ޕާކިސްތާނުގައި ހަރަކާތްތެރިވި އެޑިއުކޭޝަނަލް އެކްޓިވިސްޓެއް ކަމަށްވާ، މަލާލާ ޔޫސަފްޒައީއަށް ހަމަލާދިނުމުގެ ކުށުގައި 10 މީހަކަށް އެގައުމުގެ ކޯޓަކުން އުމުރު ދުވަހުގެ ޖަލުހުކުމް އިއްވައިފިއެވެ.
މަލާލާގެ ބޮލަށް ބަޑިޖަހައި، ބަޔަކު ހަމަލާދިނީ 2012 ވަނަ އަހަރުގެ އޮކްޓޯބަރު މަހުގެ 12 ވަނަ ދުވަހު ސުވާތު ވާދީގެ މިންގޯރާގައި ދުއްވާފައިދިޔަ ސްކޫލް ބަހެއްގެ ތެރޭގައި އޭނާ އިންދައެވެ. ދުނިޔޭގެ މީޑިއާގެ ސަމާލުކަން ލިބުނު އެ ހާދިސާ ހިނގިއިރު، މަލާލާގެ އުމުރަކީ އެންމެ 15 އަހަރެވެ. މަލާލާގެ ބޮލަށް ބަޑި ޖަހައި، ފުރާނަ އަށް ނުރައްކާ ވާ މިންވަރަށް އޭނާ ޒަޚަމް ކޮށްލި އެހަމަލާގައި އޭނާއާ އެކު އެވަގުތު ބަހުގެ ތެރޭގައި ތިބި އޭނާގެ ދެ ރަހްމަތްތެރީންނަށް ވެސް ބޮޑެތި ޒަޚަމްތަކެއް ލިބުނެވެ.
ކުޑަކުދިންގެ ހައްގުގައި މަލާލާ ކުރަމުން އަންނަ މަސައްކަތްތަކުގެ އަގުވަޒަންކޮށް މިދިޔަ އަހަރު، އޭނާއަށް ވަނީ، ނޯބެލް ޕީސް ޕްރައިޒް އެވޯޑު ދީފައެވެ. އެގޮތުން އޭނާ ވެގެން ގޮސްފައިވަނީ، އެންމެ ހަގު އުމުރުގައި އެ އެވޯޑު ހާސިލްކުރި ފުރަތަމަ ފަރާތަށެވެ.
މަލާލާ ޔޫސަފްޒައިއަށް ވަނީ، ކުޑަކުދީންގެ ހައްގުގައި އޭނާ ކުރަމުން އަން ކެމްޕޭންތަކުގެ ސަބަބުން 2014 ވަނަ އަހަރު ނޯބެލް ޕީސް ޕްރައިޒް ލިބިފައި -- ފޮޓޯ: ބީބީސީ
ޕާކިސްތާނުގެ އޮފިޝަލަކާ ހަވާލާދީ ބީބީސީގައި ބުނެފައިވަނީ، މަލާލާއަށް ހަމަލާދިނުމުގެ ކުށުގައި އުމުރުދުވަހަށް ޖަލަށްލީ 10 މީހުންގެ ތެރޭގައި އޭނާއަށް ހަމަލާދިނުމުގައި އެންމެ އިސްކޮށް ހަރަކާތްތެރިވި ޕާކިސްތާނުގެ ޠާލިބާނުންނަށް ނިސްބަތްވާ އަތާއުﷲ ޚާން، 23 ނުހިމެނޭ ކަމަށެވެ.
ސުވާތުގެ އެންޓި-ޓެރަރިޒަމް ކޯޓަކުން ކުރިއަށް ގެންދިޔަ މި ޝަރީއަތުގައި ބުރާސްފަތި ދުވަހު ހުކުމްއިއްވި މީހުންގެ ތެރޭގައި، ސްކޫލް ބަހަށް ބަޑިހިފައިގެން އަރައި، މަލާލާއަށް ހަމަލާ ދިން މީހާވެސް ނުހިމެނޭ ކަމަށް ނަންހާމަކުރަން ނޭދޭ ޕޮލިސް އޮފިސަރަކާ ހަވާލާދީ ބީބީސީގައި ބުނެފައިވެއެވެ.
އުމުރު ދުވަހުގެ ޖަލުހުކުމެއް އިއްވާފައިވާ 10 މީހުންގެ މައްޗަށް ސާބިތުވެފައިވަނީ، ކޮންކޮން ކުށްތަކެއްކަން ހާމަކޮށްފައި ނުވާއިރު، ޕާކިސްތާނުގެ އޮފިޝަލުން ގަބޫލުކުރައްވާ ގޮތުގައި، މަލާލާއަށް ދިން ހަމަލާއަކީ، މިހާރު އަފްޣާނިސްތާނުގައި ފިލައިގެން އުޅޭކަމަށް ބެލެވޭ، ތާލިބާނުންގެ ލީޑަރު މުއްލާ ފަޒްލުﷲގެ އަމުރަށް ދިން ހަމަލާއެކެވެ.
މިހާރު އުމުރުން 17 އަހަރުގެ މަލާލާގެ ބޮލަށް ލިބުނު ސީރިއަސް ޒަޚަމުތަކަށް ފަރުވާ ދީފައިވަނީ، އިނގިރޭސި ވިލާތުގައެވެ. އަދި ޠާލިބާނުންގެ އިންޒާރުތަކާ ގުޅިގެން ޕާކިސްތާނަށް ދެވޭނޭ ގޮތެއް ނެތުމުގެ ސަބަބުން މަލާލާ އޭނާގެ އާއިލާއާ އެކު މިހާރު އޭނާ ދިރިއުޅެމުން އަންނަނީ، ބާމިންހަމްގައެވެ.
ޕާކިސްތާނުގެ ސުވާތު ވާދީއަށް 1997 ވަނަ އަހަރު އުފަންވި މަލާލާ ޔޫސަފްޒައީ އަކީ، "ޠާލިބާނުންގެ އަޅުވެތިކަމުގެ ދަށުގައި ދިރިއުޅުން" މި މައުލޫއަށް 2009-10އަށް ކާކުކަން ނޭނގޭ ގޮތަށް ބީބީސީ ބްލޮގަށް ލިޔުނު ކުއްޖެކެވެ. އިންޓަނޭޝަނަލް ޗިލްޑްރެންސް ޕީސް ޕްރައިޒަށް 2011 ވަނަ އަހަރު ނޮމިނޭޓްވި، މަލާލާ ވަނީ 2013 ވަނަ އަހަރު އދ.ގައި ތަގުރީރުވެސް ކޮށްފައެވެ.