ޗައިނާގެ އޮންލައިން ފެޝަން ކުންފުނި ޝީން އިން، އާންމު ކުންފުންޏެއްގެ ގޮތުގައި ނެރޭ ފުރަތަމަ މާލީ ރިޕޯޓު މި ހަފުތާގައި ނެރުމަށް ތައްޔާރުވެއްޖެއެވެ.
މި ރިޕޯޓު ނެރެން ތައްޔާރުވެފައި މިވަނީ، ހޮންގްކޮންގްގެ ހިއްސާގެ ބާޒާރުގައި އެ ކުންފުނި ލިސްޓުކުރި ފަހުން ހިއްސާގެ އަގު 28 އިންސައްތަ ދަށަށް ގޮސްފައިވާ ދަނޑިވަޅެއްގައެވެ. ކުންފުނީގެ ފުރަތަމަ ހަ މަސްދުވަހުގެ މާލީ ނަތީޖާ ފާސްކުރުމަށް ޝީންގެ ބޯޑުން މިއަދު ބައްދަލުކުރާނެއެވެ.
ބްލޫމްބާގުން ރިޕޯޓުކޮށްފައިވާ ގޮތުގައި، އިންވެސްޓަރުން އެންމެ ބޮޑަށް ސަމާލުކަން ދޭނީ ވިޔަފާރި ދަށްވަމުންދާ ކަމުގެ ނިޝާންތައް ފެންނަމުންދާ ތިންވަނަ ކުއާޓަރުގެ ނަތީޖާތަކަށެވެ.
ބްލޫމްބާގް ސެކަންޑް މެޝާއިން ހާމަކޮށްފައިވާ ކްރެޑިޓް އަދި ޑެބިޓް ކާޑުގެ މުއާމަލާތްތަކުގެ ތަފާސްހިސާބުތަކުން ދައްކާ ގޮތުގައި، އޮގަސްޓް މަހާއި ސެޕްޓެންބަރު މަހުގެ ކުރީކޮޅާ ހަމައަށް އެމެރިކާގައި ޝީންގެ ވިޔަފާރި ވަނީ 10 އިންސައްތައަށް ވުރެ ބޮޑަށް ދަށަށް ގޮސްފައެވެ. މީގެ އިތުރުން، ޗައިނާގައި ތިބި ޝީންގެ މައިގަނޑު ދެ ސަޕްލަޔަރަކާ ހަވާލާދީ ބްލޫމްބާގުން ރިޕޯޓުކޮށްފައިވާ ގޮތުގައި، ތިންވަނަ ކުއާޓަރުގައި އެ ކުންފުނިން ދިން އޯޑަރުތައް ވަނީ ގާތްގަނޑަކަށް 20 އިންސައްތަ މަދުވެފައެވެ. ސިމިލާވެބްގެ ތަފާސްހިސާބުތަކަށް ބަލާއިރު، އޮގަސްޓް މަހު ޝީންގެ ވެބްސައިޓަށް ވަން މީހުންގެ އަދަދު ވެސް ވަނީ ދަށަށް ގޮސްފައެވެ. އަދި އެޕްޓޯޕިއާއިން ހާމަކޮށްފައިވާ ގޮތުގައި، އޮގަސްޓް މަހު ޝީންގެ އެޕްލިކޭޝަން ޑައުންލޯޑްކުރި މިންވަރު ވަނީ 40 އިންސައްތައަށް ވުރެ ބޮޑަށް ވެއްޓިފައެވެ.
