ދުބާއީން ފުރައިގެން އިސްރާއީލުގެ ތެލް އަވީވަށް ދަތުރުކުރި ފްލައިދުބާއީގެ މަތިންދާބޯޓެއްގެ ކޮންޓްރޯލް ނަގަން އުޅުނު ކޯޕައިލެޓަކާއި އޮސްޓްރޭލިއާއާ އޮތް ގުޅުންތައް އެ ގައުމުގެ ކަމާބެހޭ ފަރާތްތަކުން ތަހުގީގުކުރަން ފަށައިފިއެވެ.
މިދިޔަ ބުދަ ދުވަހު 170 އަށް ވުރެ ގިނަ ފަސިންޖަރުންނާއެކު ދަތުރުކުރި މި ބޯޓުގެ ކެޕްޓަނަށް ކޯޕައިލެޓް ހަމަލާދިނީ ކޯރާޑިއަކުންނެވެ. ޔޫއޭއީގެ ޕްރޮސެކިއުޓާ ޖެނެރަލް ހަމަދު ސައިފް އައްޝާމިސީ ވިދާޅުވި ގޮތުގައި، ދަތުރު ފެށިތާ ދެ ގަޑިއިރާއި ބައި ފަހުން ދިން މި ހަމަލާއާ ގުޅިގެން ބޯޓު ވަނީ 17،000 ފޫޓު (5،200 މީޓަރު) ތިރިއަށް ވެއްޓިފައެވެ. ނަމަވެސް ފަސިންޖަރުން ވަނީ ކޯޕައިލެޓް ހުއްޓުވައި، ބޯޓުގެ ކޮންޓްރޯލް ހޯދާފައެވެ.
އެއަށްފަހު ބޯޓުގައި ތިބި އިތުރު ދެ ޕައިލެޓުން ވަނީ ސައުދީ އަރަބިއްޔާއަށް ބޯޓު ސަލާމަތްތެރިކަމާއެކު ޖައްސާފައެވެ. އަނިޔާވި ކެޕްޓަން ސްމިތު މަޗްހަރަކީ އިންޑިއާގެ ރައްޔިތެކެވެ. އޭނާއަށް ކައިރީގައިވާ ހޮސްޕިޓަލެއްގައި ފަރުވާދިނުމަށްފަހު، މިހާރު ވަނީ އަބޫދާބީއަށް ގެންގޮސްފައެވެ. އޭނާގެ ހާލު ސްޓޭބަލް ކަމަށް ރިޕޯޓުތައް ބުނެއެވެ.
ރޮއިޓާސްއާއި ސީއެންއެން ފަދަ މީޑިއާތަކުން ރިޕޯޓުކޮށްފައިވާ ގޮތުގައި، މި ހަމަލާދިން ކޯޕައިލެޓަކީ ހަމާމް އަލް ހައްމާމީ ނަމަކަށް ކިޔާ މީހެކެވެ. އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވި ގޮތުގައި އޭނާއަކީ އޮމާންގެ ރައްޔިތެކެވެ. އޮސްޓްރޭލިއާގެ ފެޑެރަލް ޕޮލިސް (އޭއެފްޕީ) އިން ބީބީސީއަށް ދިން ބަޔާނެއްގައި ވަނީ، އެ މީހާއާއި އޮސްޓްރޭލިއާއާ އޮތް ގުޅުން ތަހުގީގުކުރަމުންދާކަން ކަށަވަރުކޮށްދީފައެވެ. މި ތަހުގީގުގައި ސްޓޭޓް ފުލުހުންނާއި ސަލާމަތީ އިދާރާތަކުން ބައިވެރިވާ ކަމަށް އޭއެފްޕީން ބުނެފައިވެއެވެ.
