އާންމުންނަށް ވެސް ބައިވެރިވެވޭ ގޮތަށް މާފުށި ޖަލުގައި ލޭ ހަދިޔާ ކުރުމުގެ ޕްރޮގްރާމެއް މިއަދު ފަށައިފި އެވެ.
އެ ޕްރޮގްރާމަކީ މާފުށީ ޖަލާއި އިމަޖެންސީ ސަޕޯޓް ގްރޫޕް (އީއެސްޖީ) އަދި މޯލްޑިވިއަން ބްލަޑް ސަވިސް ގުޅިގެން ކުރިއަށް ގެންދާ ހާއްސަ ޕްރޮގްރާމެކެވެ.
ލޭ ހަދިޔާ ކުރުމުގެ ޕްރޮގްރާމް ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ޑެޕިއުޓީ ކޮމިޝަނަރު އޮފް ޕްރިޒަންސް ހަސަން ޒިލާލް ވިދާޅުވީ އެ ޕްރޮގްރާމަކީ މާފުށީ ޖަލާއި އީއެސްޖީ އޮފިސަރުންގެ ވަރަށް ބޮޑު އިސްނެގުމަކާ އެކު ކުރިއަށް ގެންދާ ވަރަށް މުހިންމު ޕްރޮގްރާމެއް ކަމަށެވެ.
އެގޮތުން ލޭހޯދުމަކީ ވަރަށް ގިނަ މީހުންނަށް ވަރަށް ބޮޑު ތަކުލީފެއް އުފުލަން ޖެހިފައިވާ ކަމެއް ކަމަށާއި އެފަދަ އެހީތެރިކަމެއް މޯލްޑިވްސް ކަރެކްޝަނަލް ސަވިސްގެ ފަރާތުން ދިނުމަކީ މުއައްސަސާ ކުރިއަށް ގެންދިއުމަށް ވެސް ލިބޭ އިތުރު ހިތްވަރެއް ކަމަށެވެ.
އޭނާ ވިދާޅުވީ އެފަދަ އިތުރު ޕްރޮގްރާމްތައް ކުރިއަށް ގެންދިއުމަށް އަދިވެސް މަސައްކަތް ކުރައްވާ ކަމަށެވެ.
މިއީ މާފުށީ ޖަލުގައި ކުރިއަށް ގެންދާ ލޭ ހަދިޔާ ކުރުމުގެ ދެވަނަ ޕްރޮގްރާމެވެ.