ވައިގެ ދަތުރުފަތުރުގެ ތާރީހުގައި މަދުން ނޫނީ ނުފެންނަ ފަދަ ނުރައްކާތެރި ހާދިސާއަކުން ގިނަ ބައެއްގެ ފުރާނަ ސަލާމަތްކުރި ކެޕްޓަނަކަށް މުޅި ދުނިޔޭގެ ސަމާލުކަން ވަނީ ހުއްޓިފައެވެ. ދުބާއީއިން ފުރައިގެން އިސްރާއީލުގެ ޓެލް އަވީވްއަށް ދަތުރުކުރި ފްލައިދުބާއީގެ ފްލައިޓް އެފްޒެޑް1073 ގެ ކޮކްޕިޓް ތެރޭގައި ހިނގި ހަމަނުޖެހުމަކާ ގުޅިގެން، އެ ފްލައިޓް ވެއްޓުމުގެ ބިރު ހީވި ވަގުތު، އިންޑިއާއަށް ނިސްބަތްވާ ކެޕްޓަން ސްމިތު މައްޗަރު ނިންމި ނިންމުމަށް ގައުމުތަކުގެ އިސްވެރިން ދަނީ ތާރީފުކުރައްވަމުންނެވެ. މިދިޔަ ސެޕްޓެންބަރު މަހުގެ 30 ވަނަ ދުވަހު ހިނގި މި ހާދިސާއާ ގުޅިގެން، ކެޕްޓަން ސްމިތު ވަނީ ބައިނަލްއަގުވާމީ ބަތަލަކަށް ވެފައެވެ.
މި ހާދިސާއާ ގުޅިގެން އެންމެ ބޮޑު ސަމާލުކަމެއް ލިބުނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ދެއްވި ހާއްސަ ދައުވަތަށެވެ. ނަތަންޔާހޫގެ އޮފީހުން އާންމުކުރި ވީޑިއޯއެއްގައި، ހޮސްޕިޓަލުގައި ފަރުވާ ހޯދަމުންދާ ކެޕްޓަން ސްމިތާ ފޯނުން ގުޅުއްވައި ވާހަކަދައްކަވަމުން، އޭނާއަކީ އިންޑިއާއާއި އިސްރާއީލުގެ އިތުރުން މުޅި ދުނިޔޭގެ ބަތަލެއް ކަމަށް ނަތަންޔާހޫ ސިފަކުރެއްވިއެވެ. އަދި އަންނަ އަހަރުގެ މެއި މަހު އޮންނަ އިސްރާއީލުގެ މިނިވަން ދުވަހުގެ ރަސްމިއްޔާތުގައި ބައްތި ރޯކުރުމުގެ ޝަރަފު ކެޕްޓަން ސްމިތަށާއި އިންޑިއާގެ ބޮޑުވަޒީރު ނަރެންދުރަ މޯދީއަށް އެރުވުމަށް ބޭނުންފުޅުވާ ކަމަށް ނަތަންޔާހޫ ވިދާޅުވިއެވެ. މިއީ އާންމުގޮތެއްގައި ހަމައެކަނި އިސްރާއީލުގެ ރައްޔިތުންނަށް ދޭ ޝަރަފެކެވެ.
މި ތާރީފުތަކުގެ ފެށުމަކީ ކޮކްޕިޓް ތެރޭގައި ހިނގި ނުރައްކާތެރި ކުރިމަތިލުމެވެ. ރިޕޯޓުތައް ބުނާ ގޮތުން، 170 އަށް ވުރެ ގިނަ މީހުންނާއެކު ދަތުރުކުރި ބޯއިން 737 މަރުކާގެ މި ބޯޓުގެ ކޯ-ޕައިލެޓް ވަނީ ކެޕްޓަން ސްމިތަށް ހަމަލާދީފައެވެ. މި ހަމަނުޖެހުމުގެ ތެރޭގައި ބޯޓުގެ ކޮންޓްރޯލް ގެއްލި، 30 ސިކުންތަށް ވުރެ ކުރު ވަގުތުކޮޅެއްގެ ތެރޭގައި 14،000 ފޫޓު ތިރިއަށް ބޯޓު ވެއްޓެން ފެށިއެވެ. ކެޕްޓަން ސްމިތު އިންޑިއާގެ ބޮޑުވަޒީރަށް މައުލޫމާތު ދިން ގޮތުގައި، ބޯޓު ވެއްޓެމުންދިޔަ ވަގުތު އޭނާ މަސައްކަތްކުރީ އަމިއްލަ ފުރާނަ ސަލާމަތްކުރުމަށެވެ. ނަމަވެސް، ޒަހަމްވެފައި އޮވެމެ، އޭނާ ވަނީ ކޮކްޕިޓްގެ ދޮރު ހުޅުވައި، ކްރޫންނާއި ފަސިންޖަރުންނަށް އެތެރެއަށް ވަދެ ހަމަލާދިން މީހާ ހުއްޓުވުމުގެ ފުރުސަތު ދީފައެވެ. އެއަށްފަހު ބެކަޕް ކްރޫއިން ބޯޓުގެ ކޮންޓްރޯލް ނަގައި، ސައުދީ އަރަބިއްޔާގެ ތަބޫކަށް ވަނީ ސަލާމަތްތެރިކަމާއެކު ބޯޓު ޖައްސާފައެވެ.
