ދުވަސްތަކަކަށް ފަހު ރަސްދޫގައި ކުލަގަދަ ބޮޑު އީދެއް!

އއ. ރަސްދޫއިން: އާދަމް ނަޒީރު

އއ. ރަސްދޫގައި އެންމެ ފަހުން ކުލަގަދަކޮށް އީދު ފާހަގަކޮށްފައި ވަނީ މީގެ ތިން އަހަރު ކުރިން ނެވެ. އެއީ 2012 ވަނަ އަހަރުގެ ތެރޭގައި އެވެ. އެހެންނަމަވެސް މި ރަށުގައި އަބަދުވެސް "ތަންކޮޅެއް އާދައިގެ" ގޮތަކަށް އީދު ފާހަގަކުރާކަމަށް ރަސްދޫ ރައްޔިތުން ބުނެ އެވެ. މި ރަށުގެ ވެސް އާބާދީގެ ބޮޑުބައެއް ހިއްސާކުރަނީ ޒުވާނުން ކަމަށް ވުމުން އެ ޒުވާނުންގެ ހިތްތަކުގައި ވެސް އީދު ފޯރި ހުރިލެއް ކުޑައެއް ނޫނެވެ. އެހެންކަމުން ރަށުގައި ބޮޑުކޮށް އީދު ފާހަގަ ނުކުރާތާ ގިނަ ދުވަސްތަކެއް ވެފަައިވާތީ ރަސްދޫ ޒުވާނުން ބޭނުންވީ ކުލަގަދަ ގޮތެއްގައި 1436 ވަނަ އަހަރުގެ އަޟްހާ އީދު ފާހަގަކުރާށެވެ.

"އަޅުގަނޑުގެ ގާތަށް ރަށުގައި އުޅޭ ޒުވާނުންތަކެއް އައީ. އައިސް ބުނީ މިފަހަރުގެ ބޮޑު އީދު ފުދޭވަރަކަށް ކުލަ ގަދަކޮށް ފާހަގަކުރަން އެކުދިން {ޒުވާނުން} ބޭނުންވާ ކަމަށް. އަދި އެކަމުގައި އަޅުގަނޑަށް ވެވެން އޮތް އެހީތެރިކަމެއް ވެދިނުމަށް އަޅުގަނޑުގެ ކިބައިން އެކުދިން އެދުން. އެގޮތުގެ މަތީން ރަށުގައި އުޅޭ ޒުވާނުންކޮޅެއް އިސްނަގައިގެން އަޅުގަނޑާ އެކީ ނުކުތީ އާރަސް ކިޔާ ގުރޫޕެއް ހަދައިގެން. މިފަހަރުގެ އީދު ކުލަގަދަކޮށް ފާހަގަކުރަން،" ރަސްދޫ އީދު ފާހަގަކުރުމުގައި އެންމެ އިސްކޮށް އުޅޭ މުހައްމަދު އަލީ (ދޮންބެ)،59، ބުންޏެވެ.

ރަސްދޫ އީދު ކުޅިވަރު: މިއަހަރުގެ އީދަށް ބޮޑު މަސް ތައްޔާރު ކުރަނީ -- ސަން ފޮޓޯ/ އަބްދުﷲ ހަފީޒު

ދޮންބެ ބުނީ މީގެކުރިން ވެސް ރަސްދޫގައި އީދު ކުޅިވަރު ކުޅުނު ކަމުގައިވިއަސް މިހާ ބޮޑުކޮށް އީދެއް ފާހަގަކުރާ މިއީ ފުރަތަމަ ފަހަރު ކަމަށެވެ. އެގޮތުން ދޮންބެ ބުނީ އެއްވެސް ފަރާތެއްގެ މާލީ އެހީ އަކާ ނުލައި ރަށުގެ ޒުވާން ބޮޑު ބެރު ގުރޫޕުން ބޮޑުބެރު ޖަހައިގެން ހޯދި ފައިސާއިން އީދު ކުޅިވަރުތަކަށް ހަރަދު ކުރަމުންދާ ކަމަށެވެ. ދޮންބެ ބުނީ މި އަހަރުގެ އަޟްހާ އީދު ފާހަގަ ކުރުމުގެ ގޮތުން ތަފާތު އެކި ކުޅިވަރުތައް ތައްޔާރު ކުރުމަށް 30،000 ރުފިޔާ ހަރަދުވެގެން ދިޔަ ކަމަށެވެ.

