ކުޅުދުއްފުށީ ދެކުނު ދާއިރާގެ މެންބަރު މުހައްމަދު ނަޝީދު ޕީޕީއެމަށް ސޮއިކުރައްވައިފި އެވެ.
ނަޝީދު ޕީޕީއެމަށް ސޮއި ކުރެއްވީ ކުރީގެ ރައީސް މައުމޫން އަބްދުލް ގައްޔޫމާއެކު ޕީޕީއެމް އޮފީހުގައި މިއަދު ބޭއްވި ރަސްމިއްޔާތެއްގަ އެވެ.
ޕީޕީއެމަށް ސޮއި ކުރެއްވުމަށްފަހު ނަޝީދު ވިދާޅުވީ އޭނާ އެ ޕާޓީއާ ގުޅިވަޑައިގަތުމަށްފަހު ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި "ޕާޓީގެ އުސޫލުތަކުގެ މަތިން" އެ ޕާޓީގެ ޓިކެޓުގައި ކުޅުދުއްފުށީ ދެކުނު ދާއިރާއަށް ވާދަ ކުރައްވާނެ ކަމަށެވެ. އަދި ޕީޕީއެމްގެ މަޖިލިސް މެމްބަރަކަށް ވުމުން އެ ޕާޓީއަށް ގާނޫނީ ގޮތުން ދޭންޖެހޭ ލަފާތައް ދިނުމުގައި ދެމިހުންނާނެ ކަމަށް ނަޝީދު ވިދާޅުވި އެވެ.
ބަންޑާރަ ނައިބު މުހައްމަދު އަނިލްއަކީ އެކުގައި "އެއް ލޯފާމެއްގައި" މަސައްކަތްޕުޅު ކުރެއްވި އެންމެ ގާތް ޕާޓުނަރު ކަމަށް ވިދާޅުވެ، ނަޝީދު ވިދާޅުވީ އާ ސަރުކާރުގެ ވަޒީރަކަށް އަނިލްވުމުން، ސަރުކާރު ހިންގާ ޕާޓީ، ޕީޕީއެމާ ނުގުޅި ވަކިން ހުރުމުގެ މާނައެއް ނެތް ކަމަށެވެ.
ޑީއާރްޕީގެ ޒައީމަކަށް ކުރީގެ ރައީސް މައުމޫން އަބްދުލް ގައްޔޫމް ހުންނެވިއިރު، ޑީއާރްޕީން ވަކިވެވަޑައިގެން 2009 އަހަރު ރައްޔިތުންގެ މަޖިލީހުގެ އިންތިހާބުގައި އަމިއްލަ ގޮތުން ވާދަކުރައްވައި، ކުޅުދުއްފުށީ ދެކުނު ދާއިރާގެ ގޮނޑި ކާމިޔާބު ކުރެއްވި ނަޝީދު މިއަދާ ހަމައަށް ހުންނެވީ އެއްވެސް ޕާޓީއަކާ ނުގުޅި މިނިވަން މެމްބަރަކަށެވެ.
date_range
ބުރާސްފަތި 16 ޖެނުއަރީ 2025