މި ހާދިސާއަށްފަހު ކެޕްޓަން ސްމިތު ވަނީ އިތުރު ފަރުވާއަށް ޔޫއޭއީގެ އަބޫދާބީއަށް ބަދަލުކޮށްފައެވެ. ދުބާއީގެ ވަލީއަހުދު އަދި ޔޫއޭއީގެ ދިފާއީ ވަޒީރު ޝައިހް ހަމްދާން ބިން މުހައްމަދު ބިން ރާޝިދު އަލް މަހްތޫމް ވަނީ ހޮސްޕިޓަލަށް ވަޑައިގެން ކެޕްޓަން ސްމިތާ ބައްދަލުކުރައްވާފައެވެ. ޝައިހް ހަމްދާން މީސްމީޑިއާގައި ލިޔުއްވާފައިވާ ގޮތުގައި، ކެޕްޓަން ސްމިތު ދައްކައިދިނީ ހިތްވަރުގަދަކަމާއި ޒިންމާދާރުކަމުގެ އެންމެ މަތީ ދަރަޖައެވެ. އަދި އޭނާއަކީ ޔޫއޭއީގެ ޓީމުގެ ބައެއް ކަމަށާއި، އެ ގައުމުގެ ތާރީހުގެ ބައެއް ކަމަށް ޝައިހް ހަމްދާން ފާހަގަކުރެއްވިއެވެ. މީގެ އިތުރުން، ޔޫއޭއީގެ ޖެނެރަލް ސިވިލް އޭވިއޭޝަން އޮތޯރިޓީން ވެސް ވަނީ ކެޕްޓަން ސްމިތާއި ފްލައިޓްގެ ކްރޫންނާއި ފަސިންޖަރުން ކުރި މަސައްކަތަށް ތާރީފުކޮށްފައެވެ.
އިންޑިއާގެ ރައްޔިތުންނާއި ސަރުކާރުން ވެސް ދަނީ ކެޕްޓަން ސްމިތަށް ބޮޑު ތަރުހީބެއް ދެމުންނެވެ. އިންޑިއާގެ ބޮޑުވަޒީރު ނަރެންދުރަ މޯދީ ވަނީ ވީޑިއޯ ކޯލް މެދުވެރިކޮށް ކެޕްޓަން ސްމިތާ ވާހަކަދައްކަވައި، އޭނާގެ ހިތްވަރަށް ތާރީފުކުރައްވާފައެވެ. ޔޫއޭއީގައި ހުންނަވާ އިންޑިއާގެ ސަފީރު ދީޕަކް މިއްތަލް ހޮސްޕިޓަލަށް ވަޑައިގެން އާއިލާއާ ބައްދަލުކުރެއްވުމަށްފަހު ވިދާޅުވި ގޮތުގައި، ކެޕްޓަން ސްމިތުގެ ހާލު އަންނަނީ ރަނގަޅުވަމުންނެވެ.
އޭނާ ހިނިތުންވެ ހުރެ ވާހަކަދެއްކުމަކީ އާއިލާއަށާއި އެންމެންނަށް ލިބުނު ބޮޑު ހިތްހަމަޖެހުމެއް ކަމަށް ސަފީރު ފާހަގަކުރެއްވިއެވެ. މީގެ އިތުރުން އިންޑިއާގެ މަޝްހޫރު ދެ ފިލްމީ ޝަހިސިއްޔަތުން ކަމުގައިވާ ޝާހުރުކް ޚާނާއި ސަލްމާން ޚާން ވެސް ކެޕްޓަން ސްމިތަށް ތައުރީފުކޮށް މީސްމީޑިއާގައި މެސެޖް އާންމުކޮށްފައިވެއެވެ.
ފްލައި ދުބާއީގައި ހިނގި ނުރައްކާތެރި ހާދިސާ ހިނގަން މެދުވެރިވި ސަބަބުތައް ދެނެގަތުމަށް ޔޫއޭއީ، ސައުދީ އަރަބިއްޔާ އަދި އިސްރާއީލުން އަންނަނީ ތަހުގީގުތައް ކުރިއަށްގެންދަމުންނެވެ. ޔޫއޭއީގެ އެޓަރނީ ޖެނެރަލްގެ އަމުރަކަށް ޕަބްލިކް ޕްރޮސިކިއުޝަންގެ ޓީމަކުން ޝަރުއީ ތަހުގީގެއް ފަށާފައިވާއިރު، ސިވިލް އޭވިއޭޝަން އޮތޯރިޓީން އަންނަނީ އޮޕަރޭޝަނަލް އަދި ސެކިއުރިޓީ ކަންކަން ބަލަމުންނެވެ. ކޮކްޕިޓް ތެރޭގައި ހިނގި މި ހާދިސާއަކީ ވައިގެ ދަތުރުފަތުރުގެ ސަލާމަތީ ކަންކަމާ ގުޅޭގޮތުން ގިނަ ސުވާލުތަކެއް އުފެދިފައިވާ ކަމެއް ނަމަވެސް، ކެޕްޓަން ސްމިތު އެ ނާޒުކު ވަގުތު ނިންމި ނިންމުމަކީ އެތައް ބައެއްގެ ފުރާނަ ސަލާމަތްކުރުމަށް އެޅުނު އެންމެ މުހިންމު ފިޔަވަޅުކަމަށް ކަމާބެހޭ ފަރާތްތަކުން ގަބޫލުކުރެއެވެ.