"ކުރެވިފައި ހުރި މަސައްކަތްތަކަށް ބަލާއިރު އަޅުގަނޑަށް ހީވީ ވަރަށް ރަނގަޅުހެން. އެއީ ހުރިހާ ޒުވާނުން ގުޅިގެން އަޅުގަނޑުމެން މިހާރު ވާނީ ސައުންޑު ސިސްޓަމެއް ގަނެފައި." ދޮންބެ ބުންޏެވެ.

ރަސްދޫ އީދު ކުޅިވަރު: ކޯޑި އަށް ތައްޔާރު ކުރަމުންދަނީ -- ސަން ފޮޓޮ/ އަބްދުﷲ ހަފީޒު

ރަސްދޫގައި އަޟްހާ އީދު ފާހަގަކުރުމުގެ ގޮތުން ބާއްވާ ކުޅިވަރުތައް:

• ކޯޑި
• މާލި ޕެރޭޑު
• ކޯޑި
• ބޮޑު މަސް
• ތިން މުގޯލި
• ބަށި
• ސްޓޭޖު ޝޯ

ދޮންބެ ބުނީ އެ ހުރިހާ ކުޅިވަރުތަކަށް ތައްޔާރުވާން ފެށިތާ އެންމެ ގިނަވެގެން ވެސް އަދި ވާނީ މަހެއްހާ ދުވަސް ކަމަށެވެ. އަދި އެގޮތުން އެންމެ ގިނަ ތައްޔާރީތަކެއް ވަމުންދަނީ މާލި ޕެރޭޑަށް ކަމަށް ދޮންބެ ބުންޏެވެ. އީދު ކުޅިވަރުތައް އިތުރަށް ފުރިހަމަކޮށް ރައްޔިތުންނާ ހަމައަށް ގެނެސްދޭން "ކިތަންމެހާވެސް" ބޭނުން ކަމަށާއި އެހެންނަމަވެސް ކުޅިވަރުތައް ކުޅުމާއި ތައްޔާރިތައް ވުމަށް ވެސް ހަރަކާތްތެރިވަނީ ވަޒީފާގައި އުޅޭ ޒުވާނުންކަމުން އެކުދިންނަށް އެވަރަށް ވަގުތު ދިނުން ދަތިވާ ކަމަށް ދޮންބެ ބުންޏެވެ.

ރަސްދޫ އީދު ކުޅިވަރުގެ އިސްކޮށް އުޅޭ މުހައްމަދު އަލީ (ދޮންބެ) "ސަން" އަށް އިންޓަވިއުދެނީ: ސަން ފޮޓޯ/ އަބްދުﷲ ހަފީޒު

"ހަގީގަތުގައި ފަރިތަކުރަންޖެހޭ ވަރަށް ފަރިތަނުކުރެވޭ. އެހެންނަމަވެސް ހަމަ ވަރަށް ފުރިހަމަ ވާނެ ކުޅިވަރުތައް އިނގޭތޯ. ހަގީގަތުގައި މިވާ ގޮތަކީ މި ހުރިހާ ކަމެއް ވެސް މި ކުރަމުން ދަނީ ޒުވާނުން. ހަމަ މުޅިންހެން ޒުވާނުން. ދެން އެކުދިން އެބަކުރަންޖެހޭ އެހެން މަސައްކަތްތައް ވެސް. ދިރިއުޅުމަށް ވެސް މަސައްކަތް ކުރަންޖެހޭނެ ދެއްތޯ. އެހެންވީމަ ޒުވާން ކުދިން ވެގެން މިކަމުގައި ހަރަކާތްތެރިވަނީ ސްޓޭޖު ތައްޔާރު ކުރުމަކަސް އެހެންކަމަކަސް،" ދޮންބެ ކިޔާދިނެވެ.

