ސައިކަލުގެ މަޑިދަށުންނާއި ސައިކަލުގައި ބަހައްޓާފައިހުރި ކޮތަޅެއްގެ ތެރެއިން ބަނގުރާ ކަމަށް ޝައްކުކުރެވޭ 17 ފުޅި ފެމުނުން ބަންގްލަދޭޝަށް ނިސްބަތްވާ ދެ ޒުވާނަކު 15 ދުވަހަށް ބަންދުކުރުމަށް ކްރިމިނަލް ކޯޓުން އިއްޔެ ނިންމައިފިއެވެ.
މި މައްސަލައިގައި ހައްޔަރުކޮށްފައިވަނީ ބަންގްލަދޭޝަށް ނިސްބަތްވާ އުމުރުން 24 އަހަރުގެ އެމްޑީ ޔާމިން އަލީ އާއި އުމުރުން 22 އަހަރުގެ އެމްޑީ އަބްދުލް އަޖޮމެވެ. އެ ދެމީހުންވެސް ހައްޔަރުކޮށްފައިވަނީ މަސްތުވާތަކެތި ބޭނުންކުރުމާއި ބަނގުރާ ގެންގުޅުމުގެ ތުހުމަތުގައެވެ.
ކޯޓު އަމުރުގައިވާ ގޮތުން އެ ދެމީހުން ބަންދުކޮށްފައިވަނީ އެ މީހުންގެ މައްޗަށް ތުހުމަތުކުރެވޭ ކޮންމެވެސް މިންވަރަކަށް ހެކި ހުށަހަޅާފައިވުމުން ކަމަށެވެ.
އެގޮތުން ފުލުހުންގެ ހާދިސާ ރިޕޯޓުގައި އެ ދެމީހުން ތިބި ސައިކަލުގެ މަޑިދަށުންނާއި ސައިކަލުގައި ބަހައްޓާފައިހުރި ކޮތަޅެއްގެ ތެރެއިން މަސްތުވާތަކެތި ކަމަށް ޝައްކުކުރެވޭ އެއްޗެއްހުރި 17 ފުޅި ފެނިފައިވާ ކަމަށް ކޯޓު އަމުރުގައިވަނީ ބުނެފައެވެ.
މީގެ އިތުރުން ދެ މީހުންގެ ކުޑަކަމުދާ ތަކެތި ޓީއެޗްސީއަށް ޕޮޒިޓިވް ވެފައިވާ ކަމަށް ކޯޓު އަމުރުގައި ބުނެފައިވެއެވެ.
މީގެ އިތުރުން އެ ދެމީހުން ބަންދުގައި ބަހައްޓަންޖެހޭ ހާލަތެއް ކަމަށް ކޯޓު އަމުރުގައި ކަނޑައަޅާފައިއޮތީ، ދެމީހުންނަކީވެސް ގާނޫނާ ޚިލާފަށް ރާއްޖޭގައި އުޅޭ ދެ މީހުން ކަމަށް ބެލެވޭތީއާއި ބަންގްލަދޭޝަށް ނިސްބަތްވާ ބަޔަކަށްވުމުން ބަންދުން ދޫކޮށްލައިފިނަމަ ފިލުމުގެ އިހްތިމާލެއް އޮތް ކަމަށް ފެންނާތީއެވެ.
މީގެ އިތުރުން ކޯޓު އަމުރުގައި، ދެމީހުން ހައްޔަރުކޮށްފައިވަނީ އިޖުރާއަތާ އެއްގޮތަށްކަމަށް ބުނެފައިވެއެވެ. މި ދެ މީހުންގެ ވެސް ބަންދުގެ މުއްދަތު ހަމަވާނީ މިމަހުގެ 18ވާ އާދިއްތަ ދުވަހަށެވެ.
މަސްތުވާތަކެތީގެ މިފަދަ މައްސަލަތަކުގައި ރާއްޖޭގައި އުޅޭ ބިދޭސީންގެ ދައުރު ވަރަށް ބޮޑުކަން ފާހަގަކޮށްލެވެއެވެ. އަދި ވަކިން ޚާއްސަކޮށް ބަނގުރަލުގެ މައްސަލަތަކުގައި ހައްޔަރުކުރާ ބިދޭސީންގެ އަދަދު މި ފަހަކަށް އައިސް ވަނީ އިތުރުވެފައެވެ. އޭގެ ތެރޭގައި ބަންގްލަދޭޝް މީހުން ގިނައެވެ.