މިދިޔަ އަހަރުގެ ދެވަނަ ޑިވިޝަންގައި ވާދަކުރި، ރާއްޖޭގެ ކުރީގެ ޗެމްޕިއަން ވީބީ އައްޑޫ އެފްސީ، ޑިސިޕްލިނަރީ މައްސަލަތަކެއްގެ ސަބަބުން ތިން ވަނަ ޑިވިޝަނަށް ރެލިގޭޓް ކޮށްފި އެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މިއަދު ބުނީ، ވީބީ ތިންވަނަ ޑިވިޝަނަށް ރެލިގޭޓް ކުރުމުން، ދެވަނަ ޑިވިޝަންގެ އެ ޖާގަ ކްލަބް ވިޔަންސާއަށް ލިބިފައިވާ ކަަމަށެވެ.
މަދު ދުވަސްކޮޅެއްގެ ތެރޭގައި ރާއްޖޭގެ ފުޓްބޯޅައިގެ އެންމެ ގަދަ ބާރުގެ ގޮތުގައި ފާހަގަވެގެން ދިޔަ، ވީބީ ދެވަނަ ޑިވިޝަނަށް ރެލިގޭޓްވީ، 2013 ވަނަ އަހަރުގެ ދިވެހި ލީގު ކޮލިފިކޭޝަންގައި ވިކްޓަރީ އަތުން 3-2 ލަނޑުން ބަލިވުމުންނެވެ.
އެފްއޭއެމުން ބުނީ، "20 ސެޕްޓެންބަރު 2014 ވަނަ ދުވަހު ޓީސީ ސްޕޯޓްސް ކްލަބާ ދެކޮޅަށް ވީބީ ކުޅުނު މެޗު ކުރިއަށް ދަނިކޮށް، މެޗުގެ 49 ވަނަ މިނިޓްގައި ވީބީ އައްޑޫ އެފްސީން މެޗުގެ ކުޅުން ހުއްޓާލައި ދަނޑުން ފޭބި މައްސަލަ މި އެސޯސިއޭޝަންގެ ޑިސިޕްލިނަރީ ކޮމެޓީން ބެލުމަށްފަހު، ލިބިފައިވާ މެޗު ކޮމިޝަނަރުގެ ރިޕޯޓަށާއި، މެޗު ރެފްރީ ހުށަހަޅުއްވާފައިވާ ބަޔާނަށާއި އަދި އޮފިޝަލުން ދައްކަވާފައިވާ ވާހަކަތަކަށް ރިއާޔަތްކޮށް، އެފްއޭއެމްގެ ޑިސިޕްލިނަރީ ކޯޑުގެ 26 ވަނަ މާއްދާގެ ދަށުން 3-0 އިން ވީބީ އައްޑޫ އެފްސީ އެދުވަހުގެ މެޗުން ބަލިވީ ކަމުގައި ޑިސިޕްލިނަރީ ކޮމިޓީގެ އިއްތިފާގުން ވަނީ ނިންމާފައި،" ކަމަށެވެ.
އަދި އެފްއޭއެމްގެ ޑިސިޕްލިނަރީ ކޯޑުގެ 26 ވަނަ މާއްދާއާއި ފީފާގެ ޑިސިޕްލިނަރީ ކޯޑުގެ 56ގެ، 2 އާއި 12 ވަނަ މާއްދާގެ ދަށުން ވީބީގެ އެއް ޕޮއިންޓު އުނިކުރަން ނިންމުމުން އެޓީމު ތިންވަނަ ޑިވިޝަނަށް ރެލިގޭޓް ވެފައިވާ ކަމަށް ރާއްޖޭގެ ފުޓްބޯޅައިގެ މައި އިދާރާއިން ވަނީ ބުނެފައެވެ.
"މި ނިންމުމާއެކު ދެވަނަ ޑިވިޝަން 2014ގެ ނަތީޖާތަކަށް ބަލާއިރު، ވީބީ އައްޑޫ އެފްސީއަށް އެ ފުރުސަތު ގެއްލުމުން، ދެން އޮޓަމެޓިކުން އެ ޖާގަ ލިބެނީ ވިޔަންސާއަށް ކަމަށް ވާތީ، މިއަހަރުގެ ދެވަނަ ޑިވިޝަންގައި ވާދަކުރުމުގެ ފުރުސަތު ވިޔަންސާއަށް ވަނީ ލިބިފައެވެ." އެފްއޭއެމުން ނެރުނު ބަޔާނެއްގައި ވެއެވެ.
މީގެ އިތުރުން އެފްއޭއެމުން ވަނީ، ވީބީ 5000 ރުފިޔާއިން ޖޫރިމަނާކޮށް އެ ފައިސާ އެއް މަސްދުވަހުގެ ތެރޭގައި އެފްއޭއެމަށް ދެއްކުމަށް ވެސް އަންގައިފައެވެ.
މިދިޔަ އަހަރުގެ ދެވަނަ ޑިވިޝަންގައި ޓީސީއާ ދެކޮޅަށް ވީބީ ކުޅުނު މެޗުގެ 49 ވަނަ މިނިޓުގައި ވީބީގެ އިސްމާއިލް ޝަހުތަށް ރެފްރީ ރަތްކާޑު ދެއްކުމުން އެކަމާ ހިތްހަމަނުޖެހިގެން ވީބީގެ ކުޅުންތެރިން ދަނޑުން ފޭބިއިރު ޓީސީން ވަނީ ވީބީގެ މައްޗަށް 4-0 ލަނޑުގެ ލީޑެއް ހޯދައިފައެވެ.
ދިވެހި ލީގު 2009، 2010 އަދި 2011، އެފްއޭ ކަޕް 2008، 2011، ގައުމީ މުބާރާތް 2010 އަދި 2010، 2011 ވަނަ އަހަރުގެ ޗެރިޓީ ޝީލްޑް ކާމިޔާބުކޮށްފައިވާ ވީބީގެ ޗެއާމަނަކީ، އެފްއޭއެމްގެ ނޯމަލައިޒޭން ކޮމިޓީގެ ޗެއާމަން އަދި މޯލްޑިވްސް އޮލިމްޕިކް ކޮމިޓީގެ ޗެއާމަން މުހައްމަދު ޝަވީދުގެ ޗެއާމަން ކަމުގެ ދަށުން ހިންގާ ކްލަބެކެވެ.