އޮސްޓްރޭލިއާގެ މީޑިއާތަކަށް މައުލޫމާތު ދިން ފަރާތްތަކާ ހަވާލާދީ ރިޕޯޓުކޮށްފައިވާ ގޮތުގައި، 2014 ވަނަ އަހަރު އޭނާއަށް ވަނީ ސްޓޫޑެންޓް ވީޒާ ދޫކޮށްފައެވެ. އަދި 2015 އިން 2017 އަށް އޭނާ ވަނީ އޮސްޓްރޭލިއާގައި ކިޔަވާފައެވެ. އޮސްޓްރޭލިއަން ބްރޯޑްކާސްޓިން ކޯޕަރޭޝަން (އޭބީސީ) އިން ބުނި ގޮތުގައި، ކޯހެއްގައި ރަޖިސްޓްރީވެފައި ނެތުމުގެ ސަބަބުން 2019 ވަނަ އަހަރު އޭނާގެ ވީޒާ ވަނީ ބާތިލުކޮށްފައެވެ. އޭނާ ހަރުކަށި ފިކުރަށް ލެނބުނީ އޮސްޓްރޭލިއާގައި ހުރިއިރުތޯ ކައުންޓާ ޓެރަރިޒަމް އޮފިޝަލުން ބަލާނެ ކަމަށްވެސް އޭބީސީން ރިޕޯޓުކޮށްފައިވެއެވެ.
ޔޫއޭއީގެ ޕްރޮސެކިއުޓާ ޖެނެރަލް ވިދާޅުވި ގޮތުގައި، ތަހުގީގުތަކުން ދައްކާ ގޮތުގައި ކޯޕައިލެޓް މަސައްކަތްކުރީ ޓެރަރިސްޓް ހަމަލާއެއް ދިނުމަށެވެ. އެމެރިކާގެ މީޑިއާތަކުން ރިޕޯޓުކޮށްފައިވާ ގޮތުގައި، މީގެ ކުރިން އޮމާން އެއާގައި މަސައްކަތްކުރިއިރު، ހަރުކަށި ފިކުރުގެ ސަބަބުން އޭނާ ވަނީ ފްލައިޓް ޓްރެއިނިންއިން ވަކިކޮށްފައެވެ.
މީގެ އިތުރުން، އިނގިރޭސިވިލާތުގެ ބަކިންހަމްޝަޔާ ނިއު ޔުނިވާސިޓީން ބުނި ގޮތުގައި، 2020 ވަނަ އަހަރުން ފެށިގެން އޮންލައިންކޮށް ކިޔަވައި، 2023 ވަނަ އަހަރު އޭނާ ވަނީ އޭވިއޭޝަން މެނޭޖްމަންޓްގެ ދާއިރާއިން ޑިގްރީ ހާސިލުކޮށްފައެވެ. ނަމަވެސް އެ ޔުނިވާސިޓީން ޕައިލެޓް ޓްރެއިނިން ހަދާފައިނުވާ ކަމަށް އެ ތަނުން ބުނެފައިވެއެވެ.
ނަތަންޔާހޫ ވިދާޅުވި ގޮތުގައި، އިމަޖެންސީކޮށް ބޯޓު ޖެއްސުމަށްފަހު ކޯޕައިލެޓް ވަނީ ހައްޔަރުކޮށްފައެވެ. އަދި މިހާރު ސައުދީ އަރަބިއްޔާގެ ކަމާބެހޭ ފަރާތްތަކުން ދަނީ އޭނާއާ ސުވާލުކުރަމުންނެވެ.
އެ ޕައިލެޓާ ގުޅުން ހުރި ކަމަށް ތުހުމަތު ކުރެވޭ މީހުން ވެސް އަންނަނީ ފުލުހުންގެ ބެލުމުގެ ދަށަށް ގެންދަމުންނެވެ. އެގޮތުން ފްލައި ދުބާއީގައި މަސައްކަތް ކުރާ ދެ ދިވެހީން ވެސް ދުބާއީ ފުލުހުން ސުވާލު ކުރުމަށް ގެންގޮސްފައިވާކަން ދިވެހި ސަރުކާރުގެ ރަސްމީ ބައެއް މަސްދަރުތަކުން ވަނީ "ސަން" އަށް ކަށަވަރު ކޮށްދީފައެވެ.