އާޖެންޓީނާގެ ކެޕްޓަން ލިއޮނަލް މެސީއަކީ އަދި ވެސް ދަނޑުމަތީގައި ހަމަ އެއްވަނަ ކަމަށާއި މެސީގެ ހުނަރާއި ފަންވަރު ކުރިއަށްވުރެ ވެސް މިހާރު ރަނގަޅު ކަމަށް ބާސެލޯނާގެ ކުރީގެ ކެޕްޓަން ކާލްސް ޕުޔޯލް ބުނެފިއެވެ.
މެސީގެ ހުނަރުވެރިކަމާ ފަންވަރަށް ތައުރީފް ކުރަމުން މިހާރު އުމުރުން 37 އަހަރުގެ ޕުޔޯލް ބުނީ، އެ ދެ ކުޅުންތެރީން ބާސާގެ ޓްރެއިނިން ސެޝަނެއްގައި އެއްދުވަހަކު 'ވަން ޓު ވަން' މިނީ ގޭމެއް ކުޅެން ޖެހުމުން މެސީގެ އަސްލު ބުންވަރާއި ފެންވަރު އޭނާއަށް އެނގުނު ކަމަށާއި އެ ދުވަހު މެސީ އޭނާ އަވަދިކޮށް ނުލީ ކިރިޔާ ކަމަށެވެ.
"އެއްދުވަހަކު އަހަރެމެން ދެ މީހުން ޖެހުނީ ޓްރެއިނިންގައި އެކަކު އަނެކަކާ ވާދަކުރަން. އަހަރެން އަމިއްލައަށް ހިތާހިތާކިޔާލިން 'އަހަންނަށް އޭނަ ހުއްޓުވިދާނެބާ'އޭ. އެކަމަކު ލަދުން ހަލާކުނުވީ ކިރިޔާ،" ސްޕެއިންގެ ނޫހެއް ކަމަށްވާ ލަވަން ގުއާޑިއާއަށް ޕުޔޯލް ކިޔައިދިނެވެ.
ޕުޔޯލް ބުނީ، އެ ދުވަހު ޓްރެއިނިން ތެރޭގައި އެ ކްލަބްގެ ކޯޗު ޕެޕް ގާޑިއޮލާ އޭނާ ކައިރީ މެސީ އިންޖަރީކޮށް ނުލުމަށް ބުނި ކަމަށެވެ.
"އަހަރެން ޕެޕްއަށް ބުނިން. އެފަދަ އެއްވެސް ކަމެއް ވާން ބޭނުން ނޫންކަމަށް ވަންޏާ މި ޓްރެއިނިން ސެޝަން އަވަހަށް ނިންމާލާ. އަހަރެން ބޯޅަ ހޯދަން އަހަންނަށް ކުރެވުނު ހުރިހާ މަސައްކަތެއް ކުރިން. އެކަމަކު އޭނާ [މެސީ] ކޮންމެ ފަހަރަކުވެސް ފަސޭހަކަމާއެކު ބޯޅަ ހިފައިގެން ދެމިގަނޭ."
ބާސާގެ ކުރީގެ ކެޕްޓަން ފުޓްބޯޅައިން ރިޓަޔާކުރީ 2014 ވަނަ އަހަރު އެވެ. އޭނާ ވަނީ މެސީއާ އެކު އެ ކްލަބުގައި ޗެމްޕިއަންސް ލީގު ތިން ފަހަރު އަދި ސްނިޝް ލީގު ހަފަހަރު ކާމިޔާބުކޮށްފަ އެވެ.
ޗިލީގައި މިހާރު ކުރިއަށްދާ ކޮޕަ އެމެރިކާގެ ސެމީ ފައިނަލްގައި އަންގާރަ ދުވަހު ޕެރަގުއޭއާ ދެކޮޅަށް އާޖެންޓީނާ ނުކުންނައިރު، މިހާރު އުމުރުން 28 އަހަރުގެ މެސީއާ ބެހޭ ގޮތުން ޕުޔޯލް ބުނީ، ބާސާއި ޔޫރަޕްގެ ފުޓްބޯޅަ ކޮންޓްރޯލް ކުރި ދުވަސްވަރު މެސީގެ ފަރާތުން ފެނުނު ކުޅުމަށްވުރެ މިހާރު އޭނާގެ ކުޅުން ރަނގަޅުވެއްޖެ ކަމަށާއި މެސީ އުޅެނީ އެހެން ހުރިހާ ކުޅުންތެރީންނަށް ވުރެ އަދިވެސް އެތައް ދަރަޖައެއް ކުރީގައި ކަމަށެވެ.
"އެއީ [މެސީއަކީ] އޭލިއަންއެއް. މީގެ ހަތަރު އަހަރު ކުރީން ހުރިވަރަށްވުރެ އޭނާ މިހާރު ރަނގަޅު. ސަބަބަކީ މިހާރު އޭނާ މެޗުގެ ތެރެއަށް މާރަނގަޅަށް ވަދޭ. އޭނައެއް ނުހުއްޓުވޭނެ،" މެސީއަކީ މިހާތަނަށް ފެނުނު އެންމެ ހުނަރުވެރި ކުޅުންތެރިޔާގެ ގޮތުގައި ސިފަކުރަމުން ޕުޔޯލް ބުންޏެވެ.