ސައްހަނޫން ބޭންކު ސްލިޕު ފޮނުވައިގެން ކާތަކެތި އޯޑަރުކުރި ކަމުގެ ތުހުމަތުގައި ޒުވާނަކު ހައްޔަރުކޮށްފިއެވެ.
ކްރިމިނަލް ކޯޓުގެ އަމުރުގައިވާ ގޮތުން ސައްހަނޫން ސްލިޕު ފޮނުވައިގެން ކާތަކެތި އޯޑަރުކުރިކަމުގެ ތުހުމަތުގައި ހައްޔަރުކުރީ ގދ. ފަރެސްމާތޮޑާއަށް ނިސްބަތްވާ އުމުރުން 23 އަހަރުގެ ޒުވާން ފިރިހެނެކެވެ.
ބަންދު އަމުރުގައިވަނީ އެ ޒުވާނާއާ ދެކޮޅަށް ތުހުމަތުކުރެވޭ ވަރަށް ފުލުހުން ހެކި ހުށަހަޅައިފައިވާ ކަމަށެވެ. އަދި ސައްހަނޫން ސްލިޕު ފޮނުވައިގެން އޯޑަރުކުރި ކާތަކެއްޗާ ހަވާލުވީ އޭނާކަން އެ ހެކިތަކުން އެނގޭ ކަމަށް، ބަންދު އަމުރުގައިވެއެވެ.
އެ ޒުވާނާ ބަންދުގައި ބަހައްޓަންޖެހޭ ސަބަބުތަކެއް ކަމަށް ބަންދު އަމުރުގައި ބަޔާންކޮށްފައިވަނީ ތަކުރާރުކޮށް ކާތަކެއްޗަށް އޯޑަރުކޮށް އެ ތަކެތި ގެންދިއުމުން ހަވާލުވެފައިވަނީ އޭނާ ކަމަށެވެ. އަދި އޭނާއަކީ ކުށުގެ ރެކޯޑު އޮތް މީހެއް ކަމަށް ވެސް އަމުރުގައި ފާހަގަކޮށްފައިވެއެވެ.
އޭނާގެ ބަންދަށް ވަނީ 15 ދުވަސް ޖަހައިފައެވެ.
މީގެ ކުރިން ވެސް ސައްހަނޫން ސްލިޕު ފޮނުވައިގެން ވިޔަފާރިކުރި އެކި މައްސަލަތަކާ ގުޅިގެން ފުލުހުންގެ ބެލުމުގެ ދަށަށް މީހުން ގެންގޮސްފައިވެއެވެ.