ހުޅުމާލޭގައި ފުލުހަކަށް ފިލަން ދުއްވަނިކޮށް އެކްސިޑެންޓްވެ ޒުވާނަކު މަރުވި މައްސަލަ ޕޮލިސް އިންޓެގްރިޓީ ކޮމިޝަން (ޕީއައިސީ) އަށް ހުށަހަޅައިފި އެވެ.
އެ މައްސަލަ ޕީއައިސީއަށް މިއަދު ހުށަހަޅާފައި ވަނީ އަމިއްލަ ފަރާތަކުންނެވެ.
ޕީއައިސީގެ ރައީސާ ފާތިމަތު ސަރީރާ އަލީ ޝަރީފް މިއަދު ސަން އަށް ވިދާޅުވީ އެ މައްސަލަ އެކޮމިޝަނަށް މިއަދު ހުށަހަޅާފައިވާ ކަމަށާއި އެކަމާ ގުޅޭ ގޮތުން އަދި ވަކި ގޮތެއް ނުނިންމާ ކަމަށެވެ.
ސަރީރާ ވިދާޅުވީ މިއަދު އެ މައްސަލަ ބެލުމަށް ފަހު ވަކި ގޮތެއް ނިންމާނެ ކަމަށެވެ.
އިއްޔެރޭ ހިނގި އެ އެކްސިޑެންޓްގައި ޒަހަމުވި ދެ މީހުންގެ ތެރެއިން އެކަކު ވަނީ މަރުވެފަ އެވެ. އަދި އަނެއް މީހާގެ އަތާއި ފައި ދެ ތަނުން ބިނދިފައިވާ ކަމަށް ފުލުހުން ބުނެ އެވެ.
ފުލުހުންނަށް ފިލަން ދުއްވި ސައިކަލެއް ކާރެއްގައި ޖެހި ހިނގި އެކްސިޑެންޓާ ގުޅޭ ގޮތުން ފުލުހުން ބުނެފައި ވަނީ އެމީހުން ދުއްވާފައި ދިޔަ އިރު، އެއްޗެއް އެއްލާލި މަންޒަރު ފެނުނު ކަމަށެވެ. އަދި ފުލުހުން ގޮސް ބެލި އިރި މަސްތުވާތަކެތި އަޅާފައި ހުރި ހަ ސެލޯފިންކޮޅު ފެނިފައިވާ ކަމަށެވެ.