ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހްމަދު ނާޒިމް އުމުރަށް ޖަލަށްލުމަށް ސުޕްރީމް ކޯޓުން ހުކުމް ކޮށްފި އެވެ.
ނާޒިމްގެ މައްޗަށް އެ ހުކުމް އިއްވާފައި ވަނީ ކުރީގެ އެޓޯލްސް މިނިސްޓްރީއަށް 15،000 ގައުމީ ދިދަ ގަތުމަށް އެ މިނިސްޓްރީން 31 ޑިސެމްބަރު 2003 ވަނަ ދުވަހު ކުރި އިއުލާނާ ގުޅިގެން ނާޒިމްގެ ހިއްސާ އޮންނަ ނަމީރާ އިންޖިނިއަރިން ޕްރައިވެޓް ލިމިޓެޑުގެ މުވައްޒަފުން ބޭނުންކޮށްގެން ވުޖޫދުގައި ނެތް ހަތަރު ކުންފުންޏެއްގެ ނަމުގައި އެސްޓިމޭޓު ހުށަހަޅައި މަކަރާއި ހީލަތުން އެ ބިޑު ކާމިޔާބު ކުރި މައްސަލައާ ގުޅިގެންނެވެ.
ކްރިމިނަލް ކޯޓާއި ހައިކޯޓުން އެ މައްސަލާގައި ކުރި ހުކުމްގައި ވަނީ ނާޒިމާ ދެކޮޅަށް ދައުލަތުން ހުށަހަޅާފައިވާ ހެކީންގެ ބަޔާންތަކަށް ބަލާއިރު، އެފަރާތްތަކަކީ ކުށް އަމަލީގޮތުން ކުރި މީހުން ކަމުގައިވާތީ އެ ފަރާތްތައް ހެކީންގެ ގޮތުގައި ބަލައިގެން ނާޒިމްގެ މައްޗަށް ޖިނާއީ ދައުވާ ކުރެވެން ނެތް ކަމަށެވެ.
އެ ދެ ކޯޓުން ކުރި ހުކުމް ބާތިލްކޮށް ސުޕްރީމް ކޯޓުން މިއަދު އިއްވި ހުކުމްގައި ވަނީ، އެ މައްސަލާގައި ހެކިބަސްދީފައި ވަނީ ނަމީރާގެ މުވައްޒަފުން ކަމަށްވާއިރު، އެފަރާތްތަކަކީ ވެރިން އަންގާ އެންގުންތަކަށް އަމަލު ކުރާ ބައެއް ކަމަށާއި ކުށުގެ އަމަލުގައި މުވައްޒަފުންގެ އަމިއްލަ މަސްލަހަތެއް ނެތް ކަމަށެވެ. އަދި ކުށުގެ އަމަލުން އެ މުވައްޒަފުންނަށް ލިބުނު އެއްވެސް މަންފާއެއް ނެތް ކަމަށާއި އެފަދަ ހާލަތެއްގައި ކުންފުނީގެ މުވައްޒަފުން އެތަނުގެ ވެރިމީހާއާ ދެކޮޅަށް ހުށަހަޅާ ހެކީންގެ ގޮތުގައި ބަލައިގަނެވޭނެ ކަމަށް އެ ހުކުމްގައި ވެއެވެ.
މަކަރާއި ހީލަތުން ނާޒިމް ނެންގެވި ކަމަށް ސާބިތުވާ އެއްމިލިއަން ހަތަރު ލައްކަ ފަންސަވީސްހާސް ރުފިޔާ އަނބުރާ އެޓޯލްސް މިނިސްޓްރީއަށް ރައްދުކޮށްފައިވާކަން އެޓޯލްސް މިނިސްޓްރީގެ ސިޓީއަކުން އެނގެން އޮންނާތީ، ދައުލަތުން އެދިފައިވާ ފަދައިން އެފައިސާ ނާޒިމްގެ ފަރާތުން ހޯދުމަށް އަމުރު ކުރެވެން ނެތް ކަމަށް ވެސް އެ ހުކުމްގައި ވެއެވެ.
އެ ހުކުމްގައި ވަނީ އެ ފައިސާ އެޓޯލްސް މިނިސްޓްރީން ޖަމާކުރީ ނާޒިމްގެ ހިއްސާ އޮންނަ ނޭޒާ އެންޓަޕްރައިޒަސް ޕްރައިވެޓް ލިމިޓެޑުން ބޭންކް އޮފް މޯލްޑިވްސްގައި ހުޅުވާފައިވާ އެކައުންޓަކަށްކަން އެ ބޭންކުގެ ޗެކުތަކުންނާއި ލިޔުންތަކުން އެނގެން އޮންނަ ކަމަށެވެ.
ނާޒިމާއި ނަމީރާގެ އިސްވެރިންގެ އިރުޝާދުގެ ދަށުން ކުންފުނީގެ މުވައްޒަފުން އެސްޓިމޭޓު ހުށަހަޅައި މަކަރާއި ހީލަތުން އެސްޓިމޭޓު ކާމިޔާބުކޮށްފައިވާކަން ހުށަހެޅިފައިވާ ލިޔުންތަކާއި ޝަރީއަތުގައި ދައުލަތުންގެ ފަރާތުންނާއި ނާޒިމްގެ އިތުރުން ހެކީން ދައްކާފައިވާ ވާހަކަތަކުން އެނގޭ ކަމަށް ވެސް އެ ހުކުމްގައި ވެއެވެ.
ގާނޫނު އަސާސީގެ 73 ވަނަ މާއްދާގެ (ނ) ގެ ދެ ވަނަ ނަންބަރުގައި ބުނެފައި ވަނީ ޖިނާއީ ކުށެއް ސާބިތުވެ، އެއް އަހަރަށް ވުރެ ދިގު މުއްދަތެއްގެ ހުކުމެއް ތަންފީޒު ކުރަމުންދާ މީހެއް ނަމަ ރައްޔިތުންގެ މަޖިލީހުގެ މެންބަރު ކަމުން އެ މީހަކު ވަކިވާނެ ކަމަށެވެ.