ބޮލީވުޑްގެ މަޝްހޫރު ބަތަލާ ކަރީނާ ކަޕޫރު ޚާން އަދި ދެކުނު އިންޑިއާގެ ކުޅަދާނަ އެކްޓަރު ޕްރިތުވީރާޖް ސުކުމާރަން މުހިންމު ރޯލުތަކުން ފެނިގެންދާ ފިލްމު "ދާއިރާ" ޑިޖިޓަލް ޕްލެޓްފޯމެއްގައި އަޅުވަން ތައްޔާރުވެއްޖެއެވެ.
ކުޅަދާނަ ޑައިރެކްޓަރު މޭގްނާ ގުލްޒާރު ގެނެސްދޭ މި ތަޙުޤީޤީ ކްރައިމް ތްރިލާ ސިނަމާތަކުގައި ދެއްކުމަށްފަހު، މި ހަފުތާގެ ފަހުކޮޅު ނެޓްފްލިކްސް މެދުވެރިކޮށް ދުނިޔޭގެ އެކި ކަންކޮޅުތަކުގެ ބެލުންތެރިންނަށް ދޫކޮށްލުމަށް މިހާރު ވަނީ ހަމަޖެހިފައެވެ.
ނެޓްފްލިކްސްގެ ރަސްމީ ތާވަލުން ކަށަވަރުވާ ގޮތުގައި، މި އަންނަ ހުކުރު ދުވަހުން ފެށިގެން މި ފިލްމު އެ ޕްލެޓްފޯމުން ސްޓްރީމްކުރެވޭނެއެވެ. ސިނަމާތަކުގައި ހިންދީ އަދި މަލަޔާޅަމް ބަހުން މި ފިލްމު ދެއްކި ނަމަވެސް، ނެޓްފްލިކްސްގައި މިވަގުތު ލިސްޓުކޮށްފައިވަނީ މައިގަނޑު ގޮތެއްގައި ހިންދީ ބަހުން ގެނެސްދޭ ތްރިލާއެއްގެ ގޮތުގައެވެ. މި ފިލްމުގެ މައިގަނޑު ދެ ތަރިންގެ އިތުރުން ދެން ފެނިގެންދާނީ ޖިތެންދުރަ ޖޯޝީ، ކަންވަލްޖީތު ސިންގް، އަޗިންތު ކޯރު، އަނޫޖާ ސާތޭ، ސީމާ އަޒްމީ އަދި ބިސްވަޕަތީ ސަރްކާރު ފަދަ ހުނަރުވެރި ތަރިންނެވެ.
ފިލްމު "ދާއިރާ"ގެ ޑައިރެކްޓަރު މޭގްނާ ގުލްޒާރު، އެ ފިލްމުގެ ލީޑް ތަރިން ކަމަށްވާ ކަރީނާ ކަޕޫރު ޚާން އަދި ޕްރިތުވީރާޖް ސުކުމާރަންއާ އެކު--ފޮޓޯ/ދަހޮލީވުޑްރިޕޯޓާމިއީ ޙަޤީޤީ ހާދިސާތަކެއްގެ މައްޗަށް ބިނާކޮށް މޭގްނާ ގުލްޒާރު ޑައިރެކްޓްކޮށް، ގުޅިގެން ސްކްރީންޕްލޭ ލިޔެފައިވާ ފިލްމެކެވެ. މީގެ ކުރިން އޭނާ ގެނެސްދިން ކާމިޔާބު ފިލްމުތައް ކަމަށްވާ "ތަލްވާރު" އަދި "ރާޒީ" އުފެއްދި ޖަންގްލީ ޕިކްޗާސް އާއި މޭގްނާ ގުޅިގެން ގެނެސްދޭ މި އުފެއްދުމަށް ބެލުންތެރިން ކުރާ އުންމީދު ވަރަށް ބޮޑެވެ.
ފިލްމުގެ ވާހަކަ ފެށިގެން އަންނަނީ މުޅި މުޖުތަމައު ސިއްސުވާލައި، އާންމުންގެ ބޮޑު ކަންބޮޑުވުމާއި ރުޅިވެރިކަމެއް އުފެއްދި ރޭޕާއި މަރުގެ އަނިޔާވެރި މައްސަލައަކުންނެވެ. ނަމަވެސް، މި މައްސަލައިގެ ތަޙުޤީޤު އެއްކޮށް ބަދަލުވެގެންދަނީ ތުހުމަތުކުރެވޭ ހަތަރު މީހަކު ފުލުހުންގެ އެންކައުންޓަރެއްގައި މަރާލުމާ ގުޅިގެންނެވެ. އެ ހިސާބުން، ފުލުހުން ހިންގި މި އޮޕަރޭޝަނުގެ ޤާނޫނީ ސައްހަކަމާމެދު ބޮޑެތި ސުވާލުތަކެއް އުފެދި، އޮފިސަރުން ޤާނޫނީ އިޖުރާއާތުތަކަށް ފުރިހަމައަށް ތަބާވިތޯ ބެލުމުގެ ސީރިއަސް ބަހުސެއް ފެށިގެންދެއެވެ.
މި މައްސަލައިގެ ހޫނު ބަހުސްތަކުގެ މެދުގައި، އެންކައުންޓަރުގެ މޭސްތިރިއެއްގެ ގޮތުގައި ފެންނަނީ ޕްރިތުވީރާޖް ސުކުމާރަން ކުޅޭ ޑީސީޕީ ރަމަން ކުމާރުގެ ކެރެކްޓާއެވެ. އޭނާއާ ދެކޮޅަށް، ކޮންމެ ހާލަތެއްގައި ވެސް އިންސާފު ގާއިމުކުރަންވާނީ ޤާނޫނުގެ އިމުގެ ތެރެއިން ކަމަށް ދެކޭ ޑީސީޕީ އަޖޫނީ ކޯލީގެ ރޯލުން ފެންނަނީ ކަރީނާ ކަޕޫރު ޚާންއެވެ. ފުލުހުންގެ ޒިންމާ އާއި އިންސާފު ހޯދުމުގެ މަގާމެދު މި ދެ އޮފިސަރުންގެ މެދުގައި އުފެދޭ ފުށުއެރުންތަކަކީ މި ތްރިލާގެ މައިގަނޑު އަސާސެވެ. އެގޮތުން، ކުށްވެރިންނަށް ވަގުތުން އަދަބު ދިނުމަށް އެދޭ އާންމުންގެ ޖަޒުބާތީ އެދުމާއި، ޤާނޫނީ ހަމަތަކަށް ބޯލެނބުމަށް ފުލުހުންގެ މައްޗަށް ލާޒިމުކުރާ އުސޫލުތަކުގެ މެދުގައި އޮންނަ ވަރުގަދަ އަރާރުން މި ފިލްމުން ވަރަށް ފުރިހަމައަށް ދައްކުވައިދެއެވެ.