާއާ ގުޅުން ހުރި ވާހަކަތަކުންނެވެ. ހަމަލާގެ ދަނޑިވަޅުގައި ތަރިންނަށްވީ މީހުންގެ ވާހަކަ ވެސް އެބަ ދައްކަ އެވެ. އެފަދަ ބަތަލެއްގެ ވާހަކަ ދައްކާލާނަމެވެ.
އޭގެ ތެރެއިން އެކަކީ ލިވަޕޫލްގެ ކުރީގެ ޑިފެންޑާ އަދި މިހާރު ކްރިސްޓަލް ޕެލަސްގެ މާޓިން ކެލީއެވެ. ކެލީއަކީ ފުޓްބޯޅަ ދަނޑުގައިވެސް ތަރިއެކެވެ. އެޔާއެކު ޕެރިހުގެ ހާދިސާއާ ގުޅިގެން ވެސް އޭނާ ތަރިއަކަށްވީއެވެ.
އެ ރޭގެ ހާދިސާއާ ގުޅިގެން ގިނަ ބަޔަކު އެ ނަމެއް ފާހަގަ ނުކުރި ނަމަވެސް ކެލީއަކީ ތަރިއެކެވެ.
ބޮމުގެ ހަމަލާ ހިނގިއިރު ކެލީ ހުރީ ޕެރިހުގެ ރެސްޓޯރެންޓެއްގައެވެ. ބޮން ގޮއްވާލީ ކެލީހުރި 'ލާޕާލް' ރެސްޓޯރެންޓް ހުރި ހިސާބާ ފަސް މިނެޓުން ހިނގާލާފަ ދެވޭ ހިސާބެއްގައެވެ.
ޕެރިހުގެ ބޮމުގެ ހަމަލާ ހިނގިއިރު މާޓިން ކެލީ ބައެއް މީހުންނަށް އެހީތެރިވެދެނީ --- ފޮޓޯ/ ޓްވިޓާ
ބޮމުގެ ހަމަލާ ހިނގުމުން ކެލީވަނީ ބައެއް މީހުންނަށް އެހީވެ ސަލާމަތްތެރި ތަނަކަށް ގެންގޮސްދީފައެވެ. އަދި އޭނާ އާއި އެހެން މީހަކު ވަނީ ޒަހަމުވެފައިވާ މީހަކު އުފުލައިގެން ގެންގޮސްދީފައެވެ.
Is this @MartinKelly1990 helping an injured person in #Paris @CPFC pic.twitter.com/kmFxhSZVzM
— Gra (@seddo1984) November 14, 2015 ގިނަ ބަޔަކަށް އެއީ ކެލީކަން އެނގުނީ އެފޮޓޯ ނެގި މީހާ ޓްވިޓާގައި އެފޮޓޯ ޝެއާ ކުރުމުންނެވެ.
ފަހުން އޭނާ ވަނީ އެފޮޓޯއާއި ގުޅިގެން ޓްވިޓާގައި އެހާދިސާގެ ސަބަބުން އެއްވެސް ގެއްލުމެއް ނުވާކަމަށް ބުނެފައެވެ. ކްރިސްޓަލް ޕެލަސްއިން ވެސް ވަނީ އެކަން ޔަގީންކޮށްދީފައެވެ.
ޕެރިހުގައި ހިނގި ބޮމުގެ ހަމަލާގައި 130 މީހުން މަރުވިކަމަށް ވަނީ ރިޕޯޓްކޮށްފައެވެ.
އުމުރުން 25 އަހަރުގެ ކޭލީ އޭނާގެ ފުޓްބޯޅަ ކެރިއާ ފެށީ 2007 ވަނަ އަހަރު ލިވަޕޫލްއިންނެވެ. ލިވަޕޫލްގައި ހަތް އހަރު ހޭދަ ކުރުމަށްފަހު އޭނާ ކްރިސްޓަލް ޕެލަސްއަށް ބަދަލުވީ މިދިޔަ އަހަރުއެވެ.