މާލެ ސަރަހައްދުގައި ޓްރެފިކް ބާރުބޮޑުވާ ވަގުތުތަކަށް ޚާއްސަކޮށްގެން ދަތުރުކުރާނެ ބަސްތަކާއި، ސްކޫލް ކުދިންނަށް ޚާއްސަ ބަސްތަކެއް ތައާރަފުކުރުމަށް މަސައްކަތް ކުރަމުން އަންނަ ޓްރާންސްޕޯޓް މިނިސްޓަރު މުޙައްމަދު ސައީދު މިރޭ ވިދާޅުވެއްޖެއެވެ.
ސަރުކާރުގެ މިނިސްޓަރުންނާ ސުވާލުކުރުމަށް ފުރުސަތު ދިނުމުގެ ގޮތުން ބާއްވާ "އަހާ ފޯރަމް"ގައި ސައީދު ވަނީ މާލެ ސަރަހައްދުގެ ޓްރެފިކް މައްސަލައަށް ހައްލެއް ހޯދުމަށް ކުރަމުން އަންނަ މަސައްކަތްތަކަށް އަލިއަޅުއްވާލައިފައެވެ. އޭނާ ވިދާޅުވީ، ހަތަރު އަނގޮޅި ފަދަ އުޅަނދުތައް ތޮއްޖެހޭ ސަރަހައްދުތަކުގައި ޓްރެފިކް ލައިޓް ހަރުކުރުމާއި، ފުލުހުން ހަރަކާތްތެރިވާ މިންވަރު އިތުރުކުރުން ފަދަ ކަންކަން ކުރަމުން އަންނަ ކަމަށެވެ.
ސައީދު ވަނީ، މިހާރު ވެސް މަގުތަކުގައި ފުލުހުން ހަރަކާތްތެރިވާ މިންވަރު އިތުރުވެފައިވާކަން ފާހަގަކުރެވޭނެ ކަމަށް ވިދާޅުވެފައެވެ.
"މީގެ އިތުރަށް ހުޅުމާލޭގެ ފޭސް ދެއަކާއި، ފޭސް އެކަކުން މާލެއަށް މަސައްކަތަށް ވަޑައިގަންނަވާ ބޭފުޅުންނާއި، ގިނައީ އެ ބޭފުޅުން، އަދި އޭގެ އިތުރަށް މާލޭން އެކިއެކި ބޭނުންތަކަށް ހަމަ އެ ގަޑީގައި ރަޝް އަވާސްތަކުގައި ހުޅުމާލެއަށް ވަޑައިގަންނަވާ ބޭފުޅުންނަށް އަޅުގަނޑުމެން މި ޕްލޭންގެ ތެރޭގައި ހިމެނޭނެ ފޭސް ދެއަކުން ވެލާނާގެ ސަރަހައްދަށް އަދި ގްރީން ޒޯނަށް ވަކި ގަޑިތަކެއް ދަތުރުކުރާ ބަސްތަކެއް ތައާރަފުކުރަން،" މިނިސްޓަރު ހާމަކުރެއްވިއެވެ.
އަހާ ފޯރަމްގެ ތެރެއިން: ޓްރެފިކް ބާރު ބޮޑުވާ ގަޑިތަކަށާއި، ސްކޫލް ކުދިންނަށް ޚާއްސަ ބަސްތައް ތައާރަފުކުރަން ރާވައިފައިވާ ކަމަށް ސައީދު ވިދާޅުވި -- ފޮޓޯ/ ރައީސް އޮފީސް
ހަމައެއާއެކު، ސްކޫލުތަކުގެ އިސް ވެރިންނާއި ބެލެނިވެރިންނާ ވާހަކަދައްކައިގެން، ސްކޫލުތަކަށް ދަތުރުކުރާ ބަސްތަކެއް ހުޅުމާލޭ ދެ ފިޔަވައްސާއި މާލެއާ ދޭތެރޭގައި ފަށަން ވިސްނައިފައިވާ ކަމަށް އޭނާ ވިދާޅުވިއެވެ.
"މިހެން މިކަން ކުރުމުގެ ބޭނުމަކީ ވަރަށް ގިނަ އަދަދެއްގެ ބޭފުޅުން އޮފީހަށް ވަޑައިގަންނަވާއިރު ސައިކަލުގައި އަދި ހަތަރު ފުރޮޅުލީ ވެހިކަލުގައި އެބަ ދަތުރުކުރައްވާ، އެކަން ވާނީ ވެސް އެހެން، އެކަމަކު ބުރިޖުގައި އޮންނަ ލިމިޓޭޝަންއާއެކު، ހައިވޭގައި އޮންނަ ލިމިޓޭޝަންއާއެކު ޖާގަ ބޮޑުކުރެވެން އިތުރަށް ނޯންނާތީ،" ސައީދު ވިދާޅުވިއެވެ.
މީގެ އިތުރުން، މާލެ ސަރަހައްދަށް މީހުން އިތުރުވެފައި އޮތް ނިސްބަތަށް ބަލާއިރު، މިހާރަށް ފެންނަ އެންމެ އެކަށީގެންވާ އެއް ހައްލަކީ ވީހާވެސް ގިނަ މީހުންނަށް އެއް ފަހަރާ ދަތުރުކުރެވޭ "މާސް ޓްރާންސްޕޯޓް" އުޅަނދުތައް އޮތުން ކަމަށް ބެލެވޭ ކަމަށް އޭނާ ވިދާޅުވިއެވެ.
މާލެ ސަރަހައްދުގައި ދިރިއުޅޭ މީހުންގެ އާބާދީ ދެ ލައްކައަށްވުރެ އިތުރުވެފައިވާއިރު، ހެނދުނު ސްކޫލަށާއި ވަޒީފާއަށް ދާ ވަގުތުތަކުގައި އާއި ގެއަށް ދާ ވަގުތުތަކުގައި މުޅި މި ސަރަހައްދުގައި އުޅަނދުތައް ވަރަށް ބޮޑަށް ތޮއްޖެހެއެވެ. އަދި އުޅަނދުތައް ގިނަވުމާއި، ބާރަށް ދުއްވުން ފަދަ ސަބަބުތަކާ ހެދި މާލެ ސަރަހައްދުގައި އެކްސިޑެންޓުތައް ވެސް ވަނީ ވަރަށް ބޮޑަށް އިތުރުވެފައެވެ.
ސަރުކާރު ކުންފުނި އެމްޓީސީސީން މިހާރު ވެސް ބަހުގެ ނިޒާމެއް ގާއިމުކޮށްފައިވެއެވެ. އެ ބަސްތަކުން ސްކޫލު ކުދިންނަށާއި 65 އަހަރުން މަތީގެ މީހުންނަށް ހިލޭ ދަތުރުކުރެވެއެވެ.