ޗައިނާގެ ފުރަތަމަ އޮފްޝޯ ކާބަން އިންޖެކްޝަން ޕްރޮޖެކްޓްގެ މައިގަނޑު އޮނިގަނޑު އެއްކޮށް ނިންމާލައި، "ޑޮންގްފަންގް 1-1" ގޭސް ފީލްޑުގެ އައު ސެންޓްރަލް ޕްލެޓްފޯމް ކޮމިޝަން ކުރުމުގެ މަރުޙަލާގެ މަސައްކަތް މިއަދު ފަށައިފައިވާ ކަމަށް ޗައިނާގެ މަޝްހޫރު ނޫހެއް ކަމަށްވާ ސީޖީޓީއެން އިން ރިޕޯޓްކޮށްފިއެވެ.
މި މަޝްރޫއަކީ ގުދުރަތީ ގޭސް އުފައްދާ މިންވަރު އިތުރުކުރުމަށް ޓަކައި، ޖައްވަށް ބޭރުވާ ކާބަން ޑައިއޮކްސައިޑް ހިފަހައްޓައި ބިމުގެ އަޑީގެ ފަށަލަތަކަށް ފޮނުވާލުމަށް ފަރުމާކޮށްފައިވާ މަޝްރޫއެކެވެ. މި ޕްލެޓްފޯމްގެ ޚިދުމަތް ރަސްމީކޮށް ފެށުމުން، ކޮންމެ އަހަރަކު ވެސް އެއް މިލިއަނަށް ވުރެ ގިނަ ޓަނުގެ ކާބަން ޑައިއޮކްސައިޑް ބިމުގެ އަޑީގައި ދާއިމީ ގޮތެއްގައި ރައްކާކުރެވޭނެ އެވެ. މިއީ ޗައިނާގެ ކަނޑުގެ ހަކަތަ އުފައްދާ ސިނާޢަތުން ޖައްވަށް ދޫކުރާ ވިހަ ގޭސްތައް ބޮޑުތަނުން މަދުކުރުމަށް އެޅިގެންދާ މުހިންމު ފިޔަވަޅެކެވެ.
މި މަޝްރޫއަށް ޚާއްސަކޮށްގެން ބިނާކޮށްފައިވާ ސެންޓްރަލް ޕްލެޓްފޯމުގެ ބަރުދަނުގައި ގާތްގަނޑަކަށް 17،000 ޓަނު ހުރިއިރު، މިއީ 28 ބުރީގެ އިމާރާތެއްހާ އުސް ޕްލެޓްފޯމެކެވެ. މި ޕްލެޓްފޯމްގެ ޑެކްގެ ޖާގައަކީ 10،000 އަކަމީޓަރަށް ވުރެ ބޮޑު ސަރަޙައްދެކެވެ. މިއީ އާދައިގެ ބާސްކެޓްބޯޅަ ކޯޓުގެ ގާތްގަނޑަކަށް 22 ކޯޓުގެ ބޮޑުމިނެވެ.
މި ޕްލެޓްފޯމުން ގުދުރަތީ ގޭހާއެކު އުފެދޭ ކާބަން ޑައިއޮކްސައިޑް ހިފަހައްޓައި، ސާފުކުރުމަށްފަހު، ކޮމްޕްރެސްކޮށް އަލުން ބިމުގެ އަޑީގެ ފަށަލަތަކަށް ފޮނުވާލާނެއެވެ. މިގޮތަށް ހެދުމުން ނެގުމަށް އުނދަގޫވާ ގުދުރަތީ ގޭސް ފަސޭހައިން ނެގުމަށް އެހީތެރިވެދިނުމުގެ އިތުރުން، ކާބަން ޑައިއޮކްސައިޑް ދާއިމީކޮށް ބިމުގެ އަޑީގައި ރައްކާކުރެވިގެންދެއެވެ.
"ޑޮންގްފަންގް 1-1" ގޭސް ފީލްޑަކީ ޗައިނާއިން އަމިއްލައަށް ހިންގާ ފުރަތަމަ އޮފްޝޯ ގޭސް ފީލްޑެވެ. އަދި މިއީ ކާބަންގެ މިންވަރު މަތި ކަމަށް ފާހަގަކުރެވިފައިވާ މައި ގޭސް ފީލްޑެކެވެ. 2003 ވަނަ އަހަރު މިތަނުން މަސައްކަތް ފެށި ފަހުން މިހާތަނަށް 50 ބިލިއަން ކިއުބިކް މީޓަރަށް ވުރެ ގިނަ ގުދުރަތީ ގޭސް ވަނީ އުފައްދާފައެވެ.
މި ގޭސް ފީލްޑްގެ އުމުރުން ދުވަސްވެ، ތަރައްގީގެ ފަހު މަރުޙަލާއަށް އެޅުމާއެކު، ގުދުރަތީ ގޭސް އުފައްދާ މިންވަރު ދަށަށް ގޮސް، ކާބަންގެ މިންވަރު ވަނީ މަތިވެފައެވެ. މިއީ މިފަދަ ކާބަން އިންޖެކްޝަން ޓެކްނޮލޮޖީއެއް ބޭނުންކުރުމަށް ލިބުނު ރަނގަޅު ފުރުސަތެކެވެ.
މި މަޝްރޫއު ފުރިހަމައަށް ހިނގައިގަތުމުން، އަހަރަކު އެއް މިލިއަން ޓަނުގެ ކާބަން ޑައިއޮކްސައިޑް ބިމުގެ އަޑިއަށް ފޮނުވާލެވޭނެއެވެ. މިއީ ޗައިނާގައި ކަނޑުގެ ސަރަޙައްދުގައި ފުޅާ ދާއިރާއެއްގައި މި ޓެކްނޮލޮޖީ ބޭނުންކުރާ ފުރަތަމަ ފަހަރު ކަމަށްވާއިރު، މިއީ ސިނާއީ ގޮތުން ކާބަން ޑައިއޮކްސައިޑް ބޭނުންތެރި ވަސީލަތަކަށް ހެދުމަށް ލިބުނު ބޮޑު ކުރިއެރުމެއް ކަމަށް އެ ގައުމުން ބުނެއެވެ.