ޝީންގެ ވިޔަފާރިއަށް ކުރިމަތިވެފައިވާ އެންމެ ބޮޑު އެއް ގޮންޖެހުމަކީ ޔޫރަޕާއި އެމެރިކާގެ ގަވާއިދުތަކަށް ގެނައި ބަދަލުތަކެވެ. ޖުލައި މަހުން ފެށިގެން ވިލާތުގެ އިއްތިހާދު (އީޔޫ) އިން ވަނީ 150 ޔޫރޯއަށް ވުރެ އަގުހެޔޮކޮށް އެތެރެކުރާ މުދަލުން ކަސްޓަމްސް ޑިއުޓީ މާފުކުރާ އުސޫލު އުވާލައި، ކޮންމެ އައިޓަމަކުން ތިން ޔޫރޯގެ ފީއެއް ނަގަން ފަށައިފައެވެ. އަދި ފަރަންސޭސިވިލާތުން ވަނީ މި މަހުން ފެށިގެން، އަގުހެޔޮކޮށް ގިނަ އަދަދަކަށް އަންނައުނު ވިއްކާ ކުންފުނިތަކުގެ އުފެއްދުންތަކުން އިތުރު ފީއެއް ނަގަން ފަށައިފައެވެ. މީގެ ތެރޭގައި ޓީޝާޓަކުން ދެ ޔޫރޯ އަދި ޖެކެޓަކުން 12 ޔޫރޯގެ ފީއެއް ހިމެނެއެވެ. އީރާނުގެ ހަނގުރާމައާ ގުޅިގެން ތެލާއި މުދާ އުފުލުމުގެ އަގު ބޮޑުވުމުގެ ސަބަބުން ވެސް ކުންފުނީގެ ފައިދާއަށް ވަނީ އަސަރުކޮށްފައެވެ. ބްލޫމްބާގް އިންޓެލިޖެންސްގެ އެނަލިސްޓުން ލަފާކުރާ ގޮތުގައި، މި އަހަރު ޝީންގެ އާމްދަނީ ކުރިއަރާ މިންވަރު 2.5 އިންސައްތައަށް ދަށްވެ، ހިންގުމުގެ ފައިދާ 19 އިންސައްތައަށް ވުރެ ބޮޑަށް ދަށަށް ދާނެއެވެ.
ހޮންގްކޮންގްގެ ހިއްސާގެ ބާޒާރުގައި ޝީން ލިސްޓުކޮށްފައިވަނީ ގާތްގަނޑަކަށް 26 ބިލިއަން ޑޮލަރުގެ އަގެއްގައެވެ. މިއީ 2022 ވަނަ އަހަރު އެ ކުންފުނީގެ އަގު 100 ބިލިއަން ޑޮލަރަށް އެރި އިރާ އަޅައި ބަލާއިރު ވަރަށް ބޮޑު ދަށްވުމެކެވެ. ޝީންގެ ވިޔަފާރި ދަށްވަމުންދާއިރު، ވާދަވެރި ޓީމޫ އަދި އެމެޒޯން ފަދަ ކުންފުނިތަކުގެ ވިޔަފާރި އޭޕްރީލް މަހުން ފެށިގެން އަންނަނީ ކުރިއަރަމުންނެވެ.
ބެއިޖިންގެ އިންވެސްޓްމަންޓް ބޭންކެއް ކަމަށްވާ ޗޭންސަން އެންޑް ކޯގެ ޑިރެކްޓަރު ޝެން މެންގް ބުނި ގޮތުގައި، ކުރު މުއްދަތެއްގެ ތެރޭގައި ވިޔަފާރި ރަނގަޅުކުރާނެ ސާފު ސްޓްރެޓަޖީއެއް ނެތި، ކުންފުނީގެ ހާލަތު އަނބުރާ އިއާދަކުރުމަކީ އުނދަގޫ ކަމަކަށް ވާނެއެވެ. ބްލޫމްބާގް އިންޓެލިޖެންސްގެ އެނަލިސްޓުން ކަމަށްވާ ކެތަރިން ލިމް އަދި ޖޭސަން ޒޫ ފާހަގަކުރި ގޮތުގައި، ކުންފުނީގެ ހާލަތު އިތުރަށް ގޯސްވޭތޯ ބެލުމަށް ތިންވަނަ ކުއާޓަރުގެ ނަތީޖާތައް މުހިންމު ދައުރެއް އަދާކުރާނެއެވެ.