ގައުމީ ފުޓްބޯޅަ ޓީމްގެ ކޯޗްގެ މަގާމުގައި ހުރި ބަލްގޭރިއާގެ ވެލިޒާ ޕޮޕޯޕަށް އެ މަގާމު ގެއްލުނީ އޭނާގެ އެޓިޓިއުޑް ހުރިގޮތުން ވާސިލްވާން ބޭނުންވާ އަމާޒަށް ވާސިލުވުމުގައި ހުރަސްތަކެއް ހުރުމުން ކަމަށް އެފްއޭއެމް ނޯމަލައިޒޭޝަން ކޮމިޓީގެ ޗެއާމަން މުހައްމަދު ޝަވީދު ވިދާޅުވެއްޖެ އެވެ.
މިއަދު އެފްއޭއެމް ހައުސްގައި ބޭއްވި ނިއުސްކޮންފަރެންސްގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ޝަވީދު ވިދާޅުވީ، ވޭތުވެދިޔަ ދުވަސްތަކުގައި އެފްއޭއެމްގެ ޓެކްނިކަލް ޓީމުން ބެލި ބެލުމުންނާއި ކުރި އިންވެސްޓިގޭޓްތަކުން ޕޮޕޯފް ލައިގެން ސާފް ޗެމްޕިއަންޝިޕްގެ ޓާގެޓް ހާސިލު ކުރުމީ ފަސޭހަކަމަކަށް ނުވާނެކަމަށް ކޮމިޓީން ނިންމާފައިވާ ކަމަށެވެ.
މިއަދުގެ ނޫސް ކޮންފަރެންސްގައި ޝަވީދު ވަނީ ޕޮޕޯފަށް ވަޒީފާ ގެއްލެން މެދުވެރިވާން ދިމާވި ގިނަ ސަބަބުތަކެއް ހާމަކުރައްވާފައެވެ.
ޝަވީދު ވިދާޅުވީ ވޯލްޑްކަޕް ކޮލިފައިން ފުރަތަމަ މެޗް ގަތަރާ ދެކޮޅަށް ކުޅުމުގެ ކުރިން ރާއްޖެއަށް އިންޓަނޭޝަނަލް ފްރެންޑްލީ މެޗްތަކެއް ލިބުނު ކަމަށާއި ނަމަވެސް އެއިން ކޮންމެ މެޗެއް ޕޮޕޯފް ރިޖެކްޓް ކުރިކަމަށެވެ.
"ކޮލިފައިންގައި އަޅުގަނޑުމެންނާ އެއްކޮށް ކުޅެމުން އައި ޓީމްތައް އައީ ކޮލިފައިން މެޗްތަކުގެ ހަތް ދުވަސް ކުރިން ފަސް ދުވަސް ކުރިން ބައިނަލްއަގުވާމީ މެޗްތަކެއް ކުޅެމުން. ބައެއް ޓީމްތަކުން ދެމެޗް ތިންމެޗްވެސް ވަނީ ކުޅެފައި. އަޅުގަނޑުމެން ކޯޗަށް ރެކޮމެންޑް ކުރިން ގަތަރާ ދޮކޮޅަށް ކުޅުމުގެ ކުރީގައިވެސް އިންޓަނޭޝަނަލް ފްރެންޑްލީ މެޗަކަށް. އަފުގާނިސްތާން ރާއްޖެއަށް އަންނަން އެއްބަސްވި. އޮމާން ދިވެހިރާއްޖެއަށް އަންނަން އެއްބަސްވި. ސިންގަޕޫރު ރާއްޖެ އަންނަން އެއްބަސްވި އެހެންނަމަވެސް މިއިން އެއްވެސް މެޗަކަށް ކޯޗް އެއްބަހެއް ނުވި. ކޮރެއާ ކޭމްޕަށް ދިޔައިރު ކޮރެއާގެ ފަސްޓް ޑިވިޝަންގެ އެންމެ ޓޮޕް ޓީމާއެކު ކުޅެން ފުރުސަތު ދިނިން އެވެސް ރިޖެކްޓް ކުރި،" ޝަވީދު ވިދާޅުވިއެވެ.
މިއަދުގެ ނިއުސް ކޮންފަރެންސްގައި ޝަވީދު ވާހަކަ ދައްކަވަނީ --- ސަން ފޮޓޯ/ ޔޫސުފް ޞޮފްވާން
ޝަވީދު ވިދާޅުވީ ޕޮޕޯފްގެ ކޮންމެ ކަމެއްވެސް ދިޔައީ ސެލެބްރިޓީ ސްޓައިލަށް ކަމަށާއި އެހެންވެ އޭނާ ބެލީ އެފަދަ މެޗްތަކުން ބަލިވެއްޖެނަމަ މީހުންގެ ފަރާތުން އަންނާނެ ކްރިޓިސިޒަމުން ސަލާމަތްވެ ހުރުމަށް ކަމަށެވެ.
ޝަވީދު ވިދާޅުވީ، ނޫސްތަކުގައި މީހުން ކުރާ ކޮމެންޓްތަކަށް ބަލައިގެން ކޯޗެއްގެ ކޯޗިން ކެރިއާ ބިނާ ނުކުރެވޭނެ ކަމަށާއި އަޅުގަނޑުމެން ހާސިލު ކުރަން ބޭނުންވާ ޓާގެޓް ހާސިލުކުރުމަށް ބަލިތަކެއްވެސް ވެދާނެ ކަމަށާއި ނަމަވެސް އާހިރުގައި އަޅުގަނޑުމެން ބޭނުންވާ ގޯލްވެސް ހާސިލު ކުރެވޭނެކަމަށެވެ.