ދޮންބެ ބުނީ މިފަހަރުގެ ބޮޑު އީދު ކުޅިވަރުތަކުގެ ތެރެއިން ރައްޔިތުންނަށް އެންމެ ތަފާތު ކަމެއް ދައްކުވައި ދޭނީ މާލި ޕެރޭޑު ކަމަށެވެ. އަދި އެހެން ރަށްތަކުގައި މާލި ނެރުމާއި ރަސްދޫގައި މާލި ނެރޭގޮތް ތަފާތު ވާނެ ކަމަށް ދޮންބެ ބުންޏެވެ. އެހެންނަމަވެސް އެ ތަފާތު ފެނުމުގެ ކުރިން އެކަން ހާމަކުރަން ބޭނުން ނުވާ ކަމަށް ދޮންބެ ބުންޏެވެ.

ރަސްދޫ އީދު ކުޅިވަރު: ކޯޑި އަށް ތައްޔާރު ކުރަމުންދަނީ -- ސަން ފޮޓޮ/ އަބްދުﷲ ހަފީޒު

"ވަރަށް ތަފާތު ވާނެ އިނގޭތޯ މާލި ޕެރޭޑު. އެހެން ރަށްތަކާ ވެސް ވަރަށް ބޮޑަށް ތަފާތު ވާނެ. އެއީ މާލީގައި ބޭނުން ކުރާ ތަކެއްޗަށް ދަންދެން ވަރަށް ތަފާތު ވާނެ،" މާލި ޕެރޭޑާ ގުޅޭ ގޮތުން ދޮންބެ ބުންޏެވެ.

ދޮންބެ ބުނީ ރަސްދޫގައި މީގެކުރިން އީދު ފާހަގަކުރުމަށް ކޮށްފައިވާ ކަންތައްތައް ދިރުވައި އާލާ ކުރަން ބޭނުންވާ ކަމަށެވެ. އެހެންނަމަވެސް ޒަމާން ބަދަލުވާ ވަރަކަށް ކުޅިވަރުތައް ވެސް ޒަމާނީ ކުރަން ޖެހޭނެ ކަމަށް ދޮންބެ ގަބޫލު ކުރެ އެވެ. އެގޮތުން ދޮންބެ ބުނީ އީދު ފާހަގަކުރުމުގެ ގޮތުން މިފަަހަރު ރަސްދޫގައި ކުޅޭ ކުޅިވަރުތަކަކީ ޒަމާނާ އެއްގޮތަށް "ޒަމާނީ ގޮތްގަނޑު" ދައްކުވައިދޭނެ ކުޅިވަރުތަކެއް ކަމަށެވެ.

މީގެ ކުރިން މިގޮތަށް ކުލަގަދަކޮށް އީދު ކުޅިވަރުތައް ބާއްވާފައި ނުވި ނަމަވެސް މިރަށް ބަލައިލުމުން އެއްވެސް ވަރަކަށް މިކަން ފާހަގައެއް ނުކުރެވެ އެވެ. އެގޮތުން ރަސްދޫގައި މި އަހަރުގެ އަޟްހާ އީދުގެ ކުޅިވަރުތައް ބަލާލުމަށް ރާއްޖޭގެ އެކި ރަށްރަށުން ވަނީ މީހުން ޖަމާވެ ތޮށްޖެހިފައެވެ. ރަށުގައި ހުރިއްޔާ ހުރި ގެސްޓު ހައުސްތަކެއް ވެސް މިހާރު ވަނީ ފުލުވެފައެވެ.