މީގެ ކުރިން ގައުމީ ޓީމަށް އަންނަ ކޮންމެ ކޯޗެއްގެވެސް އެންމެ ބޮޑު ޝަކުވާއަކީ ޕްރެކްޓިސް މެޗްތަކެއް ނުވަތަ ބައިނަލްއަގުވަމީ ރަހުމަތްތެރިކަމުގެ މެޗެއް ނުލިބުން ކަމަށާއި ނަމަވެސް ކުރިއަށް އޮތް ޗައިނާގެ މެޗްގެ ކުރިން އިންޑިއާއި ފިލިޕީންސާއި ސިންގަޕޫރާއެކު މެޗްތަކެއް ކުޅެން ލިބުނު ނަމަވެސް އެމްޗްތައްވެސް ޕޮޕޯފް ރިޖެކްޓްކޮށްފައިވާ ކަމަށް ޝަވީދު ވިދާޅުވިއެވެ.
ޝަވީދު ވިދާޅުވީ، ކޯޗާ ބެހޭގޮތުން ބޮޑެތި ޑިސިޕްލިނަރީ މައްސަލަތަކެއް އެފްއޭއެމްއަށް ހުށަހެޅުނު ކަމަށާއި ސީދާ އެފްއޭއެމްގެ އިސްފަރާތްތަކަށްވެސް އެކަންތައްތައް ފެނިފައިވާ ކަމަށެވެ.
"ކޯޗާއި ބެހޭގޮތުން ބޮޑެތި ޑިސިޕްލިނަރީ މައްސަލަތަކެއް ހުށަހެޅިގެން ދިޔަ. އެއީކީ އެއްގޮތަކަށްވެސް ޕްލޭޔާސްގެ ފަރާތުން ހުށަހެޅިފައިވާ ކަންތައްތަކެއް ނޫން. އެހެން ނަމަވެސް ކޯޗްގެ ޑިސިޕްލިންނާއި ކޯޗާއި ކުޅުންތެރިންނާ ދެމެދު ގެންގުޅޭ ވައިބާ ގުރޫޕްތަކުގައި ސީދާ އަޅުގަނޑުމެންގެ ހަމަ ލޮލުން ބަލާފައި ފެނިފައި ހުރި އެފޮޓޯތަކާއި އެމަންޒަރުތައް. އެއެއްޗިއްސަކީ އަޅުގަނޑުމެން ގަބޫލު ކުރާނެ ކަންތައްތަކެއް ނޫން،" ޝަވީދު ވިދާޅުވިއެވެ.
ފަހުވަގުތު ޕޮޕޯފްގެ ވާހަކަތައް ހުރީ ވަރަށް ބޮޑަށް މީޑާއާއަށް ފޯކަސްކޮށްފައި ކަމަށް ޝަވީދު ވިދާޅުވިއެވެ.
އެގޮތުން އައިއޯއަޖީގެ ރާއްޖޭގެ ކުޅުންތެރިން އިސްކަން ދިނީ ބޯ ހެދުމަށާއި އަންހެން ކުދިންނާއެކު ސެލްފީ ނެގުމުގެ ވާހަކަތަކެއް އަޑު އިވެގެން ދިޔަކަމަށާއި ނަމަވެސް ކުޅުންތެރިންނަށް ސިމްކާޑުވެސް ލިބުނީ ކޯޗް އެހެން ބުނިތާ ދެދުވަސް ފަހުން ކަމަށެވެ.
ޝަވީދު ވިދާޅުވީ، ކޯޗާއި ޓީމް ހަވާލުކުރުމަށްފަހު ގައުމު ވަންތަ ބަޔަކަށް ކުޅުންތެރިން ހެދުމަށް އެދުނިން ކަމަށާއި ނަމަވެސް ފެނިގެން ދިޔައީ މެޗެއް ކުޅުމުގެ ކުރިން ދެތިން އެއްޗެއް ބުނެލާފައި މެޗަށް ނިކުތުމުގެ ނަތީޖާކަމަށާއި އެހެންވެ ކޯޗާއި ގުޅޭ ޑެސިޝަނެއް ނިންމީ އެހުރިހާ ކަމަކަށް ވިސްނުމަށްފަހުގައި ކަމަށެވެ.
ކޯޗުގެ މައްސަލައިގައި ނަގަންޖެހޭ ޑެސިޝަން ލަސްކޮށް އިންޒާރު ދިނުމަށްފަހު ކުރިއަށް ގެންގޮސްފިނަ އަޅުގަނޑުމެން ހާސިލު ކުރަން ބޭނުންވާ ޓާގެޓް ހާސިލުކުރުމަށް ދާއިރު ޓީމްތެރޭގައި މާބޮޑެތި މައްސަލަ އޮވެދާނެކަމަށް ގަބޫލު ކުރެވޭ ކަމަށްވެސް ޝަވީދު ވިދާޅުވިއެވެ.
ޝަވީދު ވިދާޅުވީ، އެފްއޭއެމްއިން ކޯޗް ވަކި ކުރީކަމަށް ބައެއް ފަރާތްތަކުން ވާހަކަ ދެއްކި ނަމަވެސް ކޯޗް އަމިއްލައަށް ދިއުމަށް ފުރުސަތު ދިނީކަމަށެވެ.